ເຊກອງດໍາເນີນກອງປະຊຸມຄົບຄະນະພັກແຂວງເປີດກວ້າງຄັ້ງທີ9ສະໄໝທີX

ອົງຄະນະພັກແຂວງເຊກອງໄດ້ດໍາເນີນກອງປະຊຸມຄົບຄະນະບໍລິຫານງານພັກເປີດກວ້າງຄັ້ງທີ9ສະໄໝທີX ໃນວັນທີ13ທັນວານີ້ທີ່ສະໂມສອນຫ້ອງວ່າການແຂວງພາຍໃຕ້ການເປັນປະທານຂອງສະຫາຍເຫຼັກໄຫຼສີວິໄລກໍາມະການສູນກາງພັກເລຂາຄະນະບໍລິຫານງານພັກແຂວງເຈົ້າແຂວງເຊກອງ, ມີສະຫາຍຮອງເລຂາພັກແຂວງ, ຄະນະປະຈໍາພັກແຂວງ, ກໍາມະການພັກແຂວງ, ເລຂາພັກເມືອງ, ເລຂາ-ຄະນະພັກຮາກຖານ, ໜ່ວຍພັກຮາກຖານ, ເຈົ້າເມືອງ, ຫົວໜ້າ-ຮອງພະແນກ, ຫ້ອງການ, ອົງການລັດທຽບເທົ່າຂັ້ນແຂວງແລະຂະແໜງການກ່ຽວຂ້ອງ4ເມືອງເຂົ້າຮ່ວມ.
ສະຫາຍເຫຼັກໄຫຼສີວິໄລໄດ້ກ່າວເປີດກອງປະຊຸມວ່າ: ໂດຍປະຕິບັດຕາມກົດລະບຽບຂອງພັກປະຊາຊົນປະຕິວັດລາວສະໄໝທີXI ກໍຄືປະຕິບັດແຜນດໍາເນີນງານຂອງຄະນະບໍລິຫານງານພັກແຂວງສະໄໝທີX. ກອງປະຊຸມໄດ້ເປີດຂຶ້ນໃນທ່າມກາງບັນຍາກາດທີ່ທົ່ວພັກ,ທົ່ວລັດແລະທົ່ວປວງຊົນບັນດາເຜົ່າພວມຈັດຕັ້ງປະຕິບັດຜັນຂະຫຍາຍມະຕິXI ຂອງພັກ, ມະຕິX ຂອງອົງຄະນະພັກແຂວງໂດຍສະເພາະແມ່ນສຸມໃສ່ການເກັບກ່ຽວຜົນຜະລິດລະດູຝົນແລະຍູ້ແຮງການຜະລິດລະດູແລ້ງ, ການກະກຽມກອງປະຊຸມໃຫຍ່3ຂັ້ນຂອງພັກເພື່ອສ້າງຂະບວນການ-ສ້າງຜົນງານຂໍ່ານັບຮັບຕ້ອນສະເຫຼີມສະຫຼອງວັນສໍາຄັນຕ່າງໆຂອງພັກ, ຂອງຊາດຄື: ວັນສ້າງຕັ້ງກອງທັບປະຊາຊົນລາວຄົບຮອບ75ປີ, ວັນເກີດປະທານໄກສອນພົມວິຫານຄົບຮອບ103ປີ, ວັນເກີດປະທານຄໍາໄຕສີພັນດອນຄົບຮອບ100ປີແລະວັນສ້າງຕັ້ງແຂວງເຊກອງຄົບຮອບ40ປີ; ກອງປະຊຸມຈະໄດ້ພ້ອມກັນຕີລາຄາການນໍາພາ-ຊີ້ນໍາຮອບດ້ານຂອງຄະນະບໍລິຫານງານພັກແຂວງ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປະຈໍາປີ2023ແລະທິດທາງແຜນການປີ2024, ການຈັດຕັ້ງປະຕິບັດ2ວາລະແຫ່ງຊາດ, ບົດລາຍງານຄວາມຄືບໜ້າຂອງການກະກຽມສ້າງຕັ້ງເມືອງໃໝ່ (ເມືອງຕາເວັນອອກ) ທັງວາງແຜນການແລະມາດຕະການຈັດຕັ້ງປະຕິບັດໃນຕໍ່ໜ້າເພື່ອແນໃສ່ເຮັດໃຫ້ການພັດທະນາແຂວງເຊກອງມີການຫັນປ່ຽນຢ່າງແຂງແຮງໃນເງື່ອນໄຂໃໝ່.
ໃນໂອກາດນີ້, ສະຫາຍເຫຼັກໄຫຼສີວິໄລຮຽກຮ້ອງບັນດາສະຫາຍຜູ້ແທນກອງປະຊຸມຈົ່ງເຊີດຊູຄວາມເປັນເຈົ້າການ, ຍົກສູງຄວາມຮັບຜິດຊອບການເມືອງ, ສຸມສະຕິປັນຍາ, ປຶກສາຫາລື, ຄົ້ນຄວ້າແລະປະກອບຄໍາຄິດເຫັນຕໍ່ເນື້ອໃນຕ່າງໆທີ່ໄດ້ສະເໜີຕໍ່ກອງປະຊຸມໂດຍສະເພາະທິດທາງແຜນການແລະຕົວເລກຄາດໝາຍທາງດ້ານເສດຖະກິດ-ສັງຄົມບົນພື້ນຖານມີການວິເຄາະ-ວິໄຈຢ່າງເລິກເຊິ່ງ, ພາວະວິໄສແລະກ້າວໄປເຖິງຄວາມເປັນເອກະພາບເພື່ອເປັນບ່ອນອີງໃນການນໍາພາ-ຊີ້ນໍາ, ບັນຊາຈັດຕັ້ງປະຕິບັດເຂົ້າໃນໜ້າວຽກຕົວຈິງຂອງຂະແໜງການຕົນໃຫ້ມີຜົນສໍາເລັດເປັນຮູບປະທໍາຫຼາຍຂຶ້ນ.
(ຂ່າວ-ພາບ: ສັນຍາ)