ຖະແຫຼງການຮ່ວມຊີ້ໃຫ້ເຫັນວ່າ: ຄວາມເຄັ່ງຕຶງໃນຕາເວັນອອກກາງໄດ້ເພີ່ມຄວາມກົດດັນຢ່າງຫຼວງຫຼາຍຕໍ່ທ່າອ່ຽງເສດຖະກິດຂອງພາກພື້ນ, ໃນຂະນະທີ່ບັນດາປະເທດສະມາຊິກຍັງສືບຕໍ່ຕິດຄວາມຜັນຜວນຢ່າງໃກ້ຊິດກ່ຽວກັບຕະຫຼາດການເງິນ ແລະ ອັດຕາແລກປ່ຽນ. ພ້ອມທັງດຳເນີນມາດຕະການທີ່ເໝາະສົມໂດຍອີງໃສ່ສະພາບການຂອງແຕ່ລະປະເທດ.
ໜັງສືພິມ Kyodo News ລາຍງານວ່າ: ການສົນທະນາດັ່ງກ່າວໄດ້ຈັດຂຶ້ນຢູ່ນອກກອງປະຊຸມປະຈໍາປີຂອງທະນາຄານພັດທະນາອາຊີ (ADB) ຊຶ່ງຈັດຂຶ້ນເປັນເວລາ 4 ວັນ ເລີ່ມແຕ່ວັນທີ 3 ພຶດສະພາ ຜ່ານມາ.
ທ່ານ ຊັດສຶກິ ຄາຕາຍາມະ ລັດຖະມົນຕີກະຊວງການເງິນຍີ່ປຸ່ນ ຊຶ່ງຮ່ວມເປັນປະທານກອງປະຊຸມ ໄດ້ກ່າວວ່າ: ບັນດາປະເທດສະມາຊິກໄດ້ເຫັນດີເປັນເອກະພາບກ່ຽວກັບຄວາມຕ້ອງການທີ່ຈະເສີມສ້າງການຮ່ວມມືໃນພາກພື້ນ ແລະ ໃຫ້ຄຳໝັ້ນສັນຍາວ່າຈະສະໜັບສະໜູນຊຶ່ງກັນ ແລະ ກັນ ໃນການກະຈາຍຄວາມສ່ຽງດ້ານລະບົບຕ່ອງໂສ້ການສະໜອງພະລັງງານ.
ຖະແຫຼງການດັ່ງກ່າວຍັງໄດ້ເນັ້ນໜັກເຖິງຄວາມສຳຄັນຂອງລະບົບຫຼາຍຝ່າຍ ແລະ ສະໜັບສະໜູນລະບົບການຄ້າສາກົນທີ່ອີງໃສ່ກົດລະບຽບ, ຍຸຕິທຳ, ເປີດເຜີຍ, ໂປ່ງໃສ ແລະ ບໍ່ມີການຈຳແນກ.
ຖະແຫຼງການດັ່ງກ່າວຍັງໄດ້ລະບຸວ່າ: ບັນດາປະເທດສະມາຊິກມີຄວາມພ້ອມທີ່ຈະຮັບມືກັບຄວາມຜັນຜວນຂອງອັດຕາແລກປ່ຽນຫຼັງຈາກຄ່າເງິນເຢນຫຼຸດລົງຢ່າງໄວວາ, ໂດຍເຈົ້າໜ້າທີ່ຍີ່ປຸ່ນລາຍງານວ່າໄດ້ເຂົ້າແຊກແຊງຕະຫຼາດເງິນຕາໃນອາທິດທີ່ຜ່ານມາ.
ນອກຈາກນັ້ນ, ຜູ້ເຂົ້າຮ່ວມກອງປະຊຸມໄດ້ເຕືອນວ່າ: ການຂັດແຍ້ງທີ່ຍືດເຍື້ອໃນຕາເວັນອອກກາງອາດຈະມີຜົນສະທ້ອນຢ່າງກວ້າງຂວາງ ແລະ ຍາວນານ, ບໍ່ພຽງແຕ່ຕໍ່ຕະຫຼາດພະລັງງານເທົ່ານັ້ນ ແຕ່ຍັງຕໍ່ຕົ້ນທຶນການຜະລິດ, ການຂົນສົ່ງ, ລາຄາອາຫານ ແລະ ຂະແໜງການທ່ອງທ່ຽວອີກດ້ວຍ.
ຄໍາເຫັນ