ຈີນ-ອາຊຽນ ຮ່ວມກັນສະເຫຼີມສະຫຼອງບຸນກຸດຈີນຢ່າງເບີກບານມ່ວນຊື່ນ

ໃນວັນທີ 5 ກຸມພາ 2026 ນີ້, ຫ້ອງການຖະແຫຼງຂ່າວຂອງອົງການການປົກຄອງເຂດປົກຄອງຕົນເອງເຜົ່າຈ້ວງກວາງຊີ, ພະແນກວັດທະນະທຳ ແລະ ທ່ອງທ່ຽວຂອງເຂດປົກຄອງຕົນເອງເຜົ່າຈ້ວງກວາງຊີ, ຮ່ວມກັນປະຕິບັດງານໂດຍສູນສື່ສານສາກົນກວາງຊີ ຂອງສຳນັກຂ່າວໜັງສືພິມລາຍວັນກວາງຊີ, ສະຖານີວິທະຍຸ ແລະ ໂທລະພາບກວາງຊີ, ກຸ່ມບໍລິສັດພັດທະນາການທ່ອງທ່ຽວກວາງຊີ ແລະ ໄດ້ຮັບການສະໜັບສະໜູນຈາກຄະນະທູຕານູທູດຈີນປະຈຳອາຊຽນ, ຄະນະທູຕານູທູດມາເລເຊຍປະຈຳອາຊຽນ ແລະ ກອງເລຂາອາຊຽນ. ໄດ້ຈັດງານຄານີວານມະໂຫລານວັດທະນະທໍາກຸດຈີນ 2026 ຢູ່ທີ່ສຳນັກງານໃຫຍ່ອາຊຽນ ນະຄອນຫຼວງຈາກາຕາ ອິນໂດເນເຊຍ ຢ່າງສຳເລັດຜົນ.

ເຂົ້າຮ່ວມງານມີບັນດາທູຕານູທູດ 11 ປະເທດອາຊຽນ ແລະ ຄູ່ຮ່ວມເຈລະຈາພາຍນອກເຊັ່ນ: ຣັດເຊຍ, ອັງກິດ ອົສຕາລີ, ສ ເກົາຫຼີ, ເບຣຊິນ ແລະ ເຈົ້າໜ້າທີ່ອາວຸໂສຂອງກອງເລຂາອາຊຽນ, ສື່ມວນຊົນຫຼັກຂອງບັນດາປະເທດອາຊຽນ, ນັກສຶກສາ ແລະ ຄູ-ອາຈານ ມະຫາວິທະຍາໄລ ອິນໂດເນເຊຍ, ຕາງໜ້າວິສາຫະກິດຈີນປະຈຳອິນໂດເນເຊຍ ຫຼາຍກວ່າ 250 ຄົນ ເຂົ້າຮ່ວມ.

ການສະເຫຼີມສະຫຼອງບຸນກຸດຈີນຈັດຂຶ້ນຢູ່ສຳນັກງານໃຫຍ່ອາຊຽນເປັນຄັ້ງທຳອິດ. ແຂກທີ່ເຂົ້າຮ່ວມໄດ້ຮ່ວມກັນພັນລະນາວິໄສທັດອັນສົດໃສຄຽງຄູ່ກັບການພັດທະນາໂລກາພິວັດຢ່າງເລິກເຊິ່ງ, ບຸນກຸດຈີນທີ່ມີມາແຕ່ບູຮານນະການ ບໍ່ພຽງແຕ່ເປັນບຸນແຫ່ງການເຕົ້າໂຮມຄວາມສາມັກຄີຂອງຊາວຈີນເທົ່ານັ້ນ, ຫາກຍັງກາຍເປັນສາຍພົວພັນໃໝ່ ສຳລັບການແລກປ່ຽນ ແລະ ສົນທະນາກັນລະຫວ່າງອາລະຍະທຳຕ່າງໆ. ບຸນກຸດຈີນບົ່ງບອກເຖິງຄວາມໝາຍການຄົງຕົວໃນໂລກ ເຊັ່ນວ່າ: ການຢູ່ຮ່ວມກັນຢ່າງກົມກຽວກັນ ແບບເພິ່ງພາອາໄສກັນ ຊຶ່ງກົງກັບຄ່ານິຍົມທີ່ບັນດາປະເທດອາຊຽນຄົ້ນຫາຄື ຄວາມສາມັກຄີ ແລະ ການຮ່ວມມື. ແນວຄິດການພັດທະນາແບບຍືນຍົງການສົ່ງສິ່ງເກົ່າ ແລະ ການຕ້ອນຮັບສິ່ງໃໝ່ ແມ່ນກົງກັບວິໄສທັດທີ່ສົດໃສ ແລະ ຄວາມຈະເລີນຮຸ່ງເຮືອງຮ່ວມກັນຢູ່ພາກພື້ນອາຊຽນ.

