ເພື່ອເຮັດໃຫ້ງານເປີດປີທ່ອງທ່ຽວລາວ 2024 ທີ່ແຂວງສະຫວັນນະເຂດ ເຕັມໄປດ້ວຍບັນຍາກາດທີ່ຄຶກຄື້ນມ່ວນຊື່ນ ແລະ ສ້າງຄວາມປະທັບໃຈໃຫ້ກັບນັກທ່ອງທ່ຽວທັງພາຍໃນ ແລະ ຕ່າງປະເທດ ຊຶ່ງແຂວງສະຫວັນນະເຂດ ຈະໄດ້ງານເປີດປີທ່ອງທ່ຽວລາວ 2024 ຂຶ້ນຢ່າງຍິ່ງໃຫຍ່ ແລະ ຈະຈັດໃຫ້ມີຫຼາກຫຼາຍກິດຈະກຳ ບໍ່ວ່າຈະເປັນການວາງສະແດງຈຳໜ່າຍສິນຄ້າ, ການຄົບງັນດ້ວຍແສງ ສີ ສຽງທີ່ອະລັງການ ຕື່ນຕາຕື່ນໃຈ, ການສະແດງສິລະປະວັນນະຄະດີ ທີ່ບົ່ງບອກເຖິງເອກະລັກ ແລະ ວິຖີການດຳລົງຊີວິດຂອງຊາວແຂວງສະຫວັນນະເຂດ.
ໃນວັນທີ 27 ກຸມພາຜ່ານມາ, ທ່ານ ໂພສີສ້ອຍ ກຸທິລາດ ຫົວໜ້າພະແນກ ຖະແຫຼ່ງຂ່າວ, ວັດທະນະທໍາ ແລະທ່ອງທ່ຽວ (ຖວທ) ແຂວງ ຈຶ່ງໄດ້ເຊີນຊວນນັກທ່ອງທ່ຽວທັງພາຍໃນ ແລະ ຕ່າງປະເທດ ໃຫ້ເຂົ້າມາທ່ອງທ່ຽວພາຍໃນແຂວງສະຫວັນນະເຂດ ເພື່ອມາສຳຜັດກັບແຫຼ່ງທ່ອງທ່ຽວທາງທຳມະຊາດ, ປະຫວັດສາດ ແລະວັດທະນະທຳ ເນື່ອງໃນໂອກາດ ແຂວງສະຫວັນນະເຂດ ຈະເປີດປີທ່ອງທ່ຽວທີ່ຕິດພັນກັບເທສະການສະຫວັນສຸກສັນຫັນສາໃນລະຫວ່າງວັນທີ 10-17 ມີນາ 2024 ທີ່ຈະມາເຖິງນີ້ ພາຍໃຕ້ຄໍາຂວັນ “ທ່ອງທ່ຽວລາວປອດໄພ, ຊື່ນໃຈໃນວັດທະນະທໍາ, ທໍາມະຊາດ ແລະ ປະຫວັດສາດ” ໂດຍຕອບສະໜອງຕາມນະໂຍບາຍຂອງລັດຖະບານ ແຂວງສະຫວັນນະເຂດກໍໄດ້ຖືເອົາໂອກາດນີ້ຈັດງານເປີດປີທ່ອງທ່ຽວລາວ 2024 ແລະ ໄດ້ກຳນົດສັນຍາລັກ ທາດອີງຮັງ, ໄດໂນເສົາ, ແຄນ, ປີ້ງໄກ່ ແລະ ດອກຈານ ເປັນເຄື່ອງໝາຍ ປີທ່ອງທ່ຽວລາວ 2024 ທີ່ແຂວງສະຫວັນນະເຂດ ເພື່ອເປັນການຕ້ອນຮັບນັກທ່ອງທ່ຽວທີ່ຈະມາທ່ຽວແຂວງສະຫວັນນະເຂດ. ພະແນກ ຖວທ ແຂວງສະຫວັນນະເຂດ ໄດ້ມີແຜນການກະກຽມຕ້ອນຮັບນັກທ່ອງທ່ຽວ ໂດຍພວກເຮົາໄດ້ມີການປັບປຸງບັນດາແຫຼ່ງທ່ອງທ່ຽວຕ່າງໆໃຫ້ມີຄວາມພ້ອມທຸກດ້ານໂດຍຮ່ວມກັບປະຊາຊົນຊາວແຂວງສະຫວັນນະເຂດເປັນເຈົ້າພາບທີ່ດີເພື່ອຕ້ອນຮັບແຂກທີ່ຈະມາທ່ຽວຊົມ ຊຶ່ງພວກເຮົາໄດ້ຈັດແບ່ງບັນດາການທ່ອງທ່ຽວອອກເປັນ 3 ປະເພດເຊັ່ນ: ທ່ອງທ່ຽວທຳມະຊາດ,ປະຫວັດສາດ ແລະ ວັດທະນະທໍາ ລວມມີ 116 ແຫ່ງ. ນອກຈາກນັ້ນ ຍັງມີເທສະການຕ່າງໆເຊັ່ນ: ເທສະການສະຫວັນສຸກສັນຫັນສາ, ເທສະການໃຫ້ອາຫານລີງ, ເທສະການປະກວດອາຫານ, ເທສະການຜົນຜະລິດກະສິກໍາ ແລະ ອື່ນໆ.
