ລັດຖະມົນຕີກະຊວງສາທາລະນະ ສຸກ ເນັ້ນຂອດການບໍລິການ ຕ້ອງຄໍານຶງຈັນຍາບັນແພດ-ໝໍ

ທ່ານ ນາງ ລຳພັນ ໄຊຄຳມີ ລາຍງານວ່າ: ການຈັດຈັ້ງປະຕິບັດວຽກງານໃນ 9 ເດືອນ ປີ 2025 ມີຜົນສຳເລັດຫຼາຍດ້ານ. ໃນນັ້ນ, ວຽກງານອະນາໄມ ແລະ ສົ່ງເສີມສຸຂະພາບ ໃນ 11 ຕົວຊີ້ບອກ ມີຄວາມຄືບໜ້າຕໍ່ເນື່ອງ, ການປ້ອງກັນ ແລະ ຄວບຄຸມພະຍາດຕິດຕໍ່ ໄດ້ຮັບການເຝົ້າລະວັງ ເຮັດໃຫ້ຈຳນວນກໍລະນີຂອງຜູ້ປ່ວຍໃໝ່ຫຼຸດລົງ, ພ້ອມວຽກງານການປິ່ນປົວ ແລະ ຟື້ນຟູໜ້າທີ່ການ, ວຽກງານປົກປ້ອງຜູ້ບໍລິໂພກອາຫານ, ຢາ ແລະ ຜະລິດຕະພັນການແພດ, ວຽກງານການຄຸ້ມຄອງ, ພັດທະນາພະນັກງານ ແລະ ຄົ້ນຄວ້າວິທະຍາສາດສາທາລະນະສຸກ, ວຽກງານແຜນການ ແລະ ການເງິນສາທາລະນະສຸກ, ການບໍລິຫານຄຸ້ມຄອງ ແລະ ກວດກາ ກໍໄດ້ຮັບການຈັດຕັ້ງປະຕິບັດມີຜົນສໍາເລັດດີຂຶ້ນຕໍ່ເນື່ອງ. ປັດຈຸບັນ, ທົ່ວແຂວງ ມີສະຖານທີ່ບໍລິການດ້ານສາທາລະນະສຸກ 7 ແຫ່ງ ຄື: ໂຮງໝໍແຂວງ 1 ແຫ່ງ, ໂຮງໝໍກອງບັນຊາການທະຫານແຂວງ 1 ແຫ່ງ, ໂຮງໝໍເມືອງ 3 ແຫ່ງ, ສຸກສາລາ 31 ແຫ່ງ, ຮ້ານຂາຍຢາເອກະຊົນ 79 ແຫ່ງ, ຫ້ອງກວດພະຍາດ 36 ແຫ່ງ, ມີບ້ານສາທາລະນະສຸກແບບຢ່າງ 203 ບ້ານ. ຈາກນັ້ນ, ບັນດາກົມ ແລະ ບັນດາຂະແໜງການ ໄດ້ມີການແລກປ່ຽນຄໍາຄິດເຫັນກ່ຽວກັບການປະຕິບັດວຽກງານ, ຂອດການປະສານງານໃນໄລຍະຜ່ານມາ ທີ່ຍັງບໍ່ທັນຄ່ອງຕົວ, ຍັງມີບາງຂໍ້ຄົງຄ້າງ ເພື່ອພ້ອມກັນແກ້ໄຂ ເພື່ອເຮັດໃຫ້ວຽກງານໃນຕໍ່ໜ້າດີຂຶ້ນກວ່າເກົ່າ.

ໂອກາດນີ້, ທ່ານ ນາງ ໃບຄຳ ຂັດຕິຍະ ໄດ້ມີທິດຊີ້ນຳຫຼາຍບັນຫາ ຊຶ່ງສໍາຄັນຍິ່ງ ກໍແມ່ນຂອດການບໍລິການປິ່ນປົວສຸຂະພາບ ຕ້ອງປະຕິບັດໃຫ້ເຂັ້ມ ງວດຈັນຍາບັນຂອງພະນັກງານແພດ-ໝໍ ເພື່ອຫຼີກລຽງຫາງສຽງຈົ່ມວ່າຂອງສັງຄົມ, ພ້ອມນີ້ ຄະນະພັກ-ຄະນະນໍາພະແນກ, ຂະແໜງການ ກໍຕ້ອງເປັນເຈົ້າການຕິດຕາມ ກວດກາການເຄື່ອນໄຫວຂອງພະນັກງານ, ສະມາຊິກພັກ ໂດຍສືບຕໍ່ສຶກສາອົບຮົມການເມືອງແນວຄິດໃຫ້ເຊື່ອມຊຶມແນວທາງຂອງພັກ-ຂອງລັດ ແລະ ດ້ານວຽກງານວິຊາສະເພາະ ກໍໃຫ້ເອົາໃຈໃສ່ສ້າງແຜນການເຄື່ອນໄຫວ, ປັບປຸງປົວແປງ ແລະ ພັດທະນາລະບົບດ້ານການບໍລິການໃຫ້ຖືກຕ້ອງ, ສອດຄ່ອງຕາມຫຼັກການສາກົນ, ເອົາໃຈໃສ່ຕິດຕາມ, ຄຸ້ມຄອງບັນດາຄຣິນິກ, ຮ້ານເສີມຄວາມງາມ ໃຫ້ເຄື່ອນໄຫວຖືກຕ້ອງຕາມລະບຽບຫຼັກການ ຂອງກະຊວງສາທາລະນະສຸກວາງອອກ; ພ້ອມນັ້ນ ກໍເອົາໃຈໃສ່ເຝົ້າລະວັງ, ຕ້ານ ແລະ ສະກັດກັ້ນການແຜ່ລະບາດຂອງພະຍາດຕາມລະດູການ, ພະຍາດຕິດຕໍ່ຕ່າງໆ ຫາກເກີດມີກໍລະນີໃດໜຶ່ງຫາກເກີດຂຶ້ນ ກໍຕ້ອງມີການລາຍງານຮີບດ່ວນ, ປະສານງານຢ່າງກົມກຽວກັບທຸກພາກສ່ວນກ່ຽວຂ້ອງ ເພື່ອພ້ອມກັນແກ້ໄຂບັນຫາ ແລະ ປິ່ນປົວໃຫ້ທ່ວງທັນກັບສະພາບການ.

(ຂ່າວ: ອັດສະວິນ)