ທ່ານ ດຣ. ກາວ ກິມຮຸນ ເລຂາທິການໃຫຍ່ອາຊຽນ ໄດ້ກ່າວຄຳເຫັນຜ່ານວິດີໂອວ່າ: ເມື່ອກາລະເວລາຜ່ານໄປ, ບຸນກຸດຈີນໄດ້ກາຍເປັນງານບຸນສະເຫຼີມສະຫຼອງໃນທົ່ວໂລກ. ການທີ່ບຸນກຸດຈີນໄດ້ຖືກຈັດເຂົ້າໃນບັນຊີລາຍຊື່ຕົວແທນມໍລະດົກວັດທະນະທຳນາມມະທຳຂອງມວນມະນຸດ ໂດຍອົງການອຸຍແນັສໂກ ສະຫະປະຊາຊາດ ໃນປີ 2024 ໄດ້ສະແດງໃຫ້ເຫັນເຖິງເນື້ອໃນອັນອຸດົມສົມບູນຂອງບຸນກຸດຈີນທີ່ເປັນມໍລະດົກອັນລ້ຳຄ່າຂອງມວນມະນຸດ. ຫຼາຍປະເທດສະມາຊິກອາຊຽນກໍໄດ້ສະເຫຼີມສະຫຼອງບຸນກຸດຈີນ ຫຼື ບຸນປີໃໝ່ ປະຕິທິນຈັນທະຄະຕິຈີນ ຊຶ່ງເປັນການເຕືອນໃຈໃຫ້ເຫັນເຖິງສາຍພົວພັນຄວາມຮັກແພງຊຶ່ງກັນ ແລະ ກັນ ທີ່ຢູ່ເໜືອຂອບເຂດຊາຍແດນປະເທດດ້ວຍກັນ. ອາຊຽນກໍຈະສືບຕໍ່ມຸ່ງໝັ້ນໃສ່ການສ້າງປະຊາຄົມທີ່ມີຄວາມພາກພູມໃຈໃນເອກະລັກຂອງຕົນ, ຕັ້ງໜ້າປະຕິບັດພາລະໜ້າທີ່ໃນການປົກປັກຮັກສາ, ສືບສານ ແລະ ປະດິດສ້າງວັດທະນະທຳ, ສິລະປະ ແລະ ມູນເຊື້ອທີ່ດີງາມ, ພ້ອມທັງຊຸກຍູ້ການພັດທະນາອຸດສາຫະກຳວັດທະນະທຳທີ່ມີການປະດິດສ້າງ. ເນື່ອງໃນໂອກາດຕ້ອນຮັບປີມະເມຍ ຫຼື ປີມ້ານີ້, ຫວັງວ່າບັນດາທ່ານຈົ່ງຮ່ວມກັນຕ້ອນຮັບຄວາມສະຫງ່າງາມ, ຄວາມມີຊີວິດຊີວາ, ກຳລັງຂັບເຄື່ອນທີ່ໂຕມ້ານຳເອົາມາ ແລະ ຮ່ວມກັນຕ້ອນຮັບ ແລະ ກ້າວໄປສູ່ປີໃໝ່ ດ້ວຍຄວາມຫວັງ, ຄວາມອົດທົນ ແລະ ຄວາມສາມັກຄີ.

