ບົມບີ 80 ລ້ານໜ່ວຍທີ່ຍັງຕົກຄ້າງຄາດຄະເນຕ້ອງໃຊ້ເວລາເປັນຮ້ອຍປີ ເພື່ອກວດກູ້ໃຫ້ໝົດສິ້ນ

ທ່ານ ບຸນເພັງ ສີສະຫວັດ ຫົວໜ້າຄະນະກໍາມະການຄຸ້ມຄອງແຫ່ງຊາດເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ໄດ້ເປີດເຜີຍຂໍ້ມູນຕໍ່ສື່ມວນຊົນໃນວັນທີ 17 ກັນຍາຜ່ານມາ ທີ່ຫໍປະຊຸມແຫ່ງຊາດ ວ່າ: ສປປ ລາວ ເປັນປະເທດທີ່ຖືກທໍາລາຍຢ່າງໜັກໜ່ວງ ໂດຍມີຜົນກະທົບໜັກຈາກການຖິ້ມລະເບີດທາງອາກາດຫຼາຍກວ່າ 580,000 ຖ້ຽວ ລວມນໍ້າໜັກລະເບີດຫຼາຍກວ່າ 2 ລ້ານໂຕນ. ໃນນັ້ນມີລະເບີດບົມບີທັງໝົດ 17 ຊະນິດ,ໃນຈຳນວນດັ່ງກ່າວມີລະເບີດລູກຫວ່ານຊະນິດ BBL-26 ຖືເປັນອັນຕະລາຍທີ່ສຸດ ເພາະໃນ 1 ຮາງ ບັນຈຸລູກລະເບີດຍ່ອຍເຖິງ 670 ໜ່ວຍ ແລະ ມີລັດສະໝີທໍາລາຍລ້າງກວ້າງຮອດ 100x100 ແມັດ.

ຈາກການປະເມີນທາງດ້ານວິຊາການ, ມີລະເບີດບົມບີປະມານ 280 ລ້ານໜ່ວຍຖືກຖິ້ມລົງມາ, ແຕ່ມີອັດຕາບໍ່ແຕກສູງເຖິງ 30% (ປະມານ 80 ລ້ານໜ່ວຍ) ທີ່ຍັງຝັງໂຕຢູ່ຕາມພື້ນດິນ, ທົ່ງໄຮ່-ທົ່ງນາແລະ ເຂດທີ່ຢູ່ອາໄສຂອງປະຊາຊົນ. ເຖິງວ່າຕະຫຼອດໄລຍະ 30 ປີຜ່ານມາ (ນັບແຕ່ປີ 1996 ເປັນຕົ້ນມາ), ເຈົ້າໜ້າທີ່ສາມາດກວດກູ້ ແລະ ທໍາລາຍລະເບີດໄດ້ 1.3 ລ້ານກວ່າໜ່ວຍ. ໃນເນື້ອທີ່ 100,000 ກວ່າເຮັກຕາ ແຕ່ກໍຖືເປັນພຽງສ່ວນນ້ອຍເທົ່ານັ້ນ.ຍ້ອນໂຄງສ້າງຂອງລະເບີດບົມບີມີຄວາມແໜ້ນໜາ ແລະ ທົນທານຕໍ່ສະພາບແວດລ້ອມ ຈຶ່ງເຮັດໃຫ້ມັນຍັງຄົງມີປະສິດທິພາບທໍາລາຍລ້າງ ແລະ ເປັນໄພຂົ່ມຂູ່ຕໍ່ຊີວິດຂອງປະຊາຊົນຢ່າງຕໍ່ເນື່ອງ. ເຈົ້າໜ້າທີ່ປະເມີນວ່າດ້ວຍອັດຕາການກວດກູ້ໃນປັດຈຸບັນ ອາດຕ້ອງໃຊ້ເວລາອີກ "ຮ້ອຍໆປີ" ເພື່ອທໍາລາຍລະເບີດທີ່ຕົກຄ້າງໃຫ້ໝົດສິ້ນ.

ທ່ານ ບຸນເພັງ ສີສະຫວັດ ກ່າວຕື່ມອີກວ່າ:ເພື່ອຫຼຸດຜ່ອນອຸບັດເຫດ, ທາງຄະນະກໍາມະການຄຸ້ມຄອງແຫ່ງຊາດ ໄດ້ເລັ່ງລົງໂຄສະນາເຜີຍແຜ່ຄວາມຮູ້ໃຫ້ກັບປະຊາຊົນ ແລະ ເດັກນ້ອຍໃນທົ່ວປະເທດ, ພ້ອມທັງແຈ້ງເຕືອນໃຫ້ລະມັດລະວັງ ກິດຈະກໍາທີ່ມີຄວາມສ່ຽງ ເຊັ່ນ: ການດັງໄຟ, ການຂຸດດິນທໍາການຜະລິດແລະ ການບໍ່ໄປແຕະຕ້ອງ ຫຼື ເຄື່ອນຍ້າຍລະເບີດ ເມື່ອພົບເຫັນໂດຍເດັດຂາດ.

ທ່ານ ນາງ ລູນ່າ ຄວານເດີ ບຣູສແກະ ພະນັກງານວິຊາການປະຈຳໂຄງການຂອງອົງການຊ່ວຍເຫຼືອຈາກປະຊາຊົນນອກແວ (Norwegian People's Aid - NPA) ປະຈໍາລາວ ໄດ້ໃຫ້ສຳພາດຕໍ່ນັກຂ່າວ ກ່ຽວກັບຄວາມຮູ້ສຶກຂອງຕົນເອງ ແລະ ຄວາມອັນຕະລາຍຂອງລະເບີດບໍ່ທັນແຕກທີ່ຍັງຕົກຄ້າງຢູ່ໃນປະເທດລາວ ໂດຍໄດ້ສະແດງຄວາມຮັກ, ຄວາມເຫັນໃຈ ແລະ ເສົ້າສະຫຼົດໃຈຕໍ່ສະພາບຄວາມເປັນຈິງ ທີ່ປະຊາຊົນລາວຍັງຕ້ອງປະເຊີນກັບຄວາມອັນຕະລາຍຈາກລະເບີດຕົກຄ້າງໃນຊີວິດປະຈໍາວັນ. ຈາກການລົງພື້ນທີ່ໄດ້ພົບກັບຜູ້ປະຕິບັດໜ້າທີ່ ລວມທັງຜູ້ໄດ້ຮັບຜົນກະທົບໃນແຂວງຕ່າງໆ ເຊັ່ນ: ແຂວງຈໍາປາສັກ, ອັດຕະປື, ເຊກອງ ແລະ ແຂວງຊຽງຂວາງ. ໂອກາດນີ້,ທ່ານ ນາງ ລູນ່າ ຄວານເດີ ບຣູສແກະ ຮຽກຮ້ອງໃຫ້ທົ່ວໂລກ ສືບຕໍ່ສະໜັບສະໜູນທຶນຮອນໄລຍະຍາວ ເພື່ອໃຫ້ການດໍາເນີນວຽກງານເກັບກວດກູ້ລະເບີດມີຄວາມຕໍ່ເນື່ອງ ແລະ ຍືນຍົງ ພ້ອມທັງຮຽນຮູ້ ແລະ ເຂົ້າເຖິງຄວາມຕ້ອງການທີ່ແທ້ຈິງຂອງຊຸມຊົນໃນທ້ອງຖິ່ນໃຫ້ດີຂຶ້ນ.