ປີ 2025, ກໍເປັນປີທີ່ ສປປ ລາວ ສະເຫຼີມສະຫຼອງຫຼາຍເຫດການທີ່ສໍາຄັນ ເຊັ່ນ: ວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 70 ປີ, ວັນສະຖາປະນາປະເທດ ຄົບຮອບ 50 ປີ ແລະ ວັນເກີດຂອງ ປະທານ ໄກສອນ ພົມວິຫານ ຄົບຮອບ 105 ປີ, ໂດຍມີຫຼາຍຜົນງານໜ້າພາກພູມໃຈ ເຊັ່ນ: ການເມືອງມີສະຖຽນລະພາບ, ການປ້ອງກັນຊາດ-ປ້ອງກັນຄວາມສະຫງົບ ໄດ້ຮັກສາໄວ້ໄດ້ຢ່າງໝັ້ນຄົງ, ການພົວພັນຕ່າງປະເທດ ໄດ້ຮັບການເປີດກວ້າງ, ການເຕີບໂຕດ້ານເສດຖະກິດ ສືບຕໍ່ຮັກສາຈັງຫວະຂະຫຍາຍຕົວ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງນັບມື້ນັບດີຂຶ້ນ.
ສະຫາຍເອກອັກຄະລັດຖະທູດ ແຫ່ງ ສສ ຫວຽດນາມ ຍັງໄດ້ສະແດງຄວາມປິຕິຊົມຊື່ນຕໍ່ກັບບັນດາຜົນງານທີ່ ພັກ, ລັດ ແລະ ປະຊາຊົນ ລາວ ຍາດມາໄດ້ໃນຕະຫຼອດໄລຍະ 50 ປີຜ່ານມາ; ພ້ອມນີ້, ກໍຮູ້ສຶກດີໃຈ ແລະ ພູມໃຈເປັນຢ່າງຍິ່ງທີ່ເຫັນວ່າສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານຫວຽດນາມ-ລາວນັບມື້ນັບພັດທະນາຢ່າງເລິກເຊິ່ງ, ກວ້າງຂວາງ, ແທດຈິງ ແລະ ມີປະສິດທິຜົນ, ນໍາເອົາຜົນປະໂຫຍດອັນໃຫຍ່ຫຼວງໃຫ້ແກ່ທັງສອງປະເທດ. ການພົວພັນດ້ານການເມືອງນັບມື້ນັບສະໜິດແໜ້ນ ແລະ ໄວ້ເນື້ອເຊື່ອໃຈສູງ ຊຶ່ງເປັນບົດບາດຫຼັກແຫຼ່ງໃນການກໍານົດທິດທາງທັງໝົດຂອງການພົວພັນລະຫວ່າງສອງປະເທດ. ການຮ່ວມມືດ້ານເສດຖະກິດໄດ້ມີບາດກ້າວບຸກທະລຸ, ຫວຽດນາມ ສືບຕໍ່ແມ່ນໜຶ່ງໃນບັນດາປະເທດທີ່ມີການລົງທຶນ ແລະ ການຄ້າລາຍໃຫຍ່ທີ່ສຸດຢູ່ລາວດ້ວຍຍອດມູນຄ່າການລົງທຶນຫຼາຍກວ່າ 5,8 ຕື້ໂດລາ. ການເຊື່ອມຈອດລະຫວ່າງສອງປະເທດ, ໂດຍສະເພາະການເຊື່ອມຈອດດ້ານການຄົມມະນາຄົມແມ່ນໄດ້ຮັບການຊຸກຍູ້ສົ່ງເສີມ; ພວກເຮົາມີຄວາມປິຕິຊົມຊື່ນເປັນຢ່າງຍິ່ງທີ່ເຫັນວ່າເມື່ອບໍ່ດົນມານີ້, ຫວຽດນາມ ແລະ ລາວ ໄດ້ສົມທົບກັນຈັດຕັ້ງພິທີເປີດນໍາໃຊ້ທຽບທ່າໝາຍເລກ 