ໂຮງໝໍແຂວງວຽງຈັນ ຖືເອົາວຽກງານບໍລິການຮັກສາສຸຂະພາບຈະເລີນພັນເປັນບັນຫາສໍາຄັນ

ທ່ານ ວົງເທວີ ຈັນຄໍາມະວົງ ໃຫ້ຮູ້ວ່າ: ໂຮງໝໍແຂວງວຽງຈັນເປັນໂຮງໝໍ 100 ຕຽງ ແລະ ເປັນໂຮງໝໍໜຶ່ງທີ່ບໍລິການຮັກສາສຸຂະພາບລະດັບສູງສຸດຂັ້ນຂອງແຂວງວຽງຈັນ ບໍລິການຄົງທີ່ຮັບຜິດຊອບ ການບໍລິການຮັກສາສຸຂະພາບກວດກາ, ບົ່ງມະຕິ ແລະ ປິ່ນປົວພະຍາດໃນ 4 ຕົວເມືອງທົ່ງພຽງ ແລະ ສົ່ງມາຈາກ 11 ຕົວເມືອງຂອງແຂວງວຽງຈັນ. ໂຮງໝໍແຂວງວຽງຈັນ ໃຫ້ເປີດໃຊ້ບໍລິການຮັກສາສຸຂະພາບມາແຕ່ປີ 2000 ຈົນຮອດປັດຈຸບັນ ເປັນເວລາ 25 ປີ. ການບໍລິການຮັກສາສຸຂະພາບ ກໍໄດ້ປະຕິບັດຕາມແນວທາງຂອງພັກ ແລະ ລັດວາງອອກ ໂດຍສະເພາະກະຊວງສາທາລະນະສຸກ, ກົມປິ່ນປົວຟື້ນຟູໜ້າທີ່ການພະແນກສາທາລະນະສຸກແຂວງ. ສໍາລັບການບໍລິການດ້ານຮັກສາສຸຂະພາບຂອງໂຮງໝໍແຂວງວຽງຈັນແບ່ງອອກເປັນ 2 ສ່ວນບໍລິການຄື: ສ່ວນກວດເຂດນອກ (ບໍ່ໄດ້ນອນໂຮງໝໍ) ແລະ ບໍລິການເຂດໃນ(ນອນໂຮງໝໍ). ພ້ອມນີ້, ຍັງມີໜ່ວຍສະໜັບສູນໜູນບໍລິການດ້ານສຸຂະພາບ-ວິເຄາະ, ລັງສີ-ເອໂກ, ການຢາ, ສ້ອມແປງອຸປະກອນການແພດ ນອກຈາກການບໍລິການຮັກສາສຸຂະພາບ ພາຍໃນໂຮງໝໍແລ້ວ, ວິຊາການໂຮງໝໍແຂວງ ຍັງໄດ້ລົງຕິດຕາມຊຸກຍູ້-ສ້າງຄວາມເຂັ້ມແຂງດ້ານວິຊາການ 11 ຕົວເມືອງ, ສຸກສາລາ ທີ່ເປັນຈຸດສຸມດ້ານບໍລິການຈານວນໜຶ່ງ.

ຄຽງຄູ່ກັນນັ້ນ, ການຈັດຕັ້ງສຸຂະພາບຈະເລີນພັນໂຮງໝໍແຂວງວຽງຈັນ ໄດ້ຮັບການຊີ້ນໍາຈາກແຕ່ລະຂັ້ນໂຮງໝໍແຂວງໄດ້ຮັບການຊີ້ນໍາຈາກສາຍຕັ້ງ: ກະຊວງສາທາລະນະສຸກ ກົມປິ່ນປົວຈາກສູນສຸຂະພາບຈະເລີນພັນ, ແມ່ ແລະ ເດັກພະແແນກສາທາລະນະສຸກແຂວງ, ໂຮງໝໍແຂວງວຽງຈັນຈາກ ຂະແໜງແມ່ ແລະ ເດັກ ພະແນກສາທາລະນະສຸກແຂວງວຽງຈັນ. ໂຮງໝໍແຂວງ: ຄະນະອໍານວຍການໄດ້ແບ່ງຄວາມຮັບຜິດຊອບໃຫ້ຄະນະອໍານວຍການຮັບຜິດຊອບວິຊາການ-ປິ່ນປົວ, ຮັກສາສຸຂະພາບຂອງໂຮງໝໍຊີ້ນໍາໂດຍກົງໂດຍສະເພາະ (ຂະແໜງ-ພະແນກປະສູດ-ພະຍາດຍິງ) ເປັນຜູ້ຊີ້ນໍາວຽກງານຮັກສາສຸຂະພາບຈະເລີນພັນ. ສຸຂະພາບຈະເລີນພັນໂຮງໝໍແຂວງວຽງຈັນ ໄດ້ແບ່ງອອກເປັນວຽກຍ່ອຍເຊັ່ນ: ວຽກກວດທ້ອງ-ແມ່ຖືພາ (ຝາກທ້ອງ), ຄັດກອງແມ່ສ່ຽງໄພ, ສັກຢາກັນພະຍາດ, ວາງແຜນ (ລູກຫ່າງ), ສຸຂະສຶກສາໄວໜຸ່ມກ່ອນແຕ່ງງານ. ໃນນັ້ນ, ໂຮງໝໍແຂວງວຽງຈັນໄດ້ຮັບທຶນຊ່ວຍເຫຼືອດ້ານອຸປະກອນ ແລະ ທຶນຮອນຕ່າງໆຈາກລັດຖະບານ ສປປ ລາວ; ໄດ້ຮັບທຶນຮອນງົບປະມານຊ່ວຍເຫຼືອຈາກໂຄງການ ຈາກລັດຖະບານລຸກຊໍາບວກ; ໂຄງການເທື່ອລະກ້າວ (ສູນມີລີເອີ)ຈາກປະເທດຝຣັ່ງ.

