ຈໍາປາສັກ ທາບທາມບຸກຄະລາກອນເຂົ້າໃນຄະນະບໍລິຫານງານພັກແຂວງ ສະໄໝທີ IX ຮອບທີ 2

ໃນກອງປະຊຸມ, ສະຫາຍ ພູໂຂງ ພິລາເພັດ ຫົວໜ້າກົມພັກ ຄະນະຈັດຕັ້ງສູນກາງພັກ ໄດ້ຜ່ານມາດຕະຖານ, ເງື່ອນໄຂຜູ້ທີຈະສະໝັກເຂົ້າໃນໂຄງປະກອບຄະນະບໍລິຫານງານພັກແຂວງ ສະໄໝທີ IX ຊຶ່ງມີ 5 ດ້ານ ຄື: ມາດຕະຖານດ້ານຄຸນທາດການເມືອງ, ດ້ານຄຸນສົມບັດສິນທຳປະຕິວັດ ແລະ ແບບແຜນດໍາລົງຊີວິດ, ດ້ານຄວາມຮູ້ - ຄວາມສາມາດ, ດ້ານແບບແຜນການນໍາພາ - ວິທີເຮັດວຽກ ແລະ ດ້ານສຸຂະພາບ. ນອກນີ້, ຍັງມີມາດຕະຖານສະເພາະ ຄື: ຕ້ອງມີທັດສະນະຫຼັກໝັ້ນການເມືອງໜັກແໜ້ນ, ມີຄວາມເປັນເອກະພາບສູງຕໍ່ແນວທາງປ່ຽນແປງໃໝ່ຂອງພັກ, ບໍ່ຫວັ່ນໄຫວຄອນແຄນຕໍ່ສະພາບການຕ່າງໆ ທີ່ເກີດຂຶ້ນຢູ່ພາຍໃນ ແລະ ຕ່າງປະເທດ; ມີຄວາມບໍລິສຸດສັດຊື່ຕໍ່ພັກ, ຕໍ່ການຈັດຕັ້ງ, ຕໍ່ປະຊາຊົນ ແລະ ໝູ່ຄະນະ, ມີແບບແຜນດໍາລົງຊີວິດປອດໃສ, ບໍ່ສວຍໃຊ້ຖານະຕຳ ແໜງ, ໜ້າທີ່ ເພື່ອຜົນປະໂຫຍດສ່ວນຕົວ, ຄອບຄົວ, ຍາດພີ່ນ້ອງ, ພັກພວກ, ທ້ອງຖິ່ນ ແລະ ຊົນເຜົ່າຂອງຕົນ, ມີຄວາມຮູ້ດ້ານທິດສະດີການເມືອງ, ວຽກງານກໍ່ສ້າງພັກ ແລະ ວຽກງານພະນັກງານ, ຮູ້ເຕົ້າໂຮມຄວາມສາມັກຄີ, ຮູ້ປຸກລະດົມຂົນຂວາຍມະຫາຊົນ, ຮູ້ຈັດຕັ້ງນໍາພາພະນັກງານ, ສະມາຊິກພັກ ປະຕິບັດໜ້າທີ່ການເມືອງຢູ່ຂະແໜງ ການ ແລະ ທ້ອງຖິ່ນຕົນແຕ່ລະໄລຍະ; ສາມາດອໍານວຍຄວບຄຸມວຽກງານ, ມີປະສົບການໃນໜ້າທີ່ວຽກງານຂົງເຂດທີ່ຕົນຮັບຜິດຊອບ, ມີຄວາມສາມາດແກ້ໄຂກໍລະນີຕ່າງໆຢ່າງຄ່ອງແຄ້ວຖືກຕ້ອງ ແລະ ທັນເວລາ. ນອກນີ້, ຍັງໄດ້ຜ່ານເງື່ອນໄຂຜູ້ທີ່ຈະເປັນກຳມະການຄະນະບໍລິຫານງານພັກແຂວງ ເທື່ອທຳອິດ, ມາດຕະຖານຂອງກຳມະການປະຈຳພັກແຂວງ, ກຳມະການຄະນະບໍລິຫານງານພັກແຂວງ, ມາດຕະຖານຂອງເລຂາ, ຮອງເລຂາຄະນະບໍລິຫານງານພັກແຂວງ, ມາດຕະຖານ - ເງື່ອນໄຂສະເພາະຂອງປະທານ - ຮອງແະມານຄະນະກວດກາພັກແຂວງ ຕື່ມອີກ.

ສະຫາຍ ອາລຸນໄຊ ສູນນະລາດ ໄດ້ເນັ້ນໜັກໃຫ້ຜູ້ເຂົ້າຮ່ວມກໍາແໜ້ນມາດຕະຖານລວມ ແລະ ມາດຕະຖານສະເພາະຂອງຜູ້ທີ່ຈະຄັດເລືອກເຂົ້າໃສ່ໂຄງປະກອບບຸກຄະລາກອນຄະນະບໍລິຫານງານພັກແຂວງ ພ້ອມທັງຍົກສູງຄວາມຮັບຜິດຊອບໜ້າທີ່ການເມືອງຂອງຕົນ ໃນຖານະເປັນສະມາຊິກພັກ ຕ້ອງແຍກແຍະ ເລື່ອງສ່ວນລວມ ແລະ ເລື່ອງສ່ວນຕົວ ເພື່ອເລືອກເອົາບຸກຄົນທີ່ມີມາດຕະຖານ ແລະ ເງື່ອນໄຂໂດດເດັ່ນກວ່າໝູ່ ເຂົ້າໃນໂຄງປະກອບບຸກຄະລາກອນຄະນະບລິຫານງານພັກແຂວງ ສະໄໝທີ IX.. ຈາກນັ້ນ, ຄະນະຮັບຜິດຊອບບຸກຄະລາກອນ ຈາກຄະນະຈັດຄັ້ງສູນກາງພັກ ກໍໄດ້ຜ່ານລະບຽບການທາບທາມ ແລະ ດໍາເນີນການປ່ອນບັດທາບທາມຮອບທີ 2. (ຂ່າວ-ພາບ: ທູນທອງໃຈ)