 |
ທ່ານ ບຸນເສັງ ພິລາວັນ ຮອງຫົວໜ້າພະແນກສຶກສາທິການ ແລະ ກີລາແຂວງ ລາຍງານໃຫ້ຮູ້ວ່າ: ການເຊັນສັນຍາຄັ້ງນີ້ ປະຕິບັດຕາມຂໍ້ຕົກລົງຂອງຄະນະກຳມະການປົກຄອງແຂວງຫຼວງພະບາງ ວ່າດ້ວຍການເຫັນດີຮັບຮອງເອົາບໍລິສັດ ວິນາ ກໍ່ສ້າງເຄຫາສະຖານ ແລະ ສ້ອມແປງ ຈຳກັດ ເປັນຜູ້ຊະນະການປະມູນ ໂຄງການກໍ່ສ້າງໂຮງຮຽນສາມັນວິຊາຊີບແບບປະສົມວັງເງິນ ແລະ ພະແນກສຶກສາທິການ ແລະ ກີລາ ເປັນເຈົ້້າຂອງໂຄງການ ເຊັນສັນຍາ. ໂຄງການກໍ່ສ້າງໂຮງຮຽນສາມັນວິຊາຊີບ ແບບປະສົມວັງເງິນ, ໄດ້ຮັບທຶນຊ່ວຍເຫຼືອລ້າ ຈາກແຂວງກວາງນິງ ສສ ຫວຽດນາມ ມູນຄ່າ 1 ລ້ານ 9 ແສນກວ່າໂດລາ, ປະກອບມີ ອາຄານ 3 ຊັ້ນ ຈໍານວນ 2 ຫຼັງ, ຫ້ອງນໍ້າ ຈຳນວນ 1 ຫຼັງ, ທັງມີການກໍ່ສ້າງຮົ້ວອ້ອມໂຮງຮຽນ, ສະໜອງເຄື່ອງເຟີນີເຈີ ແລະ ອຸປະກອນອື່ນໆ ຕື່ມອີກ. ການກໍ່ສ້າງຈະໄດ້ລົງມື ໃນການກໍ່ສ້າງນັບແຕ່ມື້ລົງລາຍເຊັນເປັນຕົ້ນໄປ ແລະ ຈະປະຕິບັດໜ້າວຽກໃຫ້ສຳເລັດຕາມຄາດໝາຍໃນກຳນົດ 24 ເດືອນ.
ໂອກາດນີ້, ທ່ານ ບຸນເລື່ອມ ມະນີວົງ ໄດ້ເນັ້ນໜັກໃຫ້ຄະນະຮັບຜິດຊອບທຸກພາກສ່ວນ ຈົ່ງພ້ອມກັນເອົາໃຈໃສ່ໃນການຈັດຕັ້ງປະຕິບັດໂຄງການກໍ່ສ້າງ ໃຫ້ມີຜົນສຳເລັດຕາມວັນເວລາທີ່ໄດ້ກຳນົດໄວ້ໃນສັນຍາ ພ້ອມທັງເປັນເຈົ້າການໃນການຕິດຕາມກວດກາສະພາບເຕັກນິກ ຂອງການກໍ່ສ້າງໃນແຕ່ລະໄລຍະ ໃຫ້ມີຄຸນນະພາບ, ມີຄວາມສວຍງາມ ມີຜົນສຳເລັດຕາມແຜນການທີ່ວາງໄວ້.
(ພາບ-ຂ່າວ: ສອນອາຄົມ ແກ້ວຄຳເພັດ)
ຄໍາເຫັນ