 |
ງານວາງສະແດງຄັ້ງນີ້, ເປັນເວທີສໍາຄັນດ້ານການຄ້າ, ການລົງທຶນ ແລະ ການເຊື່ອມໂຍງຈີນ-ອາຊຽນ ໂດຍມີວິສາຫະກິດ ຫຼາຍກວ່າ 3,400 ບໍລິສັດ ຈາກ 70 ກວ່າປະເທດ ແລະ ເຂດແຄວ້ນເຂົ້າຮ່ວມ, ໂດຍຄາດວ່າຈະມີນັກຈັດຊື້ ແລະ ຜູ້ຊື້ຫຼາຍກວ່າ 30,000 ຄົນ, ເຊິ່ງງານນີ້ ບໍ່ແມ່ນພຽງແຕ່ເປັນງານວາງສະແດງສິນຄ້າ, ແຕ່ຍັງເປັນເວທີສຳຄັນສຳລັບການພົບປະ, ເຈລະຈາທຸລະກິດ, ສ້າງຄູ່ຮ່ວມມື ແລະ ຊອກຫາໂອກາດການລົງທຶນ.
 |
ສໍາລັບແຂວງເຊກອງໄດ້ຈັດຫ້ອງວາງສະແດງ “ເຊກອງ ເມືອງແຫ່ງສະເໜ່” ໂດຍນໍາສະເໜີຂໍ້ມູນດ້ານທ່ອງທ່ຽວທາງດ້ານປະຫວັດສາດ, ທໍາມະຊາດ, ວັດທະນະທໍາ, ສິນຄ້າກະສິກໍາ, ຜະລິດຕະພັນແປຮູບ ແລະ ທ່າແຮງດ້ານການລົງທຶນ. ພ້ອມນັ້ນ, ຍັງໄດ້ນໍາເອົາສິນຄ້າຈາກຫຼາຍກຸ່ມການຜະລິດ ແລະ ຫຼາຍຍີ່ຫໍ້ ຂອງແຂວງມາວາງສະແດງ-ຈໍາໜ່າຍ, ສ້າງຄວາມສົນໃຈແກ່ຜູ້ຊົມ, ນັກທຸລະກິດ ແລະ ສື່ມວນຊົນຈາກຫຼາຍປະເທດ.
ທ່ານ ນາງ ວິລະຄອນ ບັນທະເວີ ຮອງຫົວໜ້າພະແນກ ອຸດສາຫະກໍາ ແລະ ການຄ້າແຂວງເຊກອງ, ໃນນາມຄະນະກອງເລຂາຂັ້ນແຂວງ ຮັບຜິດຊອບງານວາງສະແດງ ກາວວ່າ: ການເຂົ້າຮ່ວມງານໃນຄັ້ງນີ້ ຖືເປັນໂອກາດສໍາຄັນທີ່ແຂວງເຊກອງໄດ້ໂຄສະນາທ່າແຮງ ແລະ ສິນຄ້າຂອງແຂວງໃຫ້ເປັນທີ່ຮູ້ຈັກຢ່າງກວ້າງຂວາງຫຼາຍຂຶ້ນ. ພ້ອມທັງ ເປັນຂົວເຊື່ອມຕໍ່ໃນການພົບປະ, ແລກປ່ຽນ ແລະ ສ້າງໂອກາດຮ່ວມມືກັບນັກລົງທຶນ, ນັກທຸລະກິດ ແລະ ພາກສ່ວນຕ່າງໆ. ຈາກນີ້, ແຂວງຈະສືບຕໍ່ປັບປຸງສິນຄ້າ, ການບໍລິການ ແລະ ຂໍ້ມູນການລົງທຶນໃຫ້ມີຄວາມພ້ອມຫຼາຍຂຶ້ນ.
 |
ຕະຫຼອດໄລຍະການເຂົ້າຮ່ວມງານ, ຫ້ອງວາງສະແດງ “ເຊກອງ ເມືອງແຫ່ງສະເໜ່” ຂອງ ສປປ ລາວ ໄດ້ຮັບຄວາມສົນໃຈຈາກຜູ້ຊົມ ກໍຄື ນັກທ່ອງທ່ຽວຈໍານວນຫຼາຍ ສະເລ່ຍຄົນມາຢ້ຽມຊົມຮ້ານ (ບູດ) ບໍ່ຕໍ່າກວ່າ 2,000 ຫາ 5,000 ເທື່ອຄົນ/ວັນ. ພ້ອມນັ້ນ, ຍັງມີນັກທຸລະກິດຈາກບັນດາປະເທດອາຊຽນໃຫ້ຄວາມສົນໃຈ ເປັນຕົ້ນ ແມ່ນຟີລິປິນ, ສິງກະໂປ, ມາເລເຊຍ, ອິນໂດເນເຊຍ, ບຣູໄນ... ແລະ ຫ້ອງວາງສະແດງ “ເຊກອງ ເມືອງແຫ່ງສະເໜ່” ຂອງ ສປປ ລາວ ຍັງໄດ້ຮັບລາງວັນຫ້ອງວາງສະແດງແຫ່ງຊາດດີເດັ່ນ-ສວຍງາມ (Best National Pavilion)ເຊິ່ງຜົນງານດັ່ງກ່າວ, ສະທ້ອນໃຫ້ເຫັນເຖິງຄວາມພະຍາຍາມ ຂອງແຂວງໃນການນໍາສະເໜີຂໍ້ມູນ, ທ່າແຮງດ້ານການລົງທຶນ ແລະ ສິນລະປະ-ວັດທະນະທໍາທີ່ເປັນເອກະລັກສະເພາະ ຂອງແຂວງໃຫ້ມວນຊົນ ກໍຄື ຜູ້ມາຮ່ວມງານໄດ້ຮັບຮູ້ຢ່າງກວ້າງຂວາງ. ພ້ອມນີ້, ຍັງເປັນໂອກາດສໍາຄັນໃນການເຊື່ອມໂຍງການຄ້າ, ການທ່ອງທ່ຽວ ແລະ ທ່າແຮງການລົງທຶນ ຂອງແຂວງເຂົ້າສູ່ຕະຫຼາດຈີນ-ອາຊຽນ ແລະ ແຂວງຈະນໍາເອົາບົດຮຽນ, ປະສົບການຈາກງານໃນຄັ້ງນີ້ ໄປປັບປຸງການສົ່ງເສີມ, ໂຄສະນາດຶງດູດການຄ້າ, ການລົງທຶນ ແລະ ປັບປຸງຜະລິດຕະພັນໃຫ້ກົງກັບຄວາມຕ້ອງການ ຂອງຕະຫຼາດພາກພື້ນ ແລະ ສາກົນ.
ຂ່າວ: ສັນຍາ
ຄໍາເຫັນ