ສຸມໃສ່ຍູ້ແຮງຂະບວນການຫຼາຍດ້ານ ຕິດພັນກັບການແຂ່ງຂັນດ້ານວິຊາສະເພາະການແພດ

ໃນໂອກາດກະກຽມສະເຫຼີມສະຫຼອງວັນຊາດທີ 2 ທັນວາ ຄົບຮອບ 50 ປີນີ້, ໂຮງໝໍບໍລິເວນ 109 ກອງທັບໄດ້ມີການອອກແຮງແຂ່ງຂັນສ້າງຂະບວນວຽກງານຮອບດ້ານທີ່ປິ່ນອ້ອມໜ້າທີ່ການເມືອງຂອງຕົນ ໂດຍສະເພາະແມ່ນໄດ້ເອົາໃຈໃສ່ສຶກສາອົບຮົມການເມືອງນໍາພາແນວຄິດໃຫ້ແກ່ພະນັກງານ-ນັກຮົບໃນທົ່ວກົມກອງຢ່າງທົ່ວເຖິງ. ພ້ອມກັນຕ້ານປະກົດການຫຍໍ້ທໍ້ຕ່າງໆທີ່ເກີດຂຶ້ນໃນໂຮງໝໍຈຶ່ງເຮັດໃຫ້ໂຮງໝໍມີຄວາມສະ ຫງົບເປັນພື້ນຖານ, ເພີ່ມທະວີຄວາມສາມັກຄີເປັນປຶກແຜ່ນແໜ້ນໜາ, ປະຕິບັດໜ້າທີ່ຄໍາສັ່ງຂອງຂຶ້ນເທິງວາງອອກຢ່າງເຂັ້ມງວດ, ຈັດຕັ້ງເຊື່ອມຊຶມມະຕິຕ່າງໆຂອງກອງປະຊຸມພັກແຕ່ລະຂັ້ນ, ບັນດາມູນເຊື້ອອັນດີງາມຂອງພັກ, ຂອງຊາດໃຫ້ທົ່ວເຖິງ ແລະ ເລິກເຊິ່ງ, ຈັດຕັ້ງກວດກາແຂ່ງຂັນດ້ານວິຊາສະເພາະການແພດເຊັ່ນ: ເຕັກນິກເຊີດຊູຄົນເຈັບໜັກ, ບັນດາເຕັກນິກຜ່າຕັດຕ່າງໆ, ການບົ່ງມະຕິພະຍາດ ແລະ ການວາງຢາໃນການປິ່ນປົວ, ການຕິດຕາມຄົນເຈັບ ແລະ ການເບິ່ງແຍງບົວລະບັດຄົນເຈັບ ແລະ ອື່ນໆ.

ສະຫາຍ ພັນໂທ ຈັນທະວີສຸກ ພຸດຈັນທອນ ຫົວໜ້າພະແນກຫ້ອງກວດສຸກເສີນ ໂຮງໝໍບໍລິເວນ 109 ກອງທັບໃຫ້ຮູ້ວ່າ: ໃນເມື່ອມີຄົນເຈັບເຂົ້າມາໃຊ້ບໍລິການ ພວກເຮົາກໍໄດ້ມີການຊັກຖາມອາການ, ກວດກາບົ່ງ ມະຕິພະຍາດ ແລ້ວນ້ຳສົ່ງໄປພະແນກການທີ່ກ່ຽວຂ້ອງເພື່ອເຂົ້າຮັບການປິ່ນປົວ, ຖ້າພະນັກງານ-ນັກຮົບທີ່ມີບັດປະກັນສັງຄົມພວກເຮົາກໍໄດ້ນຳສົ່ງໄປປິ່ນປົວຕາມລະບຽບການປະກັນສັງຄົມກອງທັບວາງອອກ.

