ເຊກອງ ຈະຈັດກິດຈະກໍາ ຈຳໜ່າຍສິນຄ້າ ໃນລາຄານະໂຍບາຍ

ກິດຈະກໍາໃນຄັ້ງນີ້, ແມ່ນຈະໄດ້ຈັດຂຶ້ນໃນວັນທີ 14 ສິງຫາ 2026 ທີ່ເດີ່ນສູນການຄ້າແຂວງເຊກອງ, ເລີ່ມແຕ່ເວລາ 9:00 ໂມງ ຫາ ເວລາ 17:00 ໂມງ, ຊຶ່ງສິນຄ້າທີ່ນໍາມາຈໍາໜ່າຍ ປະກອບມີປຶ້ມແບບຮຽນ, ປຶ້ມຂຽນ, ບິກ, ສໍດຳ, ຢາງລຶບ, ໄມ້ບັນທັດ, ເຄື່ອງແບບນັກຮຽນ ແລະ ສິນຄ້າອື່ນໆ ໂດຍສະເພາະ ຜະລິດຕະພັນລາວ.

ທ່ານ ນາງ ວິລະຄອນ ບັນທະເວີ ຮອງຫົວໜ້າພະແນກອຸດສາຫະກຳ ແລະ ການຄ້າແຂວງເຊກອງ ໃຫ້ຮູ້ວ່າ: ການຈັດກິດຈະກໍາໃນຄັ້ງນີ້, ເພື່ອເປັນການຮອງຮັບໃຫ້ແກ່ການກະກຽມເປີດສົກຮຽນໃໝ່ (2026-2027), ຊຸກຍູ້ສົ່ງເສີມໃຫ້ຫັນມາຊົມໃຊ້ສິນຄ້າລາວໃຫ້ຫຼາຍຂຶ້ນ ແລະ ເພື່ອແບ່ງເບົາພາລະ ຂອງປະຊາຊົນ ກໍຄື ພໍ່ແມ່ຜູ້ປົກຄອງນັກຮຽນທີ່ມີລາຍຮັບຕໍ່າ.

ສະນັ້ນ, ຈຶ່ງຂໍເຊີນຊວນປະຊາຊົນ ເຂົ້າຮ່ວມກິດຈະກໍາ ຫຼື ເຂົ້າມາໃຊ້ບໍລິການຊື້ສິນຄ້າ (ອຸປະກອນການຮຽນ) ຕາມສະຖານທີ່, ວັນ ແລະ ເວລາ ທີ່ກໍານົດໄວ້ ເພື່ອໃຫ້ໄດ້ສິນຄ້າທີ່ມີຄຸນນະພາບດີ ແລະ ລາຄານະໂຍບາຍ.

ຂ່າວ: ສັນຍາ