ໃນການເປັນເຈົ້າພາບ ຈັດງານມະຫາກຳກິລານັກຮຽນມັດທະຍົມສຶກສາ ທົ່ວປະເທດ ຄັ້ງທີ VIII, ປີ 2027, ຊຶ່ງການກະກຽມຄວາມພ້ອມຮອບດ້ານ ມາຮອດປັດຈຸບັນ, ມີບາງໜ້າວຽກ ສຳເລັດຕາມແຜນທີ່ກຳນົດໄວ້ ເປັນຕົ້ນ: ເຈົ້າແຂວງອອກຂໍ້ຕົກລົງ ສະບັບເລກທີ 366/ຊກ, ລົງວັນທີ 23 ຕຸລາ 2024 ວ່າດ້ວຍຮັບຮອງເອົາໄຟຟ້າພະລັງງານລົມ ຫຼື ກັງຫັນລົມ ເປັນສັນຍາລັກໂລໂກ້, ປາຫວ່າຄຳ ເປັນສັນຍາລັກສັດນຳໂຊກ ໃນການເປັນເຈົ້າພາບຈັດງານມະຫາກໍາກິລານັກຮຽນມັດທະຍົມສຶກສາ ທົ່ວປະເທດຄັ້ງທີ VIII. ພ້ອມນີ້ ຍັງໄດ້ຈັດກອງປະຊຸມຮ່ວມກັບກົມກິລາມວນຊົນ, ພະລະ ແລະ ສິລະປະສຶກສາ ຄັ້ງທີ 1 ໃນທ້າຍເດືອນ ກຸມພາ 2025 ໂດຍໄດ້ກຳນົດໜ້າວຽກທັງໝົດ ທີ່ຈະຕ້ອງໄດ້ຈັດຕັ້ງປະຕິບັດ 5 ຈຸດສຸມ ຄື: ຮັບຮອງເອົາຈໍານວນ 13 ປະເພດກິລາ, ຊິງກໍານົດເອົາ 456 ຫຼຽນ (135 ຫຼຽນຄໍາ, 135 ຫຼຽນເງິນ, 186 ຫຼຽນທອງ) ໃນຈໍານວນ 135 ລາຍການແຂ່ງຂັນ, ແຂວງໜຶ່ງສາມາດສົ່ງຄະນະນຳນັກກິລາ, ຄູຝຶກ ແລະ ນັກກິລາໄດ້ສູງສຸດ 394 ທ່ານ; ຈັດກອງປະຊຸມຮ່ວມກັບກົມກິລາມວນຊົນ, ພະລະ ແລະ ສິລະປະສຶກສາ ຄັ້ງທີ 2 ໃນທ້າຍເດືອນພຶດສະພາ 2025 ໂດຍໄດ້ກໍານົດໂຄງປະກອບບຸກຄະລາກອນ ຄະນະຮັບຜິດຊອບລະດັບຊາດ ແລະ ງົບປະມານຮັບໃຊ້ກຳມະການຝ່າຍຕ່າງໆ ຈຳນວນ 48 ຕື້ກວ່າກີບ, ງົບປະມານຈໍານວນດັ່ງກ່າວກະຊວງສຶກສາທິການ ແລະ ກິລາແມ່ນໄດ້ນຳສະເໜີໄປຍັງກະຊວງການເງິນແລ້ວ ລໍຖ້າການພິຈາລະນາອະນຸມັດຈາກສະພາແຫ່ງຊາດ ເພື່ອນຳໃຊ້ເຂົ້າໃນ 10 ກໍາມະການ.