ສະຫາຍ ພັນໂທ ນາງ ໄຊສົງຄາມ ປ້ອງບັນດິດ ຮອງພະແນກປະສູດ ໂຮງໝໍບໍລິເວນ 109 ກອງທັບໃຫ້ຮູ້ຕື່ມວ່າ: ສຳລັບການບໍລິການປິ່ນປົວຢູ່ພະແນກພວກເຮົາໄດ້ເອົາໃຈໃສ່ປິ່ນປົວປະສູດພະຍາດຍິງ ຊ່ວຍເກີດລູກຮັກສາສຸຂະພາບແມ່ ແລະ ເດັກ, ໃນນັ້ນໄດ້ມີຜ່າຕັດອອກ ໃນເມື່ອເກີດລູກທ່າທີ່ຜິດປົກກະຕິ ຫຼືວ່າແມ່ທີ່ມີຄວາມສ່ຽງໄພເກີດທາງຊ່ອງຄອດບໍ່ໄດ້ ແລະ ປິ່ນປົວພະຍາດຍິງ, ໄລຍະຜ່ານມາ ການບໍລິການປິ່ນປົວຄົນເຈັບເຫັນວ່າ ຫາງສຽງສ່ວນຫຼາຍແມ່ນໄດ້ຮັບຄວາມເພິ່ງພໍໃຈ ຍ້ອງຍໍຊົມເຊີຍພະນັກງານແພດໝໍວ່າປິ່ນປົວດີ, ຮັບຕ້ອນດີ, ເວົ້າຈາສຸພາບ ປະຕິບັດຕາມຄໍາຂວັນ 5 ດີ 1 ພໍໃຈຂອງກະຊວງສາທາລະນະສຸກ ກໍຄືລະບອບການແພດຂອງກົມເສນາຮັກວາງອອກ.

ໄປຄຽງຄູ່ກັນນີ້, ຄະນະພັກ-ຄະນະບັນຊາ ຍັງໄດ້ຈັດຕັ້ງປະດັບປະດາ ຄ້າຍຄູ ຕຶກປິ່ນປົວຄົນເຈັບໃຫ້ມີຄວາມສະອາດສວຍງາມ, ຈັດຕັ້ງປະຕິບັດ 7 ລະບອບ 18 ວຽກ, ປຸກລະດົມເຂົ້າຮ່ວມຂະບວນການແຂ່ງຂັນກິລາ, ສິລະປະ-ວັນນະຄະດີຢູ່ພາຍໃນກົມກອງໃຫ້ມີບັນຍາກາດຟົດຟື້ນ, ຍູ້ແຮງຂະບວນການເພີ່ມພູນຜະລິດ ຜົນ ເປັນຕົ້ນປູກຜັກເຂົ້າເຮືອນຄົວລວມ, ສືບຕໍ່ປັບປຸງແບບແຜນວິທີເຮັດວຽກແຕ່ລະຂັ້ນໃຫ້ຖືກຕ້ອງຕາມຫຼັກການລວມສູນປະຊາທິປະໄຕເປັນໝູ່ຄະນະ.

ເນື່ອງໃນໂອກາດອັນມີຄວາມໝາຍຄວາມສໍາຄັນນີ້, ສະຫາຍ ພັນເອກ ອັກສອນ ລິນສະຫວາດ ຕາງໜ້າ ນາຍ ແລະ ພົນທະຫານທົ່ວໂຮງໝໍບໍລິເວນ 109 ກອງທັບ ສະແດງຄວາມຮູ້ບຸນຄຸນມາຍັງພັກປະຊາຊົນປະຕິວັດລາວທີ່ໄດ້ສຶກສາອົບຮົມ ແລະ ນໍາພາຊີ້ນໍາກອງທັບໃຫ້ເຕີບໃຫຍ່ເຂັ້ມແຂງ ພ້ອມທັງເຮັດສຳເລັດໜ້າທີ່ ທີ່ພັກ ແລະ ປະຊາຊົນມອບໝາຍໃຫ້, ຂໍອວຍພອນໄຊອັນປະເສີດໃຫ້ບັນດາທ່ານການນໍາພັກ-ລັດ, ພະນັກ ງານປະຕິວັດອາວຸໂສບຳນານ ຕະຫຼອດເຖິງປະຊາຊົນລາວບັນດາເຜົ່າໃນທົ່ວປະເທດ, ນາຍ ແລະ ພົນທະຫານໃນທົ່ວກອງທັບປະຊາຊົນລາວ ຈົ່ງມີສຸຂະພາບແຂງແຮງ ມີພະລານາໄມສົມບູນ ພ້ອມກັນອອກແຮງແຂ່ງຂັນສ້າງຜົນງານເພື່ອຂໍ່ານັບຮັບຕ້ອນວັນປະຫວັດສາດຂອງຊາດ, ຂອງພັກໃນປີ 2025 ໃຫ້ເປັນຂະບວນຟົດຟື້ນກວ້າງຂວາງ.