 |
ກອງປະຊຸມດັ່ງກ່າວ, ໄດ້ທົບທວນຄືນການພົວພັນຮ່ວມມືສອງຝ່າຍ ຕະຫຼອດໄລຍະກວ່າ 5 ທົດສະວັດ ຜ່ານມາ ໂດຍສືບຕໍ່ຈັດຕັ້ງປະຕິບັດຜົນຂອງກອງປະຊຸມປຶກສາຫາລືສອງຝ່າຍ ຄັ້ງທີ Iທີ່ ສປປ ລາວ ເປັນເຈົ້າພາບໃນປີ 2023 ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ລາວ-ສິງກະໂປ ໃຫ້ມີບາດກ້າວຂະຫຍາຍຕົວໃໝ່ໃນອະນາຄົດ. ໃນການພົບປະຫາລືຄັ້ງນີ້, ສອງຝ່າຍ ເຫັນດີເປັນເອກະພາບໃນການສືບຕໍ່ຮັດແໜ້ນການພົວພັນຮ່ວມມື ແລະ ຊຸກຍູ້ການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງສອງປະເທດ, ການໄປມາຫາສູ່ຊຶ່ງກັນ ແລະ ກັນ ລະຫວ່າງ ປະຊາຊົນຂອງທັງສອງຊາດ, ການພົວພັນຮ່ວມມືຂອງບັນດາຫົວໜ່ວຍທຸລະກິດ, ການຮ່ວມມືດ້ານການຄ້າ-ການລົງທຶນ, ການສຶກສາ, ການພັດທະນາຊັບພະຍາກອນມະນຸດ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ອື່ນໆ. ພ້ອມດຽວກັນນີ້, ສອງຝ່າຍ ໄດ້ສະແດງຄວາມປິຕິຍິນດີຕໍ່ຜົນສໍາເລັດຂອງການສະເຫຼີມສະຫຼອງ ຄົບຮອບ 50 ແຫ່ງການສ້າງຕັ້ງສາຍພົວພັນການທູດ ລາວ-ສິງກະໂປ ໃນປີ 2024 ທີ່ຜ່ານມາ ຊຶ່ງເປັນການປະກອບສ່ວນອັນສໍາຄັນເຂົ້າໃນການສົ່ງເສີມ ແລະ ຮັດແໜ້ນການພົວພັນຮ່ວມມືສອງຝ່າຍໃຫ້ມີບາດກ້າວຂະຫຍາຍຕົວຍິ່ງໆຂຶ້ນ ໂດຍສະເພາະຂົງເຂດການຄ້າ-ການລົງທຶນ, ຊຶ່ງໃນປັດຈຸບັນ ບັນດາໂຄງການລົງທຶນຂອງສິງກະໂປ ຢູ່ ສປປ ລາວ ກວມເອົາຂະແໜງການຕ່າງໆທີ່ສຳຄັນ ເຊັ່ນ:ພະລັງງານສະອາດ, ກະສິກຳ, ການກໍ່ສ້າງ, ໂຮງແຮມ ແລະ ການບໍລິການອື່ນໆ (ຈັດຢູ່ອັນດັບ 9 ການລົງທຶນໂດຍກົງຂອງຕ່າງປະເທດຢູ່ ສປປ ລາວ). ນອກຈາກນີ້, ໃນໄລຍະ 5 ປີ ຜ່ານມາ ການຄ້າສອງຝ່າຍ ສາມາດບັນລຸໄດ້ 870 ລ້ານໂດລາ. ພ້ອມດຽວກັນ, ຝ່າຍລາວ ກໍໄດ້ສະເໜີໃຫ້ຝ່າຍສິງກະໂປ ສືບຕໍ່ຊຸກຍູ້ບັນດານັກທຸລະກິດຂອງສິງກະໂປ ເຂົ້າມາລົງທຶນຢູ່ ສປປ ລາວ ໃຫ້ຫຼາຍຂຶ້ນຕື່ມໃນອະນາຄົດ ໂດຍສະເພາະ ໃນຂະແໜງການຕ່າງໆທີ່ສອງຝ່າຍມີທ່າແຮງຮ່ວມກັນ ເປັນຕົ້ນການຜະລິດກະສິກຳ, ພະລັງງານສີຂຽວ (ພະລັງງານນໍ້າ, ແສງຕາເວັນ ແລະ ລົມ), ການຊື້ຂາຍສິນເຊື່ອກາກບອນ, ການທ່ອງທ່ຽວ, ການບໍລິການໂຮງແຮມ, ການຂົນສົ່ງໂລຈິດສະຕິກ ແລະ ອື່ນໆ. ສອງຝ່າຍ ໄດ້ສະແດງຄວາມຍິນດີຕໍ່ການລົງນາມບົດບັນທຶກຄວາມເຂົ້າໃຈ (MOU)ດ້ານການພັດທະນາແບບຍືນຍົງທາງດ້ານສິ່ງແວດລ້ອມ, MOU ການຮ່ວມມືຕ້ານອາດສະຍາກໍາຂ້າມຊາດ ທີ່ໄດ້ລົງນາມຮ່ວມກັນ ລະຫວ່າງ ກະຊວງກ່ຽວຂ້ອງໃນທ້າຍປີຜ່ານມາທີ່ ນະຄອນຫຼວງວຽງຈັນ, ຊຶ່ງທັງສອງຝ່າຍເຫັນດີ ອຳນວຍຄວາມສະດວກໃນການປະສານງານ, ການລົງທຶນ ແລະ ການແລກປ່ຽນວິຊາການ ເພື່ອຈັດຕັ້ງປະຕິບັດ MOU ສະບັບດັ່ງກ່າວໃຫ້ປະກົດຜົນເປັນຈິງໃນຕໍ່ໜ້າ ຊຶ່ງຝ່າຍສິງກະໂປຍິນດີໃຫ້ຄໍາປຶກສາ ແລະ ຖ່າຍຖອດບົດຮຽນໃຫ້ໃນດ້ານຕ່າງໆທີ່ກ່ຽວຂ້ອງໃຫ້ແກ່ຝ່າຍລາວ ລວມທັງການຊຸກຍູ້ສົ່ງເສີມບັນດານັກທຸລະກິດໃຫ້ຫັນເຂົ້າມາລົງທຶນຢູ່ໃນ ສປປ ລາວ ຫຼາຍຍິ່ງຂຶ້ນໃນອະນາຄົດ.
 |
ໃນໂອກາດນີ້, ທ່ານຮອງລັດຖະມົນຕີໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈມາຍັງ ລັດຖະບານ ແລະ ປະຊາຊົນ ສິງກະໂປ ຕໍ່ການຊ່ວຍເຫຼືອອັນລໍ້າຄ່າໃນໄລຍະຜ່ານມາ ເປັນຕົ້ນ ການຊ່ວຍສ້າງຊັບພະຍາກອນມະນຸດ, ການຈັດຝຶກອົບຮົມພາສາອັງກິດ ແລະ ວິຊາການທີ່ກ່ຽວຂ້ອງ ໃຫ້ແກ່ບັນດາພະນັກງານລັດຖະກອນ, ນັກການທູດ ຈົນເຖິງການນໍາຂັ້ນສູງຂອງ ສປປ ລາວ, ການພັດທະນາສີມືແຮງງານ ລວມທັງ ການສົ່ງບັນດາອາສາສະໝັກ ຄູອາຈານ ແລະ ຜູ້ຊ່ຽວຊານ ເຂົ້າມາຊ່ວຍເຫຼືອ ສປປ ລາວ ໃນຂະແໜງການຕ່າງໆຢ່າງຫຼວງຫຼາຍ ແລະ ການຊ່ວຍເຫຼືອຢ່າງທັນການໃຫ້ແກ່ ສປປ ລາວ ໃນການຮັບມືກັບການແຜ່ລະບາດຂອງພະຍາດໂຄວິດ-19 ໃນໄລຍະຜ່ານມາ, ພິເສດ ກໍຄືການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນການເປັນປະທານອາຊຽນ ໃນປີ 2024 ໃຫ້ໄດ້ຮັບຜົນສໍາເລັດຢ່າງຈົບງາມ.