ທ່ານ ວົງເທວີ ຈັນຄໍາມະວົງ ກ່າວຕື່ມວ່າ: ເພື່ອຢາກເຮັດໃຫ້ວຽກງານບໍລິການຮັກສາສຸຂະພາບໄວຈະເລີນພັນດີຂຶ້ນກ່ອນເກົ່າຈະຕ້ອງຖືເອົາວຽກງານບໍລິການຮັກສາສຸຂະພາບຈະເລີນພັນເປັນຂອງທົ່ວປວງຊົນ, ເປັນບັນຫາສໍາຄັນ; ໃຫ້ທົ່ວປວງຊົນເຂົ້າໃຈຢ່າງເລິກເຊິ່ງກ່ຽວກັບວຽກງານບໍລິການສຸຂະພາບຈະເລີນພັນ; ຕ້ອງເອົາວຽກສຸຂະພາບພາບຈະເລີນພັນໄປຜັນຂະຫຍາຍໃຫ້ກວ້າງຂວາງ-ເລີກເຊິ່ງທົ່ວສັງຄົມກ່ອນເກົ່າ; ພະນັກງານເປັນຜູ້ຕັດສິນຜົນໄດ້, ຜົນເສຍ ແລະ ຜົນສໍາເລັດຂອງວຽກງານ, ພະນັກງານມີຄວາມຮູ້-ຄວາມສາມາດ, ມີຄຸນສົມບັດສິນທຳປະຕິວັດ, ການປະຕິບັດວຽກງານຈຶ່ງຈະສໍາເລັດຜົນ (ຢາກໄດ້ພະນັກງານມີຄວາມຮູ້ເພີ່ມຂຶ້ນ ຕ້ອງຝຶກອົບຮົມຈັນຍາບັນ, ຈັນຍາທຳແພດ ແລະ ວິຊາສະເພາະແພດໃຫ້ມີຄວາມຮູ້ຄວາມສາມາດເພີ່ມຂຶ້ນ; ພັກ ແລະ ລັດຖະບານກໍຄືການຈັດຕັ້ງໂຮງໝໍຕ້ອງໄດ້ເອົາໃຈໃສ່ຕໍ່ວຽກສຸຂະພາບຈະເລີນພັນໃນການເພີ່ມງົບປະມານເຂົ້າໃສ່ວຽກງານນີ້ໃຫ້ຫຼາຍຂຶ້ນ; ປັດໄຈສໍາຄັນ ແລະ ຂາດບໍ່ໄດ້ບໍລິການສຸຂະພາບຈະເລີນພັນຕ້ອງໄດ້ຮັບການຊ່ວຍເຫຼືອດ້ານວິຊາການຊ່ຽວຊານຕ່າງປະເທດທີ່ມີປະສົບການພ້ອມທັງຊ່ວຍເຫຼືອດ້ານງົບປະມານຂຶ້ນຕື່ມ. ສິ່ງສໍາຄັນເມື່ອທ່ານ, ລູກ-ຫຼານຂອງທ່ານຈະແຕ່ງງານ (ຄວນແນະນໍາໄປປຶກສາ, ນໍາແພດໝໍຊ່ຽວຊານຢູ່ສູນບໍລິການສຸຂະພາບຈະເລີນພັນ) ກ່ອນການຖືພາວາງແຜນ, ເພື່ອວາງແຜນການກ່ອນແຕ່ງງານ; ເມື່ອຮູ້ວ່າລູກ-ຫຼານຍາດຕິພີ່ນ້ອງຂອງທ່ານແຕ່ງງານຖືພາຄວນແນະນໍາໄປຫາສຸກສາລາ, ໂຮງໝໍເມືອງ, ໂຮງໝໍແຂວງ (ບໍລິການດ້ານສຸຂະພາບຈະເລີນພັນ) ແລະ ເມື່ອຮູ້ວ່າລູກ-ຫຼານຂອງທ່ານເກີດລູກແລ້ວຄວນແນະນໍາໄປສັກຢາກັນພະຍາດໃຫ້ຄົບຕາມເກນອາຍຸການສັກຢາກັນພະຍາດ (ແຕ່ເກີດຈົນຮອດ 5 ປີ).