ອັດຕະປື - ກວາງຫງາຍ ແລກປ່ຽນບົດຮຽນ ດ້ານກະສິກຳ

ການພົບປະແລກປ່ຽນບົດຮຽນ ໃນຄັ້ງນີ້ ທັງສອງຝ່າຍ ໄດ້ລາຍງານສະພາບການພັດທະນາເສດຖະກິດ-ສັງຄົມ ຂອງແຂວງ ໃຫ້ກັນ ແລະ ກັນຮັບຊາບ, ພ້ອມທັງຕີລາຄາສູງຕໍ່ສະມາຄົມຊາວກະສິກອນ ແຂວງກວາງຫງາຍ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ແຂວງອັດຕະປື ໃນຄັ້ງນີ້ ເຊິ່ງເປັນຂີດໝາຍ ອັນສຳຄັນປະກອບສ່ວນເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ, ກໍຄືສອງ ແຂວງອັດຕະປື - ກວາງຫງາຍ ເວົ້າລວມ ສະເພາະ ແມ່ນພະແນກກະສິກໍາ ແລະ ສິ່ງແວດລ້ອມແຂວງອັດຕະປື ກັບ ສະມາຄົມຊາວກະສິກອນ ແຂວງກວາງຫງາຍ ໃຫ້ເຂົ້າສູ່ລວງເລິກ, ພ້ອມນີ້ ສອງຝ່າຍ ຍັງໄດ້ສົນທະນາ, ປຶກສາຫາລື, ແລກປ່ຽນບົດຮຽນຮ່ວມກັນ, ຖືເປັນອີກໂອກາດດີ ທີ່ສ້າງສາຍພົວພັນອັນສະໜິດສະໜົມ ກໍຄື ການສ້າງຄູ່ຮ່ວມຍຸດທະສາດຊ່ວຍເຫຼືອເຊິ່ງກັນ ແລະ ກັນ ດ້ານການຜະລິດກະສິກຳ, ດ້ານເສດຖະກິດ-ການຄ້າ ເປັນຕົ້ນ: ການປູກເຂົ້າ, ປູກກາເຟ, ພັດທະນາພື້ນທີ່ກຸ່ມການຜະລິດ, ການຊ່ວຍເຫຼືອດ້ານການພັດທະນາບຸກຄາລາກອນການລຽ້ງສັດ - ການປະມົງ ເພື່ອເປັນການສ້າງລາຍຮັບທີ່ຍືນຍົງ ໃຫ້ປະຊາຊົນ ຮ່ວມກັນ ເພື່ອປະກອບສ່ວນເຮັດໃຫ້ການພັດທະນາເສດຖະກິດ-ສັງຄົມ ຂອງສອງແຂວງ ໃຫ້ມີຄວາມເຂັ້ມແຂງ, ຍືນຍົງຕໍ່ໄປ, ແນໃສ່ເຮັດໃຫ້ປະຊາຊົນຂອງສອງແຂວງ ມີການພັດທະນາ ໃນຮູບແບບທີ່ທັນສະໄໝ ຂຶ້ນເປັນກ້າວໆ.

ໂອກາດດັ່ງກ່າວ ທາງສະມາຄົມຊາວກະສິກອນ ແຂວງກວາງຫງາຍ ຍັງໄດ້ເຄື່ອນໄຫວຢ້ຽມຢາມ ພື້ນຖານການຜະລິດ ກະສິກໍາ ປູກພືດຜັກໃນເຮື່ອນຮົ່ມ ແລະ ກຸ່ມສະຫະກອນການຜະລິດເຫຼ້າຂາວ ຢູ່ເມືອງໄຊເສດຖາຕື່ມອີກ.

ຂ່າວ: ທິດປະສົງ