ໃນໂອກາດດັ່ງກ່າວ, ທ່ານຮອງລັດຖະມົນຕີກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງ ທ່ານ ດາຊຽນ ຊິໂອລົດໃນຄັ້ງນີ້ ພ້ອມທັງໄດ້ຕີລາຄາສູງຕໍ່ການພົວພັນຮ່ວມມືທີ່ດີ ລະຫວ່າງ ສປປ ລາວ ແລະ ຣູມານີ ໃນຕະຫຼອດໄລຍະຜ່ານມາ, ທັງໃນຂອບການຮ່ວມມືສອງຝ່າຍ ແລະ ຫຼາຍຝ່າຍ ກໍຄືການຮ່ວມມືໃນຂົງເຂດວຽກງານ ຝຣັງໂກໂຟນີ. ພ້ອມດຽວກັນນີ້, ທ່ານຮອງລັດຖະມົນຕີກະຊວງການຕ່າງປະເທດ ຍັງໄດ້ແຈ້ງໃຫ້ທາງຝ່າຍ ຣູມານີ ຊາບກ່ຽວກັບ ຜົນສໍາເລັດຂອງການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ ຊຶ່ງລັດຖະບານ ສປປ ລາວ ໃຫ້ບຸລິມະສິດແກ່ການພັດທະນາພື້ນຖານໂຄງລ່າງເພື່ອການເຊື່ອມໂຍງ-ເຊື່ອມຈອດ, ການພັດທະນາຊົນນະບົດເພື່ອຫຼຸດຜ່ອນຄວາມທຸກຍາກຂອງປະຊາຊົນ, ການເຕີບໂຕສີຂຽວ ແລະ ເປັນມິດຕໍ່ສິ່ງແວດລ້ອມ, ການຫັນເປັນດີຈີຕອນ ເພື່ອສ້າງການຫັນປ່ຽນດ້ານການພັດທະນາເສດຖະກິດ-ສັງຄົມຮອບດ້ານ ໄປສູ່ຄຸນນະພາບໃໝ່, ຄວາມໝາຍໝັ້ນເພື່ອນໍາພາປະເທດຊາດອອກຈາກສະຖານະພາບດ້ອຍພັດທະນາ ອີງຕາມການສະເໜີແນະນໍາຂອງອົງການ ສປຊ. ນອກນີ້, ທ່ານຮອງລັດຖະມົນຕີ ຍັງໄດ້ຕີລາຄາສູງຕໍ່ການພົບປະ ແລະ ປຶກສາຫາລື ລະຫວ່າງສອງຝ່າຍໃນຄັ້ງນີ້, ເພື່ອສືບຕໍ່ແລກປ່ຽນ ແລະ ປຶກສາຫາລື ແນໃສ່ເພື່ອເສີມຂະຫຍາຍການຮ່ວມມື ລະຫວ່າງ ສປປ ລາວ ແລະ ຣູມານີ ໃນຊຸມປີຕໍ່ໜ້າ, ລວມທັງການຮ່ວມມືໃນຂອບວຽກງານ ຝຣັງໂກໂຟນີ.
ໃນໂອກາດດຽວກັນນີ້, ທ່ານ ດາຊຽນ ຊິໂອລົດ ກໍໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການພົວພັນຮ່ວມມືທີ່ດີລະຫວ່າງ ຣູມານີ ແລະ ສປປ ລາວ ໃນໄລຍະຜ່ານມາ, ພ້ອມທັງໃຫ້ຄວາມໝາຍໝັ້ນວ່າຈະສືບຕໍ່ຊຸກຍູ້ເພື່ອໃຫ້ມີການເສີມຂະຫຍາຍການຮ່ວມມືໃນຂົງເຂດວຽກງານຕ່າງໆ ລະຫວ່າງສອງປະເທດ ໃນຕໍ່ໜ້າໃຫ້ກວ້າງຂວາງກວ່າເກົ່າ, ລວມທັງ ການຮ່ວມມືໃນຂອບວຽກງານຝຣັງໂກໂຟນີ.
ໃນວັນດຽວກັນນີ້, ທ່ານທີ່ປຶກສາປະທານາທິບໍດີຣູມານີ ຍັງໄດ້ພົບປະກັບ ຄະນະບໍລິຫານສະພາການຄ້າ ແລະ ອຸດສາຫະກໍາ ແຫ່ງຊາດລາວ ເພື່ອປຶກສາຫາລື ກ່ຽວກັບ ການຮ່ວມມືໃນຂົງເຂດການຄ້າ ແລະ ການລົງທຶນ ໃນຕໍ່ໜ້າ. ສປປ ລາວ ແລະ ຣູມານີ ໄດ້ສ້າງສາຍພົວພັນທາງການທູດນຳກັນ ໃນວັນທີ 25 ພະຈິກ 1962. ທັງສອງປະເທດ ຍັງແມ່ນສະມາຊິກ ອົງການ ຝຣັງໂກໂຟນີສາກົນ (OIF) ຫຼື ອົງການຈັດຕັ້ງສາກົນ ສໍາລັບບັນດາປະເທດທີ່ໃຊ້ພາສາຝຣັ່ງ.
(ຂ່າວ: ກຕທ)
ຄໍາເຫັນ