ໃນລະຫວ່າງວັນທີ 15-20 ມັງກອນຜ່ານມາ; ເພື່ອສົ່ງເສີມການທ່ອງທ່ຽວໃນພາກພື້ນອາຊຽນ ເພື່ອພັດທະນາເສດຖະກິດ ແລກປ່ຽນວັດທະນະທຳ ແລະ ການຮ່ວມມືລະຫວ່າງປະເທດສະມາຊິກອາຊຽນ, ສົ່ງເສີມວັດທະນະທຳ ແລະ ເອກະລັກຂອງອາຊຽນ, ພັດທະນາການທ່ອງທ່ຽວໃຫ້ມີຄວາມຍືນຍົງ, ສ້າງໂອກາດສຳລັບນັກທ່ອງທ່ຽວ ແລະ ນັກທຸລະກິດ ເພື່ອດຶງດູດນັກທ່ອງທ່ຽວຈາກທົ່ວໂລກ.
ທ່ານ ນາງ ພອນວິໄລ ແກ້ວມີໄຊ ຜູ້ຈັດການທົ່ວໄປບໍລິສັດທ່ອງທ່ຽວເອັນຈອຍ ມີສໍານັກງານຕັ້ງຢູ່ ບ້ານຈອມແຈ້ງເມືອງສີສັດຕະນາກນະຄອນຫຼວງວຽງຈັນ ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນວ່າ: ບໍລິສັດທ່ອງທ່ຽວຂອງພວກເຮົາເປັນບໍລິສັດໜຶ່ງໃນ 15 ບໍລິສັດທ່ອງທ່ຽວທີ່ໄດ້ຮັບໂອກາດຈາກອົງການທ່ອງທ່ຽວມາເລເຊຍໃຫ້ມາຮ່ວມງານ Travex 2025 ແລະ ATF ງານດັ່ງກ່າວເປັນງານທີ່ມີຄວາມສຳຄັນໃນການຊຸກຍູ້ສົ່ງເສີມການທ່ອງທ່ຽວບັນດາປະເທດສະມາຊິກອາຊຽນດ້ວຍກັນ,ເປີດໂອກາດໃຫ້ບັນດາບໍລິສັດທຸລະກິດທ່ອງທ່ຽວໄດ້ພົບປະປຶກສາຫາລື ແລກປ່ຽນຂໍ້ມູນການທ່ອງທ່ຽວຊຶ່ງກັນ ແລະ ກັນ. ດັ່ງນັ້ນ, ຕົນໃນນາມບໍລິສັດທ່ອງທ່ຽວເອັນຈອຍກໍໄດ້ມີໂອກາດມາເຈລະຈາແລກປ່ຽນຂໍ້ມູນກັບບັນດາບໍລິສັດທ່ອງທ່ຽວທີ່ເຂົ້າມາຮ່ວມງານ Travex ໂດຍໄດ້ນໍາເອົາຂໍ້ມູນທີ່ໄດ້ຮັບໃນງານ ນໍາໄປເຜີຍແຜ່ໂຄສະນາໃຫ້ລູກຄ້າໄດ້ຮັບຮູ້ເຖິງສະຖານທີ່ທ່ອງທ່ຽວແຫ່ງໃໝ່ຂອງບັນດາປະເທດອາຊຽນ ທີ່ຕົນໄດ້ຮ່ວມເຈລະນາ ໂດຍສະເພາະແມ່ນທ່ອງທ່ຽວຂອງປະເທດມາເລເຊຍເພື່ອຈະເປີດຕະຫຼາດໃໝ່ ລະຫວ່າງມາເລຍເຊຍ ແລະ ລາວ ພ້ອມທັງແລກປ່ຽນຮ່ວມກັນ ນໍາເອົານັກທ່ອງທ່ຽວລາວມາທ່ຽວມາເລເຊຍ, ນັກທ່ອງທ່ຽວມາເລເຊຍມາທ່ຽວລາວ ກໍຄືບັນດານັກທ່ອງທ່ຽວປະເທດອາຊຽນໃຫ້ຫຼາຍຂຶ້ນ.ເພື່ອຮ່ວມກັນຊຸກຍູ້ສົ່ງເສີມການທ່ອງທ່ຽວຊຶ່ງກັນ ແລະ ກັນ.
