EU ຮຽກຮ້ອງບໍລິສັດເຕັກໂນໂລຊີຂະໜາດໃຫຍ່ຕ້ອງມີການປ້ອງກັນ ເພື່ອຕໍ່ສູ້ກັບຂ່າວປອມ

ຂ່າວສານຫວຽດນາມລາຍງານວ່າ: ກ່ອນການເລືອກຕັ້ງລັດຖະສະພາເອີຣົບ ໃນເດືອນມິຖຸນາທີ່ຈະມາເຖິງນີ້, ສະຫະພາບເອີຣົບ (EU) ຮຽກຮ້ອງໃຫ້ ບໍລິສັດ ເຟສບຸກ, ບໍລິສັດ ຕິກ ຕອກ ແລະ ບັນດາບໍລິສັດເຕັກໂນໂລຊີຍັກໃຫຍ່ ປ້ອງກັນຮູບພາບ, ສຽງ ແລະ ວິດີໂອທີ່ສ້າງຂຶ້ນໂດຍປັນຍາປະດິດ (AI) ດັດແປງຊຶ່ງເຮັັັັັັັດໃຫ້ມີຄວາມຄ້າຍຄືກັບບຸກຄົນ, ວັດຖຸ, ສະຖານທີ່, ໜ່ວຍງານ ຫຼື ເຫດການອື່ນໆ ທີ່ມີຢູ່ ແລະ ປອມແປງໃຫ້ບຸກຄົນໜຶ່ງເຫັນວ່າເປັນຂອງແທ້ ຫຼື ເປັນຄວາມຈິງ ຜູ້ໃຫ້ບໍລິການຕ້ອງຕິດປ້າຍຊື່ເນື້ອໃນລັກສະນະແຈ້ງວ່າ: ເນື້ອໃນນີ້ບໍ່ສາມາດເຊື່ອຖືໄດ້ ແລະ ຜູ້ທີ່ໃຊ້ບໍລິການສາມາດເຫັນໄດ້ຢ່າງຊັດເຈນ.
ຂ່າວລະບຸວ່າ: ຄໍາແນະນໍາຂ້າງເທິງນີ້ແມ່ນສ່ວນໜຶ່ງຂອງຄໍາແນະນໍາໃໝ່ທີ່ອອກໂດຍຄະນະກໍາມະການເອີຣົບ (EC) ພາຍໃຕ້ກົດໝາຍວ່າດ້ວຍການບໍລິການດີຈີຕອນ (DSA) ເພື່ອແກ້ໄຂຄວາມສ່ຽງກ່ອນການເລືອກຕັ້ງ, ລວມທັງຂໍ້ມູນທີ່ບໍ່ຖືກຕ້ອງ.
DSA ແມ່ນໜຶ່ງໃນມາດຕະການທີ່ຈະຄວບຄຸມບໍລິສັດເຕັກໂນໂລຊີຂະໜາດໃຫຍ່, ໂດຍສະເພາະທີ່ກ່ຽວຂ້ອງກັບການເຊັນເຊີເນື້ອໃນ. ດັ່ງນັ້ນ, ມາດຕະການນີ້ໄດ້ລວມເອົາ 22 ບໍລິສັດເຕັກໂນໂລຊີຂະໜາດໃຫຍ່ເຂົ້າບັນຊີລາຍຊື່ ທີ່ຈະຕ້ອງໄດ້ຮັບການຄວບຄຸມ: ເຊັ່ນ Instagram, Snapchat, YouTube ແລະ X.
ນັບຕັ້ງແຕ່ ChatGPT ຂອງ OpenAI ປະກົດຕົວໃນທ້າຍປີ 2022, ຄວາມກັງວົນຂອງ EU ກ່ຽວກັບຜົນກະທົບທີ່ເປັນອັນຕະລາຍຈາກເຕັກໂນໂລຊີ AI ກໍເພີ່ມຂຶ້ນ, ໂດຍສະເພາະແມ່ນຄວາມສ່ຽງຂອງຂໍ້ມູນທີ່ບໍ່ຖືກຕ້ອງກ່ຽວກັບການເລືອກຕັ້ງທີ່ເກີດຂຶ້ນໃນ 27 ປະເທດສະມາຊິກຂອງຕົນ ໃນເດືອນມິຖຸນານີ້.
ໃນຄໍາແນະນໍາໃໝ່, EC ຢືນຢັນວ່າ: ບັນດາບໍລິສັດເຕັກໂນໂລຊີໃຫຍ່ຄວນປະເມີນ ແລະ ຫຼຸດຜ່ອນຄວາມສ່ຽງສະເພາະທີ່ກ່ຽວຂ້ອງກັບ AI, ຕົວຢ່າງໂດຍການຕິດປ້າຍຊື່ຢ່າງຊັດເຈນກ່ຽວກັບເນື້ອຫາທີ່ສ້າງໂດຍ AI (ເຊັ່ນ: deepfakes).