 |
ໂຮງໝໍ ທະຫານແຂວງສະຫວັນນະເຂດ ແມ່ນໂຮງໝໍໜຶ່ງທີ່ຮັບໃຊ້ບໍລິການປິ່ນປົວຄົນເຈັບ, ເຈັບປ່ວຍໃຫ້ແກ່ພະນັກງານ-ນັກຮົບ ບັນດາກົມກອງໃນທົ່ວທະຫານແຂວງ ແລະ ບໍລິການຮັບໃຊ້ປະຊາຊົນທົ່ວໄປ ໂດຍຍຶດໝັ້ນຈັນຍາບັນ, ຈັນຍາທໍາຂອງແພດປະຕິວັດເປັນສຳຄັນ
 |
ສະຫາຍ ພັນໂທ ສີສົງຄາມ ຣາຊພົງ ຫົວໜ້າການທະຫານ ໂຮງໝໍທະຫານແຂວງສະຫວັນນະເຂດ ໃຫ້ຮູ້ວ່າ: ໃນໄລຍະຜ່ານມາ ຄະນະພັກ - ຄະນະບັນຊາກົມກອງ ກໍໄດ້ເອົາໃຈໃສ່ຊີ້ນໍາ-ນໍາພາ ວຽກງານສຶກສາອົບຮົມການເມືອງແນວຄິດ ແລະ ວຽກງານວິຊາສະເພາະ ບໍລິການຄົນເຈັບທົ່ວໄປ, ຊຶ່ງມີຜົນສໍາເລັດຫຼາຍດ້ານ ສະແດງອອກ ວຽກງານປະກັນສັງຄົມ ໃນ 10 ເດືອນຜ່ານມາ ມີຈໍານວນບັດຜູ້ເກີດສິດ 101,496 ບັດ, ຄົນເຈັບມາໃຊ້ບໍລິການທັງໝົດ 12,371 ເທື່ອຄົນ, ຮັບເງິນຈາກກົມປະກັນສັງຄົມ 992,297,516 ກີບ, ວຽກງານບໍລິການທົ່ວໄປ, ກວດພະຍາດເຂດນອກ 9,317 ເທື່ອຄົນ, ກວດເລືອດ 3,862 ເທື່ອຄົນ, ເສຍຄ່າ 3,789 ເທື່ອຄົນ, ບໍ່ເສຍຄ່າ 73 ເທື່ອຄົນ, ຮັບຄົນເຈັບເຂົ້ານອນປິ່ນປົວ 969 ເທື່ອຄົນ, ໃນນີ້ ເປັນພະນັກງານທະຫານ 75 ເທື່ອຄົນ, ພະນັກງານ 12 ເທື່ອຄົນ, ປະຊາຊົນ 441 ເທື່ອຄົນ, ຕຳຫຼວດ 16 ເທື່ອຄົນ, ຄອບຄົວທະຫານ 158 ເທື່ອຄົນ, ພະສົງ 3 ເທື່ອຄົນ, ເດັກນ້ອຍ 175 ເທື່ອຄົນ, ປະສູດ 95 ເທື່ອຄົນ, ສາມາດປິ່ນປົວດີ 659 ເທື່ອຄົນ, ນຳສົ່ງໂຮງໝໍອື່ນ 10 ເທື່ອຄົນ, ຕິດພັນກັບວຽກງານວິຊາສະເພາະແລ້ວ,ຄະນະພັກ-ຄະນະບັນຊາ ຍັງໄດ້ເອົາໃຈໃສ່ຊີ້ນໍາ-ນໍາພາ ວຽກງານ ປັບປຸງກໍ່ສ້າງກໍາລັງ ແລະ ກໍ່ສ້າງກົມກອງ ເຊັ່ນ: ວຽກງານປັບປຸງກໍ່ສ້າງເອົາໃຈໃສ່ສຶກສາອົບຮົມການເມືອງ-ນໍາພາແນວຄິດ ແນໃສ່ເຮັດໃຫ້ພະນັກງານ-ນັກຮົບຮັບຮູ້ເຂົ້າໃຈແນວທາງນະໂຍບາຍ, ຂໍ້ກຳນົດກົດລະບຽບຂອງພັກ, ກົດໝາຍຂອງລັດ, ປະຕິບັດທຸກມະຕິຄໍາສັ່ງ ຂອງຂັ້ນເທິງວາງອອກ, ວຽກງານປັບປຸງກໍ່ສ້າງຄ້າຍຄູ ໄດ້ປົວແປງຕຶກນອນຄົນເຈັບ ພາຍນອກ + ພາຍໃນ ຕຶກປະສູດ ແລະ ຕຶກສຸກເສີນ ແລະ ອື່ນໆອີກ ປົວແປງປູເດີ່ນບໍລິເວນໂຮງໝໍໃຫ້ມີຄວາມສະອາດຈົບງາມ ດ້ວຍທຶນຂອງກົມກອງເອງ ລວມມູນຄ່າ 1 ຕື້ກວ່າກີບ.