ໃນຂະນະດຽວກັນ ທ່ານຮອງລັດຖະມົນຕີ ຟູ ຈີ ເຊຍ ໄດ້ສະແດງຄວາມຍິນດີໃນການຊຸກຍູ້ໃຫ້ພາກສ່ວນກ່ຽວຂ້ອງຂອງສິງກະໂປ ປະສານສົມທົບກັນຢ່າງໃກ້ຊິດກັບຝ່າຍລາວ ເພື່ອເສີມຂະຫຍາຍການພົວພັນຮ່ວມມືໃນຂອບສອງຝ່າຍ ແລະ ຫຼາຍຝ່າຍລະຫວ່າງ ສອງປະເທດ ໃຫ້ນັບມື້ແຕກດອກອອກຜົນຍິ່ງຂຶ້ນ ເພື່ອນໍາເອົາຜົນປະໂຫຍດສູງສຸດມາສູ່ປະຊາຊົນສອງຊາດ. ພ້ອມດຽວກັນນີ້, ກໍສະແດງຄວາມຍິນດີທີ່ຈະສືບຕໍ່ໃຫ້ການສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະ ກັນ ໃນລະດັບເວທີພາກພື້ນ ແລະ ສາກົນ ເປັນຕົ້ນແມ່ນ ໃນຂອບການຮ່ວມມື ອົງການສະຫະປະຊາຊາດ, ອາຊຽນ ແລະ ອື່ນໆ.
ໃນວັນດຽວກັນ, ທ່ານຮອງລັດຖະມົນຕີ ແລະ ຄະນະ ກໍ່ໄດ້ເຂົ້າຢ້ຽມຂໍ່ານັບ ທ່ານ ນາງ ຊິມ ອານ (Sim Ann),ລັດຖະມົນຕີອາວຸໂສ ປະຈໍາ ກະຊວງການຕ່າງປະເທດ ແລະ ກະຊວງພາຍໃນ ແຫ່ງ ສາທາລະນະລັດ ສິງກະໂປ ໂດຍໄດ້ແຈ້ງໃຫ້ຊາບ ກ່ຽວກັບຈຸດປະສົງຂອງການມາຢ້ຽມຢາມເຮັດວຽກຢູ່ ສິງກະໂປ ໃນຄັ້ງນີ້. ໃນໂອກາດດຽວກັນ ທ່ານ ນາງ ຊິມ ອານ ກໍໄດ້ສະແດງຄວາມຍິນດີຕ້ອນຮັບ ຄະນະຜູ້ແທນຝ່າຍລາວ ແລະ ສະແດງຄວາມຊົມເຊີຍຕໍ່ ຄວາມເອົາໃຈໃສ່ຂອງທັງສອງຝ່າຍ ທີ່ໄດ້ເຮັດວຽກຮ່ວມກັນຢ່າງໃກ້ຊິດ ແລະ ສາມາດຈັດຕັ້ງປະຕິບັດກອງປະຊຸມປຶກສາຫາລືສອງຝ່າຍ ລະຫ່ວາງສອງກະຊວງການຕ່າງປະເທດ ລາວ-ສິງກະໂປ ຄັ້ງທີ II ຂຶ້ນຢ່າງເປັນທາງການ ເພື່ອສືບຕໍ່ຊຸກຍູ້ ສົ່ງເສີມການພົວພັນຮ່ວມມືສອງຝ່າຍ ລາວ-ສິງກະໂປ ໃຫ້ມີບາດກ້າວຂະຫຍາຍຕົວ ແລະ ແໜ້ນແຟ້ນຍິ່ງຂຶ້ນກວ່າເກົ່າ. ພ້ອມດຽວກັນນີ້, ກໍໄດ້ແຈ້ງໃຫ້ຊາບກ່ຽວກັບຝ່າຍສິງກະໂປ ມີຄວາມພ້ອມໃນການຕ້ອນຮັບການເຄື່ອນໄຫວຢ້ຽມຢາມທາງລັດຖະກິດ ຢູ່ ສສິງກະໂປ ຂອງ ພະນະທ່ານປະທານປະເທດ ແຫ່ງ ສປປ ລາວ ພາຍຫຼັງທີ່ໄດ້ຮັບເລືອກຕັ້ງດໍາລົງຕໍາແໜ່ງເປັນ ປະທານປະເທດ ແຫ່ງ ສປປ ລາວ ສະໄໝທີ 2.(ຂ່າວ: ກຕທ)
ຄໍາເຫັນ