ໃນບາງເມືອງຂອງອິນເດຍ, ມີການຈຳໜ່າຍແກ໊ສ (LPG) ສຳລັບໃຊ້ໃນຄົວເຮືອນໃນລາຄາທີ່ສູງກວ່າລາຄາຂາຍຍ່ອຍ ຊຶ່ງກຳນົດໄວ້ 913 ຮູປີອິນເດຍຕໍ່ຖັງ. ໃນຂະນະທີ່ຮ້ານອາຫານ ແລະ ໂຮງແຮມຫຼາຍແຫ່ງ, ໂດຍສະເພາະໃນມຸມໄບ ປະສົບກັບບັນຫາແກ໊ສ LPG ເຊັ່ນດຽວກັນ.
ທ່ານ ນາເຣນດາ ໂມດີ ນາຍົກລັດຖະມົນຕີອິນເດຍ ກ່າວວ່າ: ລັດຖະບານກຳລັງເຮັດວຽກຢ່າງຮີບດ່ວນເພື່ອຮັບປະກັນວ່າຈະບໍ່ມີການຊື້-ຂາຍໃນຕະຫຼາດມືດ ຫຼື ການກັກຕຸນແກ໊ສ LPG ທ່າມກາງຄວາມບໍ່ແນ່ນອນກ່ຽວກັບບັນຫາການຂາດແຄນແກ໊ສ LPG.
ທ່ານ ສຸຈາຕາ ຊາຣມາ ເຈົ້າໜ້າທີ່ລັດຖະບານອິນເດຍ ກ່າວວ່າ: ປັດຈຸບັນ, ຍັງບໍ່ມີລາຍງານກ່ຽວກັບການຂາດແຄນແກ໊ສຈາກຜູ້ຈຳໜ່າຍທັງ 25,000 ແຫ່ງ ແລະ ຂໍໃຫ້ປະຊາຊົນຢ່າເຊື່ອຂ່າວລື ແລະ ຫຼີກລ່ຽງການຊື້ກັກຕຸນດ້ວຍຄວາມຕື່ນຕົກໃຈ. ພ້ອມທັງຮຽກຮ້ອງໃຫ້ປະຊາຊົນຫັນມາໃຊ້ແກ໊ສ PNG ແທນ LPG, ໂດຍປັດຈຸບັນມີຄົວເຮືອນ 6 ລ້ານຫຼັງທົ່ວປະເທດອິນເດຍສາມາດປ່ຽນໄປໃຊ້ PNG ໄດ້ຢ່າງງ່າຍດາຍ.
ນອກຈາກນັ້ນ, ລັດຖະບານຍັງພະຍາຍາມທີ່ຈະນຳເອົານ້ຳມັນກາດ ແລະ ຖ່ານຫີນກັບຄືນມາເປັນເຊື້ອເພີງທາງເລືອກສຳລັບການປຸງແຕ່ງອາຫານໃນກໍລະນີສຸກເສີນ, ເພື່ອເປັນແຜນສຳຮອງໃນກໍລະນີທີ່ຂາດແຄນ LPG ຮ້າຍແຮງ. ຂະນະທີ່ການຜະລິດພາຍໃນປະເທດໄດ້ເພີ່ມຂຶ້ນ 30% ເມື່ອທຽບກັບອາທິດທີ່ຜ່ານມາ.
ຄໍາເຫັນ