ເຈົ້າແຂວງ ອອກຂໍ້ຕົກລົງ ວ່າດ້ວຍ ແຕ່ງຕັ້ງຄະນະຮັບຜິດຊອບສຳຫຼວດ, ອອກແບບ, ປັບປຸງ, ກໍ່ສ້າງພື້ນຖານໂຄງລ່າງ ສະໜາມກິລາ ແລະ ສະຖານທີ່ພັກ; ມາຮອດປັດຈຸບັນ ວຽກທີ່ໄດ້ລົງມືກໍ່ສ້າງ ແລະ ປັບປຸງສະໜາມແລ່ນລານ (ຮ່ອງແລ່ນ) ນັບແຕ່ເດືອນ ສິງຫາ 2025, ຜ່ານການກວດກາປະເມີນຜົນບັນດາໜ້າວຽກທີ່ສໍາເລັດ ແມ່ນວຽກປູເບຕົງ ປະຕິບັດໄດ້ 70% ຂອງໜ້າວຽກທັງໝົດ, ສ່ວນວຽກທີ່ຍັງບໍ່ທັນສໍາເລັດ ແມ່ນວຽກລົງຢາງ, ທາສີສັງເຄາະ ໃສ່ສະໜາມແລ່ນ-ລານ ຊຶ່ງຈະໄດ້ສືບຕໍ່ຈັດຕັ້ງປະຕິບັດ ພ້ອມທັງໄລ່ລຽງລາຄາຄືນໃໝ່ໃຫ້ແທດເໝາະກັບສະພາບຕົວຈິງ; ໃນວັນທີ 23 ມີນາ 2026, ຄະນະຮັບຜິດຊອບ ແລະ ກອງເລຂາ ໄດ້ຈັດກອງປະຊຸມຄົ້ນຄວ້າປຶກສາຫາລືຄືນໃໝ່ ໂດຍເຫັນດີຕັດບາງກິດຈະກຳ ແລະ ໄລ່ລຽງຄືນດ້ານງົບປະມານ ຈາກ 21 ກິດຈະກໍາ ຍັງເຫຼືອ 19 ກິດຈະກໍາ ສ່ວນການຄິດໄລ່ມູນຄ່າລາຄາ ທາງວິຊາການທີ່ກ່ຽວຂ້ອງສືບຕໍ່ຄິດໄລ່ຄາດຄະເນຈະສຳເລັດ ໃນເດືອນມີນາ 2026ນີ້; ນອກຈາກນີ້, ໄດ້ສໍາເລັດການກຳນົດຈຸດ ຈັດການແຂ່ງຂັນກິລາແຕ່ລະປະເພດມີ 8 ຈຸດ; ດ້ານພື້ນຖານໂຄງລ່າງ ສະໜາມກິລາເຫັນວ່າ ມີຄວາມພ້ອມ ໃນຂັ້ນພື້ນຖານ. ນອກຈາກສະໜາມທີ່ໄດ້ກຳນົດໄວ້, ຍັງມີບັນດາສະໜາມກາງແຈ້ງ ແລະ ໃນຮົ່ມ ທີ່ມີຄວາມພ້ອມ ຢູ່ຕາມສະຖານການສຶກສາ, ສຳນັກງານພະແນກການ, ກົມກອງ ພາຍໃນເທສະບານແຂວງ ເພື່ອອຳນວຍຄວາມສະດວກໃຫ້ແກ່ນັກກິລາຕ່າງແຂວງ ໄດ້ເຂົ້າຮ່ວມການຝຶກຊ້ອມ ຕາມແຜນຄວາມຕ້ອງການ; ກຳນົດເປົ້າໝາຍສູນພັກນັກກິລາ ບັນດາແຂວງເຂົ້າຮ່ວມການແຂ່ງຂັນ ມີ 17 ສູນ, ມີອາຄານຮຽນ 46 ຫຼັງ, ຫໍພັກ 6 ຫຼັງ, ຫ້ອງຮຽນ 335 ຫ້ອງ, ຫ້ອງນໍ້າ 247 ຫ້ອງ, ບ່ອນອາບນໍ້າ 20 ຈຸດ ສາມາດຮອງຮັບຄູຝຶກ, ນັກກິລາໄດ້ທັງໝົດ 4,262 ທ່ານ, ສະຖານທີ່ພັກແຕ່ລະຈຸດຕ້ອງໄດ້ປັບປຸງຄືນເຊັ່ນ: ອາຄານ, ໄຟຟ້າ, ນ້ຳປະປາ, ຫ້ອງນ້ຳ, ບ່ອນອາບນ້ຳ; ສະຖານທີ່ຮອງຮັບໃຫ້ແກ່ການນຳ, ແຂກ ແລະ ບັນດາມວນຊົນທົ່ວໄປ ຢູ່ພາຍໃນເມືອງລະມາມ ທີ່ເປັນເມືອງເທສະບານແຂວງ ແມ່ນມີ ໂຮງແຮມ 6 ແຫ່ງ ມີ 148 ຫ້ອງ, ເຮືອນພັກ 20 ແຫ່ງ ມີ 244 ຫ້ອງ, ສວນອາຫານ 5 ແຫ່ງ, ຮ້ານອາຫານ 22 ແຫ່ງ, ຮ້ານກິນດື່ມ 24 ແຫ່ງ, ຮ້ານບັນເທີງ 1 ແຫ່ງ, ຮ້ານຄາຣາໂອເກະ 3 ແຫ່ງ. ນອກຈາກນີ້, ມີບັນດາຜູ້ປະກອບການໄດ້ລົງທຶນໃນການກໍ່ສ້າງໂຮງແຮມ, ເຮືອນພັກ, ຮ້ານອາຫານ, ຮ້ານກິນດື່ມເກີດຂຶ້ນໄໝ່ຈຳນວນຫຼາຍແຫ່ງ.