ທ່ານ ວາງ ສິງ ເອກອັກຄະລັດຖະທູດ ສປ ຈີນ ປະຈຳ ອາຊຽນ ກ່າວວ່າ: ບຸນກຸດຈີນ ເປັນສັນຍາລັກແຫ່ງການເຕົ້າໂຮມຄວາມສາມັກຄີ, ຄວາມມ່ວນຊື່ນ ແລະ ຄວາມປອງດອງກັນ, ການສະເຫຼີມສະຫຼອງບຸນກຸດຈີນຮ່ວມກັນ, ແມ່ນຕົວແບບອັນມີຊີວິດຊີວາທີ່ໃຫ້ເຫັນເຖິງຄວາມຮັກແພງລະຫວ່າງປະຊາຊົນ, ການເຊື່ອມໂຍງທາງດ້ານອາລິຍະທຳ ແລະ ການຢູ່ຮ່ວມກັນຢ່າງກົມກຽວກັນ ລະຫວ່າງຈີນ-ອາຊຽນ. ປະຊາຄົມຮ່ວມຊາຕາກຳຈີນ-ອາຊຽນ ນັບມື້ນັບມີຄວາມແໜ້ນແຟ້ນຂຶ້ນ ແລະ ໄດ້ສ່ອງແສງໃຫ້ເຫັນເຖິງພະລັງແຮງແຫ່ງຊີວິດອັນແຂງແຮງ ຊຶ່ງໄດ້ສ້າງເປັນແບບຢ່າງໃຫ້ແກ່ການສ້າງປະຊາຄົມຮ່ວມຊາຕາກຳຂອງມວນມະນຸດ. ທ່ານໄດ້ກ່າວເນັ້ນວ່າ: ກວາງຊີ ເປັນບ່ອນເຊື່ອມຕໍ່ ແລະ ເຊື່ອມໂຍງທີ່ສຳຄັນ ໃນການແລກປ່ຽນ ແລະ ການຮ່ວມມືມິດຕະພາບດ້ວຍກັນ ລະຫວ່າງຈີນ-ອາຊຽນ ຊຶ່ງໄດ້ເສີມຂະຫຍາຍບົດບາດການເປັນປະຕູ + ເຄື່ອງຈັກຂັບເຄື່ອນ ໃນການພົວພັນຄູ່ຮ່ວມຍຸດທະສາດຮອບດ້ານລະຫວ່າງຈີນ-ອາຊຽນ. ໃນປີໃໝ່ນີ້ ຂໍອວຍພອນຢ່າງຈິງໃຈວ່າ ການຮ່ວມມືຈີນ-ອາຊຽນຈົ່ງມີຫຼາຍຂຶ້ນ ແລະ ມິດຕະພາບລະຫວ່າງປະຊາຊນຈີນ-ລາວ ຈົ່ງມີຄວາມສະໜິດແໜ້ນຂຶ້ນຢ່າງບໍ່ຢຸດຢັ້ງດັ່ງຝູງມ້າທີ່ແລ່ນໄວ ແລະ ບໍ່ມີສິ່ງໃດທີ່ຈະກີດຂວາງໄດ້.

ທ່ານ ຫຼີພັນ ຫົວໜ້າຫ້ອງການຖະແຫຼງຂ່າວ, ອົງການການປົກຄອງ, ເຂດປົກຄອງຕົນເອງເຜົ່າຈ້ວງ ກວາງຊີ ສປ ຈີນ ກ່າວຄຳເຫັນວ່າ: ກວາງຊີພູມໃຈໃນການເປັນເຈົ້າພາບຈັດງານທີ່ສຳນັກງານໃຫຍ່ອາຊຽນ. ໃນຖານະທີ່ເປັນເຈົ້າພາບຈັດງານວາງສະແດງຈີນ-ອາຊຽນ ປະຈຳກວາງຊີ ເປັນເວທີທີ່ສຳຄັນສຳລັບການຮ່ວມມືດ້ານເສດຖະກິດ ແລະ ການຄ້າ ແລະ ການແລກປ່ຽນວັດທະນະທຳດ້ວຍ ລະຫວ່າງຈີນ-ອາຊຽນ. ກວາງຊີກຳລັງຮ່ວມມືກັບບັນດາປະເທດອາຊຽນ ເພື່ອສ້າງເສັ້ນທາງການພັດທະນາ AI, ຄົ້ນຄວ້າ ແລະ ພັດທະນາຢູ່ປັກກິ່ງ, ຊຽງໄຮ້, ແລະ ກວາງໂຈ່ວ + ເຊື່ອມໂຍງຢູ່ກວາງຊີ + ນຳໃຊ້ຢູ່ອາຊຽນ" ແລະ ສ້າງລະບົບຕ່ອງໂສ້ການຄ້າໃໝ່ຢ່າງຫ້າວຫັນ, ຜະລິດຢູ່ອາຊຽນ + ແຈກຢາຍໃນກວາງຊີ + ຈຳໜ່າຍໃນທົ່ວປະເທດຈີນ. ໃນປີ 2026, ກວາງຊີຈະຮ່ວມມືກັບທຸກວົງການຂອງອາຊຽນ ເພື່ອຮ່ວມຈິດຮ່ວມໃຈ ແລະຮ່ວມແຮງຮ່ວມໃຈກັນກ້າວໄປຂ້າງໜ້າ, ເຮັດໃຫ້ຄວາມຮັກແພງຖານບ້ານໃກ້ເຮືອນຄຽງ ລະຫວ່າງຈີນ ແລະ ອາຊຽນ ມີຄວາມໜັກແໜ້ນຂຶ້ນໃນປະຫວັດສາດອັນຍາວນານ.