3 ຂອງທ່າເຮືອສາກົນຫວູງອ໋າງ ແຂວງຮ່າຕິ້ງ ຫວຽດນາມ ຊຶ່ງແມ່ນການປະຕິບັດໃຫ້ເປັນຮູບປະທໍາຍຸດທະສາດຂອງພັກ ແລະ ລັດຖະບານລາວໃນການນຳເອົາປະເທດທີ່ບໍ່ມີຊາຍແດນຕິດກັບທະເລກາຍເປັນປະເທດເຊື່ອມຈອດກັບບັນດາປະເທດໃນພາກພື້ນດ້ວຍທາງທະເລ. ການຮ່ວມມືດ້ານການສຶກສາ - ກໍ່ສ້າງ, ພັດທະນາຊັບພະຍາກອນມະນຸດສືບຕໍ່ເພີ່ມຂຶ້ນທັງດ້ານປະລິມານ ແລະ ຄຸນນະພາບ. ການຮ່ວມມືດ້ານການປ້ອງກັນຊາດ, ການປ້ອງກັນຄວາມສະຫງົບ ແລະ ການຕ່າງປະເທດນັບມື້ນັບແໜ້ນແຟ້ນຍິ່ງຂຶ້ນ ແລະ ໄດ້ຖືວ່າເປັນເສົາຄ້ຳໃນການພົວພັນລະຫວ່າງສອງປະເທດ, ປະກອບສ່ວນຮັກສາຄວາມສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມຂອງແຕ່ລະປະເທດ, ຍົກສູງຖານະບົດບາດ ແລະ ອິດທິພົນຊື່ສຽງຂອງທັງສອງປະເທດຫວຽດນາມ ແລະ ລາວໃນພາກພື້ນ ແລະ ສາກົນ. ວຽກງານໂຄສະນາ, ສຶກສາໃຫ້ແກ່ປະຊາຊົນ, ພິເສດແມ່ນຄົນຮຸ່ນໜຸ່ມຂອງສອງປະເທດກ່ຽວກັບມູນເຊື້ອ ແລະ ຄວາມສຳຄັນພິເສດຂອງສາຍພົວພັນຫວຽດນາມ - ລາວ ໄດ້ຮັບຄວາມເອົາໃຈໃສ່ເປັນພິເສດ ແລະ ປະຕິບັດເປັນປະຈຳເພື່ອປົກປັກຮັກສາເຮັດໃຫ້ຊັບສົມບັດລວມອັນລ້ຳຄ່າທີ່ໄດ້ຮັບການກໍ່ຕັ້ງດ້ວຍເລືອດເນື້ອ, ເຫື່ອແຮງ ແລະ ຄຸນງາມຄວາມດີຂອງພະນັກງານ, ນັກຮົບ ແລະ ປະຊາຊົນຫວຽດນາມ - ລາວບໍ່ຮູ້ວ່າເທົ່າໃດຄົນ ມີຄວາມອຸດົມສົມບູນຂຶ້ນຕື່ມ.
ເພື່ອບັນລຸໄດ້ບັນດາຜົນງານຂ້າງເທິງ ແມ່ນໄດ້ເພິ່ງການນໍາພາ - ຊີ້ນໍາຂອງການນໍາຂັ້ນສູງຂອງສອງພັກ, ສອງປະເທດ, ການສະໜັບສະໜູນຂອງບັນດາກະຊວງ, ຂະແໜງການ, ວິສາຫະກິດ ແລະ ປະຊາຊົນສອງປະເທດ. ຫວນຄືນໄລຍະປະຫວັດສາດທີ່ສະຫງ່າລາສີຜ່ານມານັ້ນ, ພວກເຮົາມີຄວາມພາກພູມໃຈເປັນຢ່າງຍິ່ງຕໍ່ຂະບວນວິວັດແຫ່ງການສ້າງຕັ້ງ ແລະ ຂະຫຍາຍຕົວຂອງສາຍພົວພັນພິເສດ, ຫາຍາກລະຫວ່າງສອງປະເທດ ຊຶ່ງເປັນສາຍພົວພັນທີ່ໄດ້ຮັບການພັດທະນາຢ່າງບໍ່ຢຸດຢັ້ງຈາກສາຍພົວພັນມິດຕະພາບທີ່ເປັນມູນເຊື້ອ, ສະໜິດສະໜົມມາເປັນສາຍພົວພັນພິເສດໂດຍປະທານ ໂຮ່ຈິມິນ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະປະທານ ສຸພານຸວົງ ທີ່ແສນເຄົາລົບຮັກເປັນຜູ້ກໍ່ຕັ້ງໂດຍກົງ, ໄດ້ຮັບການເພີ່ມພູນຄູນສ້າງຈາກບັນດາການນຳຮຸ່ນສືບທອດ ແລະ ປະຊາຊົນສອງປະເທດ, ໂດຍຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍນາໆປະການ, ສາຍພົວພັນດັ່ງກ່າວໄດ້ກາຍເປັນສາຍພົວພັນທີ່ເປັນຕາຍ, ເປັນແບບຢ່າງ, ສັດຊື່, ບໍລິສຸດ ແລະ ຫາຍາກໃນການພົວພັນສາກົນ, ເປັນສາຍພົວພັນທີ່ມີລັກສະນະກົດເກນ, ເປັນປັດໄຈຮັບປະກັນໃຫ້ໄຊຊະນະຂອງພາລະກິດການປະຕິວັດຂອງແຕ່ລະປະເທດ ແລະ ເປັນຊັບສົມບັດລວມອັນລ້ຳຄ່າຂອງທັງສອງຊາດ ແລະ ເປັນແຫຼ່ງກໍາລັງແຮງອັນໃຫຍ່ຫຼວງໃຫ້ພາລະກິດສ້າງສາ ແລະ ປົກປັກຮັກສາປະເທດຊາດຂອງແຕ່ລະປະເທດພວກເຮົາ.
ປັດຈຸບັນນີ້, ຫວຽດນາມ ແລະ ລາວ ພວມຢູ່ຕໍ່ໜ້າບັນດາກາລະໂອກາດໃໝ່; ຄຽງຄູ່ກັນນັ້ນ, ກໍປະສົບກັບສິ່ງທ້າທາຍບໍ່ໜ້ອຍຈາກທັງດ້ານອັດຕະວິໄສ ແລະ ພາວະວິໄສ. ແຕ່ເຊື່ອໝັ້ນວ່າ, ບໍ່ວ່າສອງປະເທດປະສົບຄວາມຫຍຸ້ງຍາກໃຫຍ່ຊໍ່າໃດ, ສອງປະເທດຫວຽດນາມ ແລະ ລາວຈະມີຄວາມສາມັກຄີ, ຄຽງບ່າຄຽງໄຫຼ່ກັນຍາດແຍ່ງເອົາກາລະໂອກາດເປັນຢ່າງດີ, ຜ່ານຜ່າບັນດາສິ່ງທ້າທາຍເພື່ອສືບຕໍ່ຍາດໄດ້ຫຼາຍຜົນງານໃໝ່,ໃຫຍ່ຫຼວງກວ່າເກົ່າໃນພາລະກິດປ່ຽນແປງໃໝ່, ຮ່ວມກັນເດີນກ້າວໄປສູ່ເສັ້ນທາງກໍ່ສ້າງສັງຄົມນິຍົມ. ສືບຕໍ່ເພີ່ມພູນຄູນສ້າງໃຫ້ແກ່ສາຍພົວພັນຫວຽດນາມ - ລາວ “ເລິກເຊິ່ງກວ່າຮົ່ງຮ່າ-ແມ່ຂອງ, ສູງກວ່າພູຜາ, ຍາວຍິ່ງກວ່າແມ່ນໍ້າ, ກວ້າງຍິ່ງກວ່າທະເລຫຼວງ, ງາມຍິ່ງກວ່າເດືອນເພັງ, ຫອມຫວນຍິ່ງກວ່າດອກໄມ້ທີ່ຫອມທີ່ສຸດ” ຄືດັ່ງທີ່ປະທານ ໂຮ່ຈິມິນ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະປະທານ ສຸພານຸວົງ ທີ່ແສນເຄົາລົບຮັກໄດ້ປາດຖະໜາ.
