ຊາວໜຸ່ມອາສາສະໝັກ ສືບຕໍ່ພາລະກິດສ້າງອານາຄົດ ນໍານ້ອງຄືນສູ່ໂຮງຮຽນ

ທ່ານ ບຸນເລີດ ຫັດສະດີ ຮອງຫົວໜ້າຫ້ອງການສຶກສາທິການ ແລະ ກິລາ ເມືອງປາກອູ ໄດ້ໃຫ້ຮູ້ວ່າ: ໃນໄລຍະ 2 ອາທິດ ຜ່ານມາໃນການດຳເນີນວຽກງານຂອງໂຄງການ "ນໍານ້ອງຄືນສູ່ໂຮງຮຽນ" ໃນໄລຍະພັກພາກຮຽນ ປະຈຳສົກຮຽນ 2025-2026 ໄດ້ຮັບການຮ່ວມມືຈາກພໍ່ແມ່-ຜູ້ປົກຄອງ ສ່ວນໃຫ່ຍ ໄດ້ເຫັນເຖິງຄວາມສໍາຄັນຂອງການໃຫ້ລູກຫຼານໄດ້ທົບທວນຄວາມຮູ້ ແລະເສີມສ້າງທັກສະ ຜ່ານກິດຈະກຳການຮຽນຮູ້ທີ່ຫຼາກຫຼາຍ, ແຕ່ຍັງມີບາງຄອບຄົວ ພົບຄວາມຫຍຸ້ງຍາກ ເນື່ອງຈາກເປັນລະດູການຜະລິດ ແລະລະດູຝົນ ຈຶ່ງຈຳເປັນຕ້ອງໃຫ້ລູກຫຼານຊ່ວຍວຽກຄອບຄົວ ສົ່ງຜົນໃຫ້ການຮຽນບໍ່ຕໍ່ເນື່ອງ, ພ້ອມນັ້ນ ນັກຮຽນບາງຈຳນວນໃນຂັ້ນ ປ4 ແລະ ປ5 ຍັງອ່ານ ແລະຂຽນໜັງສືບໍ່ໄດ້ ເຊິ່ງເປັນບັນຫາທີ່ທຸກພາກສ່ວນຈະຕ້ອງຮ່ວມກັນແກ້ໄຂ ໃນຕໍ່ໜ້າ.

ໂອກາດນີ້ ທ່ານ ມີນາ ຈັນມະນີ ໄດ້ສະແດງຄວາມຊົມເຊີຍ ຕໍ່ຄະນະນຳຫ້ອງການສຶກສາທິການ ແລະ ກິລາ ເມືອງປາກອູ, ຄະນະອໍານວຍການໂຮງຮຽນ, ຄູສອນ ແລະຊາວໜຸ່ມອາສາສະໝັກຕະລຸມບອນທຸກຄົນ, ທີ່ໄດ້ສະຫຼະເວລາໃນໄລຍະພັກພາກຮຽນ ເພື່ອມາຮ່ວມສ້າງໂອກາດ ໃນການຮຽນຮູ້ໃຫ້ແກ່ເດັກນ້ອຍ ອັນເປັນພາລະກິດແຫ່ງການເສຍສະຫຼະ ແລະຮັບໃຊ້ສັງຄົມ. ໂອກາດດຽວກັນນັ້ນ ຄະນະຊາວໜຸ່ມພະແນກສຶກສາທິການ ແລະ ກິລາ ແລະຄະນະຊາວໜຸ່ມປະຊາຊົນປະຕິວັດລາວແຂວງ ໄດ້ນໍາເອົາເຄື່ອງອຸປະໂພກ-ບໍລິໂພກ, ອຸປະກອນການຮຽນ ແລະອຸປະກອນກິລາ ຈຳນວນໜຶ່ງມອບໃຫ້ຄະນະອໍານວຍການໂຮງຮຽນ ແລະອາສາສະໝັກປະຈໍາແຕ່ລະໂຮງຮຽນ ເພື່ອສະໜັບສະໜູນການດຳ ເນີນວຽກງານໃຫ້ເກີດຜົນດີຍິ່ງຂື້ນ.ຂ່າວ: ເທວາ ວ່າງ, ກວດແກ້: ປານີ ວິໄລຈິດ