ຊະນະສົມບູນ ສຳເລັດກອງປະຊຸມໃຫຍ່ສະຫະພັນກຳມະບານ

ກອງປະຊຸມໃຫຍ່ຜູ້ແທນສະຫະພັນກຳມະບານເມືອງຊະນະສົມບູນ ແຂວງຈໍາປາສັກ ຄັ້ງທີ VIII ໄດ້ສໍາເລັດລົງໃນວັນທີ 14 ກຸມພາຜ່ານມາ ຢູ່ທີ່ສະໂມສອນຂອງເມືອງດັ່ງກ່າວ ໂດຍການເປັນປະທານຂອງສະຫາຍ ຂາວພອນ ສີຍາທະຈັນ ຮອງເລຂາພັກເມືອງ ຜູ້ຊີ້ນຳວຽກງານການເມືອງ-ແນວຄິດ, ວຽກພັກ-ພະນັກງານ ແລະ ອົງການຈັດຕັ້ງມະຫາຊົນຂັ້ນເມືອງ, ສະຫາຍ ສົນໄຊ ບຸນສີຟອງ ຮອງປະທານສະຫະພັນກຳມະບານແຂວງ, ມີແຂກເຊີນເຂົ້າຮ່ວມ.
ໃນທີ່ປະຊຸມ, ສະຫາຍ ຄໍາແສນ ພິມພິສານ ກໍາມະການພັກເມືອງ ປະທານສະຫະພັນກໍາມະບານເມືອງ ໄດ້ ຜ່ານບົດລາຍງານການເມືອງທັງສອງພາກ ເພື່ອຕີລາຄາຄືນການເຄື່ອນໄຫວຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VII ຂອງສະຫະພັນກຳມະບານເມືອງໃນໄລຍະ 5 ປີຜ່ານມາ. ຕະຫຼອດໄລຍະ 5 ປີຜ່ານມາສະຫະພັນກຳມະບານເມືອງ ໄດ້ເອົາໃຈໃສ່ນຳພາ-ຊີ້ນຳ, ຊຸກຍູ້ການປະຕິບັດຫົວຂໍ້ແຂ່ງຂັນ 5 ເປັນເຈົ້າ ໂດຍຕິດພັນກັບຂະບວນການແຂ່ງຂັນຮັກຊາດ - ພັດທະນາ, ການສ້າງເປັນກົມກອງພັດທະນາ, ຊຸກຍູ້ຢ່າງແຂງແຮງບັນດາຮາກຖານກຳມະບານທີ່ນອນຢູ່ໃນເປົ້າໝາຍ 39 ຮາກຖານ. ສະຫະພັນກໍາມະບານເມືອງສາມາດຮັກສາທຸງໄຊນໍາໜ້າຂະບວນການແຂ່ງຂັນ 5 ເປັນເຈົ້າໄດ້ 3 ປີຊ້ອນ ແລະ ໄດ້ຮັບຫຼຽນກາສະຫະພັນກໍາມະບານລາວ 1 ໜ່ວຍ, ໄດ້ຮັບໃບຢັ້ງຢືນ 5 ເປັນເຈົ້າຈາກສະຫະພັນກໍາມະບານແຂວງ 37 ຮາກຖານ, 5 ໜ່ວຍ ເອກະລາດ ແລະ ເພື່ອເປັນການສືບຕໍ່ຈັດຕັ້ງຜັນຂະຫຍາຍເນື້ອໃນຈິດມະຕິກອງປະຊຸມໃຫ່ຍຄັ້ງທີ VIII ຂອງສະຫະພັນກຳມະບານລາວ, ສະຫະພັນກຳມະບານແຂວງ ແລະ ອົງຄະນະພັກເມືອງ ກໍຄື ມະຕິກອງປະຊຸມໃຫຍ່ຄັ້ງທີ VIII ຂອງສະຫະພັນກຳມະບານເມືອງ, ກອງປະຊຸມຍັງໄດ້ຜ່ານທິດທາງໜ້າທີ່ຂອງສະຫະພັນກໍາມະບານເມືອງ 5 ປີຕໍ່ໜ້າ.
      ຈາກນັ້ນ, ກອງປະຊຸມ ໄດ້ໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະບໍລິຫານງານສະຫະພັນກຳມະບານເມືອງຊຸດໃໝ່ ໂດຍມີຜູ້ສະໝັກທັງໝົດ 25 ສະຫາຍ ເລືອກເອົາ 21 ສະຫາຍ. ເລືອກເອົາສະຫາຍ ຄຳແສນ ພິມພິສານ ເປັນປະທານສະຫະພັນກຳມະບານເມືອງ, ເລືອກເອົາສະຫາຍ ສໍລະສິນ ສົມວົງຊອນ ແລະ ສະຫາຍ ສຸກສະໄໝ ໄຊອາຄົມ ເປັນຮອງປະທານ ແລະ ອີກ 18 ສະຫາຍເປັນຄະນະບໍລິຫານງານສະຫະພັນກຳມະບານເມືອງ.
(ຂ່າວ-ພາບ: ນາງ ສຸມາສອນ ວັນທິເດດ ຫ້ອງການ ຖວທ ເມືອງຊະນະສະບູນ)