ທ່ານ ພອນເພັດ ຄິວລະວົງ ໄດ້ຍົກໃຫ້ເຫັນມູນເຊື້ອ, ການກຳເນີດ ແລະ ການເຕີບໃຫຍ່ຂະຫຍາຍຕົວ ຂອງແນວລາສ້າງຊາດ ໃນແຕ່ລະໄລຍະ ຄື: ແນວລາວອິດສະຫຼະ (1950-1956), ແນວລາວຮັກຊາດ (1956-1979) ແລະ ແນວລາວສ້າງຊາດ (1979-ປັດຈຸບັນ). ແນວລາວອິດສະຫຼະເປັນຄັນທຸງເຕົ້າໂຮມຂະບວນການຕໍ່ສູ້ ຂອງປະຊາຊົນບັນດາເຜົ່າ, ຜູ້ຊົງຄຸນວຸດທິ, ນັກຮັກຊາດ, ຮັກເອກະລາດ ແລະ ອິດສະຫຼະພາບ; ແນວລາວຮັກຊາດເປັນຄັນທຸງ, ເປັນແກນກາງ ຂອງແນວໂຮມເອກກະພາບແຫ່ງຊາດ, ເຕົ້າໂຮມຂະບວນການຕໍ່ສູ້ກູ້ຊາດ ຂອງປະຊາຊົນ ແລະ ກໍາລັງທີ່ຮັກຊາດຕ່າງໆ, ຕໍ່ສູ້ເພື່ອປົກປັກຮັກສາເອກະລາດ ຂອງຊາດ, ເຕົ້າໂຮມກໍາລັງຮັກຄວາມເປັນທໍາ, ຄວາມກ້າວໜ້າ ຂອງສັງຄົມ ແລະ ສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນາຖາວອນ ແລະ ແນວລາວສ້າງຊາດ ຍັງສືບຕໍ່ດໍາລົງບົດບາດເປັນຫຼັກແຫຼ່ງແນວໂຮມ ໂດຍພາຍໃຕ້ການນໍາພາຂອງພັກ ຊຶ່ງແນວລາວໃນໄລຍະໃໝ່ນີ້ ແມ່ນການສ້າງມະຫາສາມັກຄີ ຂອງປວງຊົນລາວທັງຊາດ, ເຕົ້າໂຮມກຳລັງແຮງພັດທະນາ, ເປັນບ່ອນສຶກສາອົບຮົມປະຊາຊົນຊັ້ນຄົນຕ່າງໆ ເຂົ້າຮ່ວມໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕາມແນວທາງນະໂຍບາຍຂອງພັກ.
 |
ທ່ານ ພອນເພັດ ຄິວລະວົງ ຍັງໄດ້ເລົ່າຄືນປະຫວັດມູນເຊື້ອ ແລະ ການເຄື່ອນໄຫວ ຂອງແນວລາວສ້າງຊາດແຂວງເຊກອງ ຕະຫຼອດໄລຍະຜ່ານມາ, ທັງນີ້ ກໍເພື່ອສ້າງຄວາມຮັບຮູ້-ເຂົ້າໃຈຢ່າງເລິກເຊິ່ງ ຕໍ່ບົດບາດຂອງແນວລາວສ້າງຊາດ. ພ້ອມທັງ ເປັນການໂຄສະນາສຶກສາອົບຮົມ, ປຸກລະດົມຂົນຂວາຍ ແລະ ເສີມຂະຫຍາຍຄວາມສາມັກຄີປະຊາຊົນບັນດາເຜົ່າ ໃຫ້ສືບຕໍ່ຮ່ວມແຮງຮ່ວມໃຈ, ປະກອບສ່ວນເຂົ້າໃນການສ້າງສາພັດທະນາປະເທດຊາດ ກໍຄື ແຂວງເຊກອງ ໃຫ້ມີຄວາມສະຫງົບ, ສາມັກຄີ, ເຂັ້ມແຂງ ແລະ ກ້າວຂຶ້ນຢ່າງບໍ່ຢຸດຢັ້ງ.
ຂ່າວ: ສັນຍາ
ຄໍາເຫັນ