ແຮງງານອົບພະຍົບ ມີບົດບາດສຳຄັນຕໍ່ເສດຖະກິດອີຕາລີ

ແຮງງານອົບພະຍົບ ສ້າງມູນຄ່າເພີ່ມປະມານ 177 ຕື້ເອີໂຣ ໃນປີທີ່ຜ່ານມາ ຊຶ່ງກວມເອົາ 9% ຂອງລວມຍອດຜະລິດຕະພັນພາຍໃນ (GDP) ຂອງອີຕາລີ.

ບົດລາຍງານສະແດງໃຫ້ເຫັນວ່າ, ໃນຈຳນວນຜູ້ຢູ່ອາໄສຊາວຕ່າງປະເທດທັງໝົດ 5.4 ລ້ານຄົນໃນອີຕາລີ, ມີການແຈ້ງງານແຮງງານອົບພະຍົບ 2.5 ລ້ານຄົນ ໃນປີ 2024 ຊຶ່ງກວມເອົາ 10.5% ຂອງກຳລັງແຮງງານທັງໝົດ ແລະ ແຮງງານອົບພະຍົບຍັງເຂົ້າມາຕື່ມໃສ່ວຽກໃນຂະແໜງການຕ່າງໆທີ່ປະສົບບັນຫາການຂາດເຂີນແຮງງານທ້ອງຖິ່ນ.

ແຮງງານອົບພະຍົບສ່ວນໃຫຍ່ເຮັດວຽກໃນຕໍາແໜ່ງທີ່ມີຄວາມສໍານິຊໍານານຕໍ່າ ແລະ ບໍ່ໝັ້ນຄົງ, ໂດຍມີໂອກາດກ້າວໜ້າທາງດ້ານອາຊີບທີ່ຈໍາກັດ. ບົດລາຍງານຍັງລະບຸຕື່ມວ່າ, ການຍອມຮັບຄວາມສາມາດຂອງແຮງງານຕ່າງປະເທດສາມາດຊ່ວຍເພີ່ມ GDP ການບໍລິໂພກ ແລະ ລາຍຮັບຂອງລັດຖະບານ. ຜູ້ປະກອບການຊາວຕ່າງປະເທດຍັງມີການຂະຫຍາຍຕົວເຊັ່ນດຽວກັນ. ໂດຍໃນປີຜ່ານມາ, ທຸລະກິດທີ່ຜູ້ອົບພະຍົບເປັນເຈົ້າຂອງ ມີຈໍານວນ 787,000 ແຫ່ງ, ກວມເອົາ 10.6%, ເພີ່ມຂຶ້ນ 24.4% ເມື່ອທຽບກັບປີ 2014. ໃນຂະນະທີ່ຈໍານວນທຸລະກິດທີ່ເປັນຂອງຊາວອີຕາລີຫຼຸດລົງ 5.7% ໃນໄລຍະດຽວກັນ.

ຜູ້ອົບພະຍົບຍັງຊ່ວຍປະກອບສ່ວນໃຫ້ຄວາມດຸ່ນດ່ຽງທາງດ້ານປະຊາກອນຂອງອີຕາລີ, ໂດຍມີອັດຕາການເກີດ9.9 ຕໍ່ 1,000 ຄົນ ທຽບກັບປະຊາກອນອີຕາລີທີ່ມີອັດຕາການເກີດ 6.1 ຕໍ່ 1,000 ຄົນ ແລະ ຍັງມີອັດຕາການເສຍຊີວິດຕໍ່າກວ່າ.

ບົດລາຍງານສະຫຼຸບວ່າ: ຣູມານີ, ອານບານີ, ມາຣົກ ແລະ ຈີນ ຍັງຄົງເປັນຊຸມຊົນຊາວຕ່າງປະເທດທີ່ໃຫຍ່ທີ່ສຸດ ແລະ ຖ້າມີການຄຸ້ມຄອງຢ່າງຖືກຕ້ອງ, ການອົບພະຍົບຖິ່ນຖານຈະສືບຕໍ່ສົ່ງຜົນກະທົບທາງບວກຕໍ່ເສດຖະກິດ, ປະຊາ ກອນ ແລະ ການເງິນຂອງອີຕາລີ.