 |
ສະຫາຍ ນາງ ກຸ້ງ ສິງຫາວົງ ໄດ້ຂຶ້ນລາຍງານກ່ຽວກັບການນໍາພາ-ຊີ້ນໍາ ແລະ ຈັດຕັ້ງປະຕິບັດວຽກງານຊາວໜຸ່ມ-ເຍົາວະຊົນຂອງເມືອງທຸລະຄົມ ໃນໄລຍະ 6 ເດືອນຕົ້ນປີ ແລະ ແຜນວຽກຈຸດສຸມ 6 ເດືອນທ້າຍປີ 2026. ຜ່ານການເຄື່ອນໄຫວວຽກງານຕາມພາລະບົດບາດ, ສິດ ແລະ ໜ້າທີ່ຄະນະຊາວໜຸ່ມ ຢ່າງຕໍ່ເນື່ອງ ແລະ ຮອບດ້ານ ສາມາດບັນລຸຜົນງານໄດ້ຫຼາຍດ້ານ ໂດຍສະເພາະ ດ້ານວຽກງານການສຶກສາອົບຮົມການເມືອງ-ແນວຄິດ, ວຽກງານການປັບປຸງການຈັດຕັ້ງຊາວໜຸ່ມ-ເຍົາວະຊົນ, ວຽກງານຂະບວນການຊາວໜຸ່ມ, ວຽກງານໂຄສະນາ-ສື່ມວນຊົນ ແລະ ວຽກງານສົ່ງເສີມວິຊາຊີບ, ການສ້າງອາຊີບ ແລະ ການຫາລາຍໄດ້ໃຫ້ແກ່ຊາວໜຸ່ມ-ໄວໜຸ່ມ. ພ້ອມທັງ ຕີລາຄາດ້ານດີທີ່ພົ້ນເດັ່ນ, ດ້ານອ່ອນຂໍ້ຄົງຄ້າງ ແລະ ບັນຫາອຸປະສັກ ເພື່ອກຳນົດທິດທາງ, ແຜນການ ແລະ ມາດຕະການແກ້ໄຂໃນໄລຍະຕໍ່ໜ້າ ໃຫ້ມີຄວາມສອດຄ່ອງກັບສະພາບຕົວຈິງຂອງທ້ອງຖິ່ນ.
 |
ໃນໂອກາດນີ້, ສະຫາຍ ນາງ ທິບພະຈັນ ສຸທໍາມະວົງ ໄດ້ໃຫ້ການໂອ້ລົມ ແລະ ຊີ້ນຳບາງບັນຫາສຳຄັນ ໂດຍເນັ້ນໜັກໃຫ້ຄະນະບໍລິຫານງານຊາວໜຸ່ມເມືອງທຸລະຄົມ ສືບຕໍ່ຍົກສູງຄຸນນະພາບວຽກງານການເມືອງ-ແນວຄິດ, ສ້າງຕັ້ງອົງການຊາວໜຸ່ມໃຫ້ເຂັ້ມແຂງ, ຊຸກຍູ້ການເຄື່ອນໄຫວໃນທຸກດ້ານໃຫ້ມີຄວາມຫຼາກຫຼາຍ ແລະ ມີປະສິດທິຜົນສູງ, ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງທ້ອງຖິ່ນ ໃຫ້ມີຄວາມກ້າວໜ້າຢ່າງຕໍ່ເນື່ອງ.
 |
ການລົງຊຸກຍູ້ ແລະ ຕິດຕາມວຽກງານໃນຄັ້ງນີ້ ຖືເປັນການຕິດຕາມສະພາບຕົວຈິງ, ຊຸກຍູ້ ແລະ ເສີມສ້າງຄວາມເຂັ້ມແຂງໃຫ້ແກ່ອົງການຊາວໜຸ່ມຂັ້ນຮາກຖານ ເພື່ອໃຫ້ສາມາດຈັດຕັ້ງຜັນຂະຫຍາຍໜ້າວຽກຕ່າງໆ ໃຫ້ບັນລຸຕາມແຜນການທີ່ວາງໄວ້, ປະກອບສ່ວນສຳຄັນເຂົ້າໃນການສ້າງສາ ແລະ ພັດທະນາປະເທດຊາດ ໃຫ້ຈະເລີນກ້າວໜ້າຢ່າງບໍ່ຢຸດຢັ້ງ.
ຄໍາເຫັນ