 |
ສະຫາຍ ພັນຕີ ນາງ ວັນນິດາ ສີອາລຸນ ຫົວໜ້າຂະແໜງສຸກເສີນ ໂຮງໝໍທະຫານແຂວງສະຫວັນນະເຂດ ໃຫ້ຮູ້ຕື່ມວ່າ: ສຳລັບການບໍລິການປິ່ນປົວຮັກສາສຸຂະພາບໃຫ້ແກ່ຄົນເຈັບ ໃນໄລຍະຜ່ານມາ ແມ່ນໄດ້ເອົາໃຈໃສ່ເບິ່ງແຍງຄົນເຈັບ ໃຫ້ສຸຂະສຶກສາ ເຮັດໃຫ້ຜູ້ມາໃຊ້ບໍລິການປິ່ນປົວມີຄວາມເພິ່ງພໍໃຈ. ສາມາດໃຫ້ມີຄວາມຮັບປະກັນ, ປິ່ນປົວດີ, ມີປະສິດທິຜົນ, ມີຄວາມນິຍົມ, ສ້າງໄດ້ຊື່ສຽງ, ບົດບາດໃຫ້ສູງ, ເພື່ອສ້າງໂຮງໝໍໃຫ້ກາຍເປັນໂຮງໝໍ 5 ດີ 1 ພໍໃຈ.
ເນື່ອງໃນໂອກາດກະກຽມສະເຫຼີມສະຫຼອງວັນຊາດທີ 2 ທັນວາ ຄົບຮອບ 50 ປີ ແລະ ວັນເກີດຂອງປະທານໄກສອນ ພົມວິຫານ ຄົບຮອບ 105 ປີ ທີ່ຈະມາເຖິງນີ້ໃຫ້ມີເນື້ອໃນ ແລະ ຄວາມໝາຍເລິກເຊິ່ງ. ສະຫາຍ ພັນໂທ ສີສົງຄາມ ຣາຊພົງ ໄດ້ສະແດງຄວາມຮູ້ສຶກ ດີໃຈ ແລະ ພາກພູມໃຈເປັນຢ່າງຍິ່ງ ຕໍ່ການຊີ້ນໍາ-ນໍາພາ ຂອງພັກ - ລັດ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕະຫຼອດໄລຍະ 50 ປີຜ່ານມາຈົນເຖິງປັດຈຸບັນ ເຫັນໄດ້ວ່າ ປະເທດຊາດຂອງພວກເຮົາໄດ້ມີການປ່ຽນແປງ ແລະ ພັດທະນາ ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ທາງດ້ານເສດຖະກິດ-ສັງຄົມ ແລະ ມີສະຖຽນລະພາບທາງດ້ານການເມືອງສະຫງົບປອດໄພດີ ເຮັດໃຫ້ປະເທດຊາດມັ່ງຄັ່ງເຂັ້ມແຂງ ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ ປະຊາທິປະໄຕ, ຍຸຕິທຳ ແລະ ສີວິໄລດີ, ໃນນາມຕາງໜ້າຄະນະ ພັກ- ຄະນະອໍານວຍການໂຮງໝໍທະຫານ ແຂວງສະຫວັນນະເຂດ ຂໍສະແດງຄວາມຮູ້ບຸນຄຸນອັນລົ້ນເຫຼືອ ຂໍອວຍພອນໄຊອັນ ປະເສີດມາຍັງການນໍາພາພັກ-ລັດ ທຸກໆຂັ້ນຈົ່ງມີສຸຂະພາບແຂງແຮງ ຊີ້ນໍາ-ນໍາພາປະເທດຊາດຂອງ ພວກເຮົາ ໃຫ້ຈະເລີນກ້າວໜ້າຍິ່ງໆຂຶ້ນໄປ, ອວຍພອນປະຊາຊົນທຸກຊັ້ນຄົນຕະຫຼອດພະນັກງານ-ນັກຮົບ ທຸກສະຫາຍຈົ່ງມີສຸຂະພາບ ເຂັ້ມແຂງ ພ້ອມກັນເຮັດສຳເລັດທຸກໜ້າທີ່-ທີ່ພັກ-ລັດ ຂັ້ນເທິງມອບໝາຍໃຫ້.
 |
ຄໍາເຫັນ