 |
ກ່ອນໜ້ານີ້, ຜູ້ປ່ວຍເພດຊາຍອາຍຸກາງຄົນໜຶ່ງ ໄດ້ຮັບການນຳສົ່ງໄປໂຮງໝໍແຂວງຫຼວງພະບາງຢ່າງໄວວາ ເນື່ອງຈາກເກີດອາການເຈັບຊື່ໜ້າເອິກຢ່າງຕໍ່ເນື່ອງ ແລະ ເຫື່ອອອກຫຼາຍ. ທ່ານ ຫຼູ ຊ່ານ ແພດຜູ້ຊ່ວຍ ຫົວໜ້າຄະນະຂອງທີມແພດຈີນ ໄດ້ຮັບຄຳຂໍໃຫ້ໄປກວດອາການ ແລະ ໄດ້ກວດສຸກເສີນຢ່າງໄວວາ ພ້ອມກັບວິເຄາະວ່າ ຜູ້ປ່ວຍເປັນໂລກຫົວໃຈວິປັດໄຈແບບ ST ຊຶ່ງອາດອັນຕະລາຍເຖິງຊີວິດ, ເນື່ອງຈາກຄອບຄົວຂອງຜູ້ປ່ວຍບໍ່ຢູ່ໃນທ້ອງຖິ່ນ, ທີມແພດຈຶ່ງໄດ້ຕິດຕໍ່ຂໍຄວາມເຫັນດ້ວຍການສື່ສານວິດີໂອ ແລ້ວຈຶ່ງໄດ້ລາຍງານໃຫ້ຜູ້ອຳນວຍການໂຮງໝໍຮັບຮອງ ແລະ ຕັດສິນໃຈເປີດຊ່ອງທາງສີຂຽວ ເພື່ອປະຕິບັດຜ່າຕັດ PCI ດ້ານສຸກເສີນໃຫ້ຜູ້ປ່ວຍ.
ຜົນການກວດຢືນຢັນຄວາມເຊື່ອກ່ອນໜ້າ: ຫຼອດເລືອດ LAD ທີ່ສຳຄັນທີ່ສຸດຂອງຫົວໃຈ ໄດ້ອຸດຕັນຢ່າງສິ້ນເຊີງ. ທ່ານ ຫຼູ ຊ່ານ ໄດ້ຊີ້ນຳແພດທ້ອງຖິ່ນ ໃຫ້ຜ່ານລວດນຳສົ່ງ, ຂະຫຍາຍດ້ວຍບານ ແລະວາງໂຄງ Stent ໃນຈຸດທີ່ອຸດຕັນ ເຮັດໃຫ້ຫຼອດເລືອດທີ່ອຸດຕັນ ເປີດຂຶ້ນ, ສາມາດຟື້ນຟູການໄຫຼວຽນຂອງເລືອດ ໄປຫາກ້າມເນື້ອຫົວໃຈ, ຂັ້ນຕອນການຜ່າຕັດດຳເນີນສຳເລັດ. ອາການເຈັບຊື່ໜ້າເອິກຂອງຜູ້ປ່ວຍຫາຍໄປໃນທັນທີ ແລະ ຫຼັງຜ່າຕັດ, ຜູ້ປ່ວຍຟື້ນຕົວຢ່າງດີ ໃນການດູແລຂອງທີມແພດ ແລະ ສາມາດກັບໄປບ້ານໄດ້ພາຍໃນ 5 ວັນ.
ທ່ານ ຫຼູ ຊ່ານ ໄດ້ມີຄຳເຫັນຕື່ມວ່າ: ໂລກຫົວໃຈວິປັດໄຈ ມີອາການກະທັນຫັນ ແລະ ອັດຕາການເສຍຊີວິດສູງ, ການປິ່ນປົວຟື້ນຟູການໄຫຼວຽນຂອງເລືອດໃຫ້ໄວ ແມ່ນສຳຄັນທີ່ສຸດໃນການຊ່ວຍຊີວິດ. ການຜ່າຕັດ PCI ດ້ານສຸກເສີນ ແມ່ນວິທີການປິ່ນປົວທີ່ມີປະສິດທິຜົນສູງສຸດ ຖືກຮັບຮອງໃນລະດັບສາກົນ. ຜົນສຳເລັດໃນການຜ່າຕັດຄັ້ງນີ້, ໄດ້ພິສູດໃຫ້ເຫັນເຖິງປະສິດທິຜົນ ແລະ ຄວາມປອດໄພ ຂອງການຜ່າຕັດສຸກເສີນທີ່ມີຄວາມສັບສົນ ພາຍໃຕ້ເງື່ອນໄຂປັດຈຸບັນຂອງລາວ ແລະ ໄດ້ສ້າງ 'ຊ່ອງທາງແຫ່ງຊີວິດ' ໃຫ້ແກ່ຜູ້ປ່ວຍໂລກຫົວໃຈວິປັດໄຈໃນແຂວງຫຼວງພະບາງ.
 |
ໂອກາດນີ້, ຜູ້ອໍານວຍການໂຮງໝໍແຂວງຫຼວງພະບາງ ໄດ້ຊົມເຊີຍ ແລະ ຂອບໃຈຕໍ່ຄວາມສຳເລັດ ດ້ານການຊ່ວຍເຫຼືອຂອງທີມແພດຈີນ ທີ່ເປັນສັນຍາລັກຄວາມກ້າວໜ້າຄັ້ງສຳຄັນນີ້ ແລະ ຫວັງວ່າ ໃນອະນາຄົດ ຈະສືບຕໍ່ສ້າງຄວາມເລິກເຊິ່ງກັບທີມແພດຈີນ, ຮ່ວມກັນຝຶກອົບຮົມບຸກຄະລາກອນດ້ານການແພດທ້ອງຖິ່ນ ເພື່ອໃຫ້ເຕັກນິກການແພດທີ່ທັນສະໄໝ ແລະ ນຳຜົນປະໂຫຍດໄປສູ່ປະຊາຊົນຫຼາຍຂຶ້ນ.
(ແຫຼ່ງຂ່າວ: ກົງສູນໃຫຍ່ ສປ ຈີນ ປະຈໍາແຂວງຫຼວງພະບາງ)
ຄໍາເຫັນ