 |
ຈີນ ແລະ ອາຊຽນ ເປັນຄູ່ການຄ້າໃຫຍ່ອັນດັບໜຶ່ງຂອງກັນ ແລະ ກັນມາເປັນເວລາຫຼາຍປີຕິດຕໍ່ກັນ, ໄດ້ກາຍເປັນຄູ່ຮ່ວມຜົນປະໂຫຍດທີ່ແໜ້ນແຟ້ນ. ເນື່ອງໃນໂອກາດສັນຍາການພົວພັນຄູ່ຮ່ວມເສດຖະກິດແບບຮອບດ້ານໃນພາກພື້ນ ຫຼື RCEP ມີຜົນບັງຄັບໃຊ້ຄົບຮອບ 4 ປີ, ການຄ້າຂາເຂົ້າ-ຂາອອກລະຫວ່າງຈີນກັບປະເທດສະມາຊິກ RCEP ໃນ 4 ເດືອນທຳອິດຂອງປີນີ້ໄດ້ເພີ່ມຂຶ້ນ 20% ເມື່ອທຽບໃສ່ໄລຍະດຽວກັນຂອງປີກາຍ. ໃນນັ້ນ, ປະເທດສະມາຊິກອາຊຽນແມ່ນໂດດເດັ່ນທີ່ສຸດ, ຕົ້ນທຶນດ້ານການຄ້າໃນພາກພື້ນໄດ້ຫຼຸດລົງຢ່າງຕໍ່ເນື່ອງ, ຕ່ອງໂສ້ອຸດສາຫະກຳ ແລະ ຕ່ອງໂສ້ການສະໜອງມີຄວາມໜຽວແໜ້ນເພີ່ມຂຶ້ນຢ່າງຈະແຈ້ງ. ຈາກການຫຼຸດພາສາຮອດການອຳນວຍຄວາມສະດວກໃນການແຈ້ງຜ່ານດ່ານ, ຈາກລະບຽບວ່າດ້ວຍແຫຼ່ງກຳເນີດຂອງສິນຄ້າຮອດການດຳເນີນທຸລະກິດທາງເອເລັກໂຕຣນິກ ແລະ ການຮ່ວມມືດ້ານຊັບສິນທາງປັນຍາ, RCEP ເຮັດໃຫ້ການຮ່ວມມືລະຫວ່າງຈີນ-ອາຊຽນ ກ້າວເຂົ້າສູ່ລວງເລິກຢ່າງບໍ່ຢຸດຢັ້ງ ແລະ ໄດ້ກາຍເປັນປັດໄຈໝັ້ນທ່ຽງທີ່ສາມາດຕ້ານທານຄວາມບໍ່ແນ່ນອນຈາກພາຍນອກ.
 |
ການເປີດປະຕູສູ່ພາຍນອກດ້ານລະບຽບການໄດ້ເພີ່ມພະລັງຂັບເຄື່ອນທີ່ໝັ້ນທ່ຽງເຂົ້າໃນການຮ່ວມມືລະຫວ່າງສອງຝ່າຍ. ການເຊັນອະນຸສັນຍາຍົກລະດັບການຄ້າເສລີຈີນ-ອາຊຽນ 3.0 ໄດ້ເປີດກວ້າງການຮ່ວມມືໃນຂົງເຂດໃໝ່ຕ່າງໆເຊັ່ນ: ເສດຖະກິດດີຈີຕອນ, ການພັດທະນາສີຂຽວ, ການເຊື່ອມໂຍງເຊື່ອມຈອດດ້ານຕ່ອງໂສ້ການສະໜອງ ແລະ ອື່ນໆ ຊຶ່ງໄດ້ຊຸກຍູ້ການເຊື່ອມຕໍ່ຢ່າງເລິກເຊິ່ງໃນດ້ານລະບຽບການ, ມາດຕະຖານ ແລະ ອື່ນໆ ທັງໄດ້ກ້າວຂ້າມຂອບເຂດດັ້ງເດີມຂອງການຄ້າສິນຄ້າປະເພດຈັບຕ້ອງໄດ້ ຊຶ່ງສອດຄ່ອງກັບແນວຄິດຂອງຈີນທີ່ວ່າ “ເອົາການເປີດປະຕູສູ່ພາຍນອກດ້ານລະບຽບການເຂົ້າແທນທີ່ສົງຄາມພາສີ” ໃນລະດັບສູງ. ສອງຝ່າຍໄດ້ຮ່ວມກັນສ້າງແລວທາງຊິ້ນສ່ວນເອເລັກໂຕຣນິກ ແລະ ຮ່ວມມືກັນໃນຕ່ອງໂສ້ອຸດສາຫະກຳພະລັງງານໃໝ່ ເພື່ອຍົກລະດັບອຸດສາຫະກຳຂອງພາກພື້ນໃຫ້ສູງຂຶ້ນດ້ວຍການຜະລິດແບບອັດສະລິຍະຂອງຈີນ, ຫຼຸດຕົ້ນທຶນໂດຍລວມໃຫ້ຕ່ຳລົງ ແລະ ຍົກກຳລັງແຂ່ງຂັນທົ່ວໂລກໃຫ້ສູງຂຶ້ນ.