ພັກ, ລັດ ແລະ ປະຊາຊົນຫວຽດນາມ ຍາມໃດກໍມີຄວາມຮັບຮູ້ຢ່າງເລິກເຊິ່ງວ່າໃນພາລະກິດປົກປັກຮັກສາ ແລະ ສ້າງສາປະເທດຊາດຂອງຕົນ, ເພື່ອໃຫ້ຫວຽດນາມມີພາລະກິດອັນໜັກແໜ້ນ, ມີກໍາລັງບົ່ມຊ້ອນ, ມີຖານະບົດບາດ ແລະ ອິດທິພົນຊື່ສຽງໃນວົງຄະນາຍາດສາກົນຄືທຸກວັນນີ້, ໄປຄຽງຄູ່ກັບຄວາມມານະພະຍາຍາມບຸກໜ້າບືນຕົວຂອງຕົນເອງແລ້ວ, ຍາມໃດກໍໄດ້ຮັບການສະໜັບສະໜູນ, ການຊ່ວຍເຫຼືອອັນລ້ຳຄ່າຈາກເພື່ອນມິດສາກົນ, ໂດຍສະເພາະແມ່ນການຊ່ວຍເຫຼືອທີ່ໃຫຍ່ຫຼວງ, ໝົດຈິດໝົດໃຈ, ມີປະສິດທິຜົນຂອງພັກ, ລັດ ແລະ ປະຊາຊົນລາວອ້າຍນ້ອງ. ໃນໂອກາດອັນສະຫງ່າລາສີນີ້, ສະຫາຍ ຫງວຽນ ມິງ ເຕິມ ກໍໄດ້ຕາງໜ້າພັກ, ລັດ ແລະ ປະຊາຊົນຫວຽດນາມ, ສະແດງຄວາມຂອບອົກຂອບໃຈຢ່າງຈິງໃຈ ແລະ ຄວາມຮູ້ບຸນຄຸນຢ່າງເລິກເຊິ່ງມາຍັງພັກ, ລັດ ແລະ ປະຊາຊົນລາວອ້າຍນ້ອງທີ່ຍາມໃດກໍໄດ້ໃຫ້ຄວາມສາມັກຄີ, ສະໜັບສະໜູນ ແລະ ໃຫ້ການຊ່ວຍເຫຼືອແກ່ຫວຽດນາມຕະຫຼອດມາ; ຂອບອົກຂອບໃຈມາຍັງບັນດາປະເທດ, ເພື່ອນມິດສາກົນທີ່ເວລາໃດກໍບິແບ່ງ, ຊ່ວຍເຫຼືອຫວຽດນາມກໍຄືໃຫ້ການສະໜັບສະໜູນແກ່ການພັດທະນາຂອງສາຍພົວພັນຫວຽດນາມ - ລາວ.
ເພື່ອຊຸກຍູ້ໃຫ້ສາຍພົວພັນ ຫວຽດນາມ-ລາວ ໄດ້ມີຫຼາຍພາກສ່ວນປະກອບສ່ວນ, ສະຫາຍເອກອັກຄະລັດຖະທູດ ແຫ່ງ ສສ ຫວຽດນາມ ຍັງໄດ້ກ່າວສະແດງຄວາມປາຖະໜາວ່າ: ວົງຄະນາຍາດສາກົນຈະສືບຕໍ່ໃຫ້ການສະໜັບສະໜູນ ແລະ ຊ່ວຍເຫຼືອຫຼາຍກວ່າເກົ່າເພື່ອໃຫ້ຫວຽດນາມ ກໍຄືສາຍພົວພັນ ຫວຽດນາມ - ລາວພັດທະນາຢ່າງໝັ້ນຄົງ, ປະກອບສ່ວນຢ່າງຕັ້ງໜ້າເຂົ້າໃນການກໍ່ສ້າງປະຊາຄົມອາຊຽນ, ເພື່ອສັນຕິພາບ, ຄວາມໝັ້ນຄົງ, ສະຖຽນລະພາບ, ການຮ່ວມມື ແລະ ການພັດທະນາຢູ່ໃນພາກພື້ນ ແລະ ໃນໂລກ.
ຄໍາເຫັນ