 |
ວັນສາຍຕາໂລກເປັນວັນໜຶ່ງທີ່ມີຄວາມໝາຍສໍາຄັນ, ໃນແຕ່ລະປີທົ່ວໂລກໄດ້ພ້ອມກັນສະເຫຼີມສະຫຼອງ, ວັນສາຍຕາໂລກແມ່ນເປັນເຫດການໜຶ່ງໃນແຕ່ລະປີ ທີ່ທົ່ວໂລກໄດ້ພ້ອມກັນສະເຫຼີມສະຫຼອງ ຊຶ່ງໄດ້ມຸ່ງເນັ້ນ ແລະ ເຈາະຈົງເຖິງບັນຫາຂອງຕາບອດຢູ່ໃນທົ່ວໂລກ ເພື່ອສ້າງຄວາມຮູ້ສຶກ, ສ້າງຄວາມຮັບຮູ້ ແລະ ເຫັນໄດ້ຄວາມສຳຄັນ ຂອງປະຊາກອນໂລກ ໃນການປ້ອງກັນ, ຮັກສາສຸຂະພາບຕາ ເພື່ອຊ່ວຍຫຼຸດຜ່ອນການເປັນຕາບອດ ແລະ ປ້ອງກັນບໍ່ໃຫ້ຕາບອດເກີດຂຶ້ນໃໝ່ ພ້ອມກັນນັ້ນກໍໄດ້ລະດົມທຸກພາກສ່ວນກໍຄືຜູ້ໃຈບຸນທັງຫຼາຍເຂົ້າມາມີສ່ວນຮ່ວມບໍລິຈາກ ເພື່ອເຮັດໃຫ້ການບໍລິການສຸຂະພາບຕາເຂົ້າເຖິງປະຊາຊົນທຸກທົ່ວໜ້າ ລວມເຖິງຜູ້ທຸກຍາກທີ່ຢູ່ເຂດຫ່າງໄກສອກຫຼີກ.
 |
ກິດຈະກຳໃນງານຄັ້ງນີ້ໄດ້ມີການບໍລິການກວດສຸຂະພາບຕາ ແລະ ແຈກແວ່ນຕາໃຫ້ຜູ້ສູງອາຍຸໂດຍບໍ່ເສຍຄ່າ, ພິເສດຖ້າພົບຄົນເຈັບຕາມົວ, ຕາບໍ່ເຫັນຮຸ່ງ ຫຼື ຕາບອດຍ້ອນພະຍາດຕາຂຸ້ນ ແມ່ນຈະໄດ້ບໍລິການຜ່າຕັດແກ່ນຕາຂຸ້ນໃຫ້ ໂດຍບໍ່ໄດ້ເສຍຄ່າ, ໝາຍຄວາມວ່າ ຄ່າໃຊ້ຈ່າຍໃນການຜ່າຕັດໃນຄັ້ງນີ້ແມ່ນໄດ້ຮັບການສະໜັບສະໜູນຈາກຜູ້ໃຈບຸນ ພາຍໃນປະເທດ ແລະ ອົງການຈັດຕັ້ງສາກົນໄດ້ບິແບ່ງປັນນ້ຳໃຈເຮັດເປັນໂຄງການຜ່າຕັດແກ່ນຕາຂຸ້ນໂດຍບໍ່ໄດ້ເສຍຄ່າ ເພື່ອຊ່ວຍເຫຼືອຄົນເຈັບຕາບອດຜູ້ທຸກຍາກ ແລະ ດ້ອຍໂອກາດໃນ ສປປລາວ.
 |
ພິທີສະເຫຼີມສະຫຼອງວັນສາຍຕາໂລກຄັ້ງນີ້ ໄດ້ຮັບການສະໜັບສະໜູນຂອງຄູ່ຮ່ວມພັດທະນາ ຂອງມູນນິທິອາຍແຄ, ມູນນິທີເຟລດໂຮໂລ, ອົງການ ຊິບິເອມ ໂກລໂບ, ອົງການໄຊຟໍອອນ, ໂຮງໝໍຕາແຫ່ງຊາດສິງກະໂປ, ມູນນິທິ ຈີເອັກ ສປ ຈີນ, ອົງການຈັດຕັ້ງ ແລະ ທຸກພາກສ່ວນທີ່ມີສ່ວນຮ່ວມ.
(ຂ່າວ ຕຸໄລເພັດ, ແຫຼງຂໍ້ມູນ: ສູນປິ່ນປົວ ແລະ ຮັກສາສຸຂະພາບຕາ)
ຄໍາເຫັນ