ທ່ານ ຄໍາໄພ ສິມມາວັດ ໃຫ້ຮູ້ຕື່ມວ່າ: ມາຮອດປັດຈຸບັນນີ້ ພະແນກສຶກສາທິການ ແລະ ກິລາແຂວງ ໄດ້ປະສານສົມທົບກັບ ກົມກິລາມວນຊົນ, ພະລະ ແລະ ສິລະປະສຶກສາ ເປັນປົກກະຕິ ໃນການກະກຽມວຽກງານຮອບດ້ານ ເພື່ອໃຫ້ທັນຕາມກໍານົດເວລາ ໂດຍແຜນການໃນຕໍ່ໜ້າ ແມ່ນຈະຈັດກອງປະຊຸມຄະນະຮັບຜິດຊອບລະດັບຊາດ ຄັ້ງທີ 1 ເພື່ອເຜີຍແຜ່ນິຕິກໍາຕ່າງໆ ທີ່ກ່ຽວຂ້ອງ, ຄົ້ນຄວ້າ ແລະ ປະກອບບຸກຄະລາກອນເຂົ້າໃນໂຄງປະກອບ 35 ອະນຸກໍາມະການຝ່າຍຕ່າງໆ ພາຍຫຼັງໄດ້ຮັບການແຕ່ງຕັ້ງ 10 ກຳມະການ; ຈັດກອງປະຊຸມຄົບຄະນະກຳມະການ ເພື່ອກຳນົດແຜນງານ, ແຜນຄົນ ແລະ ແຜນງົບປະມານຂອງແຕ່ລະກຳມະການຢ່າງລະອຽດ; ປະສານສົມທົບກັບກົມງົບປະມານ ກະຊວງການເງິນ ໃນການສະເໜີອະນຸມັດງົບປະມານ; ຮ່າງ ແລະ ຄົ້ນຄວ້າກົດລະບຽບ, ກະຕິກາການຈັດການແຂ່ງຂັນຮອບດ້ານ ຂອງກິລາ 13 ປະເພດ; ສືບຕໍ່ຕິດຕາມການກໍ່ສ້າງສະໜາມແລ່ນ-ລານ, ສະໜາມພິທີເປີດ-ປິດ, ການປັບປຸງສະໜາມຮັບໃຊ້ໃນການຝຶກຊ້ອມ ແລະ ແຂ່ງຂັນກິລາທຸກປະເພດ ແລະ ສະຖານທີ່ພັກເຊົາຂອງຄະນະຮັບຜິດຊອບ, ຄູຝຶກ, ນັກກິລາ; ກະກຽມຈັດກອງປະຊຸມຄະນະຮັບຜິດຊອບລະດັບຊາດ ຄັ້ງທີ II ເພື່ອຮັບຮອງໜ້າວຽກຕ່າງໆ, ທັງນີ້ ກໍເພື່ອແນໃສ່ເຮັດການຈັດງານມະຫາກຳກິລານັກຮຽນມັດທະຍົມສຶກສາ ທົ່ວປະເທດ ຄັ້ງທີ VIII ປະສົບຜົນສຳເລັດຢ່າງມີປະສິດທິພາບ.
(ຂ່າວ: ພຸດທະສອນ)
ຄໍາເຫັນ