 |
ການເຊື່ອມຕໍ່ດ້ານພື້ນຖານໂຄງລ່າງໄດ້ປູພື້ນຖານທີ່ໝັ້ນແກ່ນໃຫ້ແກ່ການຮ່ວມມືກັນ. ປະລິມານການຂົນສົ່ງສິນຄ້າຜ່ານເສັ້ນທາງລົດໄຟລາວ - ຈີນ ໄດ້ເພີ່ມຂຶ້ນຫຼາຍກວ່າ 10% ຕໍ່ປີ, ການສ້າງຊ່ອງທາງໃໝ່ທາງບົກ ແລະ ທາງທະເລຢູ່ພາກຕາເວັນຕົກຂອງຈີນ, ການຂົນສົ່ງທາງອາກາດ ແລະ ການຂົນສົ່ງທາງນ້ຳໄດ້ເຮັດໃຫ້ບັນດາຜະລິດຕະພັນສົດເຊັ່ນ: ດອກໄມ້ສົດ, ໝາກໄມ້ສົດເປັນຕົ້ນສາມາດໄດ້ຮັບການຂົນສົ່ງ ແລະ ແຈ້ງຜ່ານດ່ານຢ່າງວ່ອງໄວ. ນອກນີ້, ຫຼາຍປະເທດໄດ້ຍົກເວັ້ນວີຊາຕໍ່ຈີນ ຊຶ່ງໄດ້ຊຸກຍູ້ການແລກປ່ຽນດ້ານບຸກຄະລາກອນ, ການຮ່ວມມືດ້ານການຝຶກອົບຮົມສີມື ແລະ ການຍົກລະດັບການຄ້າການບໍລິການລະຫວ່າງສອງຝ່າຍ, ເຮັດໃຫ້ເກີດການເຊື່ອມໂຍງລະຫວ່າງປະຊາຊົນສອງຝ່າຍເພີ່ມຂຶ້ນ ຂະນະທີ່ການພົວພັນດ້ານເສດຖະກິດການຄ້າລະຫວ່າງສອງຝ່າຍມີຄວາມສະດວກສະບາຍຍິ່ງຂຶ້ນ.
 |
ເມື່ອຜະເຊີນໜ້າກັບຄວາມບໍ່ແນ່ນອນຈາກພາຍນອກ, ຕະຫຼາດຂະໜາດໃຫຍ່ພິເສດຂອງຈີນ ແລະ ກຸ່ມອຸດສາຫະກຳຄົບວົງຈອນຂອງປະເທດສະມາຊິກອາຊຽນໄດ້ຊ່ວຍຊູຍູ້ໜູນກັນ. ຄວາມຕ້ອງການພາຍໃນຂອງຈີນທີ່ມີປະຊາກອນ 1.4 ຕື້ຄົນໄດ້ເປັນຕະຫຼາດທີ່ໝັ້ນທ່ຽງໃຫ້ແກ່ຜະລິດຕະພັນກະສິກຳ, ວັດຖຸດິບ ແລະ ຜະລິດຕະພັນອຸດສາຫະກຳຂອງປະເທດສະມາຊິກອາຊຽນ; ອາຊຽນແມ່ນພາກພື້ນແກນກາງສຳລັບຕ່ອງໂສ້ອຸດສາຫະກຳ ແລະ ການຮ່ວມມືດ້ານກຳລັງການຜະລິດຂອງຈີນ.
ທ່າມກາງສະພາບການທີ່ເກີດການປ່ຽນແປງເລື້ອຍໆຂອງການຄ້າທົ່ວໂລກ, ຈີນກຳລັງທັບມ້າງກຳແພງຕ່າງໆດ້ວຍການຮ່ວມມືຫຼາຍຝ່າຍ, ໃນນັ້ນ ການຮ່ວມມືຈີນ-ອາຊຽນແມ່ນເສົາຄ້ຳແກນກາງໃນຂະບວນການດັ່ງກ່າວ. ໃນອະນາຄົດ, ສອງຝ່າຍຈະສືບຕໍ່ລົງເລິກການຮ່ວມມືພາຍໃຕ້ຂອບ RCEP ແລະ ເຂດການຄ້າເສລີຈີນ-ອາຊຽນ 3.0 ເພື່ອເຮັດໃຫ້ທ່າແຮງດ້ານທີ່ຕັ້ງ, ຜົນປະໂຫຍດດ້ານລະບຽບການແລະ ຄວາມສາມາດບົ່ມຊ້ອນດ້ານຕະຫຼາດກາຍເປັນພະລັງຂັບເຄື່ອນການພັດທະນາທີ່ຍືນຍົງເພື່ອໃຫ້ຈີນ ແລະ ອາຊຽນສາມາດຂຽນປະຫວັດສາດໜ້າໃໝ່ທີ່ໂດດເດັ່ນກວ່າເກົ່າໃຫ້ແກ່ຄວາມຈະເລີນຮຸ່ງເຮືອງຂອງພາກພື້ນອາຊີ-ປາຊີຟິກກໍຄືການເປີດປະຕູສູ່ພາຍນອກ ແລະ ການຮ່ວມມືໃນຂອບເຂດທົ່ວໂລກ.
ຄໍາເຫັນ