ສ່ວນທາງດ້ານທີ່ພັກກໍ່ສາມາດຕ້ອນຮັບນັກທ່ອງທ່ຽວໄດ້ ມີທັງໂຮງແຮມທີ່ໄດ້ມາດຕະຖານສາກົນ ຫຼື ນັກທ່ອງທ່ຽວຕ້ອງການພັກແບບໂຮມສະເຕກໍມີໄວ້ຮອງຮັບ. ການມາທ່ຽວສະຫວັນນະເຂດຕ້ອງໄດ້ໄປ 3 ໄຫວ້ 4 ເບິ່ງ 5 ຊົມ ໃຫ້ທ່ານເລືອກພິຈະລະນາວ່າຈະໄປໃສ?. 3 ໄຫວ້: ປະກອບມີກາບໄຫວ້ພະທາດອີງຮັງ, ໄຫວ້ພະທາດໂຜ່ນ ແລະ ກາບໄຫວ້ຫໍພະໄຕຣປິດົກ. 4 ເບິ່ງ: ມີເບິ່ງຫໍພິພິທະພັນແຂວງ, ເບິ່ງຫໍພິພິທະພັນໄດໂນເສົາ, ເບິ່ງຫໍພິພິທະພັນຮ່ວມສຳພັນສູ້ຮົບລາວ-ຫວຽດນາມ, ເບິ່ງມໍລະດົກສະຖານໜອງເຮືອທອງ ແລະ 5 ຊົມ: ຊົມຕົວເມືອງເກົ່າປະຫວັດສາດ-ໜອງຫຼົ່ມປ່າສະຫງວນດົງນາຕາດ ນະຄອນໄກສອນພົມວິຫານ, ຊົມລີງ-ປາຝາ-ຝາຍສູຍ ຈຳພອນ, ທ່ຽວຊົມໂອງມັ່ງ-ນົກຍາງຂາວ-ແຫຼ່ງຂຸດຄົ້ນກະດູກໄດໂນເສົາຊົນນະບູລີ, ຊົມໂນນຫີນດ້າງ-ໂພນຊ້າງສານ-ສີສະເກດສວນຕານ-ຜາສາດຫີນໄຊພູທອງ ແລະ ທ່ຽວຊົມພະທາດນາງລາວ-ພະເຈົ້າອົງແສນ-ຫີນສາມເສົ້າ-ນໍ້າເກົ້າແຄວ ວິລະບູລີ.
ພ້ອມນີ້ ທ່ານ ໂພສີສ້ອຍ ກຸທິລາດ ຍັງຮຽກຮ້ອງມາຍັງພໍ່ແມ່ປະຊາຊົນ, ນັກທຸລະກິດ ຜູ້ປະກອບການດ້ານຕ່າງໆຮ່ວມກັນເປັນເຈົ້າພາບທີ່ດີເພື່ອຕ້ອນຮັບແຂກບ້ານແຂກເມືອງດ້ວຍໄມຕີຈິດມິດຕະພາບອັນດູດດື່ມເຮັດແນວໃດໃຫ້ນັກທ່ອງທ່ຽວປະທັບໃຈມາແລ້ວຢາກມາອີກ.
(ຂ່າວ: ສະຫວັນ)
ການນຳເມືອງປະທຸມພອນ ສຳຫຼວດຫ້ວຍໂຕະໂໝະ ຊຸກຍູ້ໃຫ້ເປັນແຫຼ່ງທ່ອງທ່ຽວ
ໃນວັນທີ 20 ມິຖຸນານີ້, ທ່ານ ກິ່ງແກ້ວ ນະວະພົມ ປະທານຄະນະກຳມະການປົກຄອງເມືອງປະທຸມພອນ ພ້ອມດ້ວຍພາກສ່ວນທີ່ກ່ຽວຂ້ອງ ແລະ ອົງການປົກຄອງບ້ານຄອນນ້ອຍ ໄດ້ຮ່ວມກັບຜູ້ຈັດການສວນນ້ຳທິດາເພັດ ຈັດກິດຈະກຳລ່ອງເຮືອສຳຫຼວດຕາມສາຍນ້ຳຫ້ວຍໂຕະໂໝະ ບ້ານຫຼັກສີ່ສິບ ເມືອງປະທຸມພອນ ແຂວງຈຳປາສັກ ເພື່ອສຶກສາ ແລະ ປະເມີນຄວາມເປັນໄປໄດ້ ໃນການພັດທະນາແຫຼ່ງທ່ອງທ່ຽວໃນຮູບແບບພະຈົນໄພ ແລະ ທ່ອງທ່ຽວທາງທຳມະຊາດຂອງເມືອງ.
ຄໍາເຫັນ