ທ່ານໄດ້ກ່າວຕື່ມອີກວ່າ: ບໍລິສັດແມ່ນໄດ້ເປີດບໍລິການນໍາທ່ຽວມາໄດ້ 20 ກວ່າປີ ໄດ້ບໍລິການທ່ອງທ່ຽວທັງພາຍໃນ ແລະ ຕ່າງປະເທດ ເປັນຕົ້ນແມ່ນຮັບນັກທ່ອງທ່ຽວ ສ ເກົາຫຼີ, ສປ ຈີນ ແລະ ທ່ອງທ່ຽວເອີຣົບມາທ່ຽວລາວ ທັງໄດ້ບໍລິການທັງລົດທ່ອງທ່ຽວຕ່າງປະເທດ. ປັດຈຸບັນບໍລິສັດໄດ້ມີການຂະຫຍາຍຕົວຫຼາຍຖ້າທຽບໃສ່ເມື່ອກ່ອນ ໂດຍໄດ້ສະແດງໃຫ້ເຫັນ ມາຮອດປັດຈຸບັນນີ້ ມີລົດນໍາທ່ຽວຈໍານວນ 21ຄັນ; ໃນນີ້ ລົດເມ 45 ບ່ອນນັ່ງ 14 ຄັນ; ລົດເມ ວີໄອພີ 28 ບ່ອນນັ່ງ ມີ 4 ຄັນ ແລະ ລົດຕູ້ ວີໄອພີ ມີ 3 ຄັນ ໄວ້ບໍລິການລູກຄ້າ ແລະ ໃຫ້ເຊົ່າຊຶ່ງໃນການບໍລິການ ແມ່ນເນັ້ນໃນການບໍລິການເອົາໃຈໃສ່ທີ່ດີ ອໍານວຍຄວາມສະດວກໃຫ້ແກ່ລູກຄ້າ ໃຫ້ມີຄວາມປະທັບໃຈທີ່ມາໃຊ້ບໍລິການຂອງພວກເຮົາ. ພ້ອມນີ້ກໍຍັງມີໂຮງແຮມເປີດບໍລິການໄວ້ຮອງຮັບນັກທ່ອງທ່ຽວຢູ່ເມືອງວັງວຽງແຂວງວຽງຈັນ ມີຊື່ວ່າໂຮງແຮມແນັດຕີ້ພອຍ, ຕັ້ງຢູ່ໃກ້ກັບນໍ້າຊອງສາມາດຊົມທິວທັດທໍາມະຊາດທົ່ວເມືອງວັງວຽງ ຊຶ່ງມີຫ້ອງພັກຫຼາຍກວ່າ 50 ຫ້ອງແລະສາມາດຈັດງານລ້ຽງໄດ້ຢ່າງສະດວກ. ສຳລັບປີ 2024 ຜ່ານມາ ຊຶ່ງເປັນປີທ່ອງທ່ຽວລາວນັ້ນ ເຫັນວ່າກິດຈະກຳດັ່ງກ່າວສາມາດດຶງດູດນັກທ່ອງທ່ຽວເຂົ້າມາທ່ອງທ່ຽວ ສປປ ລາວຫຼາຍຂຶ້ນກວ່າເກົ່າ ສະແດງໃຫ້ເຫັນວ່າປີ 2024 ບໍລິສັດຂອງພວກເຮົາກໍໄດ້ຮັບນັກທ່ອງທ່ຽວເຂົ້າມາທ່ອງທ່ຽວ ສປປ ລາວ ຢ່າງມີບັນຍາກາດຟົດຟື້ນດີ ປະກອບສ່ວນເຂົ້າໃນການຟື້ນຟູເສດຖະກິດພາຍໃນປະເທດຫຼາຍຂຶ້ນ.
ຄໍາເຫັນ