 |
ກອງປະຊຸມເວທີປຶກສາຫາລືເສດຖະກິດ ເຊັນ-ປີເຕີສະເບີກ, ເປັນກອງປະຊຸມສາກົນໜຶ່ງທີ່ມີຄວາມໝາຍສຳຄັນ, ໄດ້ຖືກຈັດຂຶ້ນຄັ້ງທໍາອິດໃນປີ 1997 ແລະ ຕໍ່ມາກໍໄດ້ຖືກຈັດຂຶ້ນເປັນປະຈໍາທຸກໆປີ. ພ້ອມນີ້, ນັບແຕ່ ປີ 2006, ໃນພິທີເປີດກອງປະຊຸມດັ່ງກ່າວ ແມ່ນໄດ້ຮັບກຽດເຂົ້າຮ່ວມ ໂດຍ ປະທານາທິບໍດີຂອງ ສະຫະພັນ ຣັດເຊຍ ຕະຫຼອດມາ.
ກອງປະຊຸມ SPIEF 2025 ນີ້ ໄດ້ກໍານົດເອົາຫຼາຍຫົວຂໍ້ສໍາຄັນ ທີ່ປິ່ນອ້ອມຄໍາຂວັນທີ່ກ່າວມາ ເພື່ອໃຫ້ຜູ້ເຂົ້າຮ່ວມກອງປະຊຸມ ໄດ້ລົງເລິກປຶກສາຫາລື, ແລກປ່ຽນຄໍາຄິດເຫັນ, ແລກປ່ຽນບົດຮຽນ, ຂໍ້ມູນຂ່າວສານ, ປະສົບການ, ຂໍ້ຄົງຄ້າງ, ສິ່ງທ້າທາຍ, ອຸປະສັກ ແລະ ສິ່ງກີດຂວາງຕ່າງໆ ເພື່ອວາງທິດທາງການຮ່ວມມືໃນຕໍ່ໜ້າໃຫ້ມີປະສິດທິພາບ, ປະສິດທິຜົນ, ມີຄວາມຍຸຕິທຳ, ມີຜົນປະໂຫຍດຮ່ວມກັນ ເພື່ອການພັດທະນາທີ່ຍືນຍົງ ແລະ ຄວາມຈະເລີນຮຸ່ງເຮືອງສີວິໄລໃນພາກພື້ນ ແລະ ໃນໂລກ ຊຶ່ງບັນຫາສຳຄັນຕ່າງໆ ປະກອບມີ: ສະພາບເສດຖະກິດໂລກ, ການພັດທະນາເສດຖະກິດຂອງຣັດເຊຍ, ການພັດທະນາ ແລະ ການນຳໃຊ້ເຕັກໂນໂລຊີທີ່ທັນສະໄໝ, ນະວັດຕະກຳໃໝ່ໆ, ປັນຍາປະດິດ ແລະ ການຫັນເປັນດີຈີຕອນໃນຂົງເຂດວຽກງານຕ່າງໆ; ການສົ່ງເສີມການຮ່ວມມືທາງດ້ານເສດຖະກິດ, ການຄ້າ, ການລົງທຶນລະຫວ່າງປະເທດ; ບັນຫາຄວາມໝັ້ນຄົງທາງສະບຽງອາຫານ ແລະ ບໍລິຫານຈັດການຄວາມສ່ຽງ; ບົດບາດຂອງບັນດາຂອບການຮ່ວມມືທີ່ມີຄວາມສຳຄັນ ເປັນຕົ້ນ ກຸ່ມປະເທດ BRICS, EAEU, ອາຊຽນ, ກຸ່ມປະເທດຂົງເຂດອາຊີ, ອາຟຣິກາ ແລະ ປະເທດໃນຕາເວັນອອກກາງ, ແລະ ບັນຫາອື່ນໆ. ໃນກອງປະຊຸມ SPIEF 2025 ນີ້, ຍັງມີການຈັດງານວາງສະແດງຂອງບັນດາຫົວໜ່ວຍທຸລະກິດ, ຜູ້ຜະລິດ, ຜູ້ປະກອບການ, ບັນດາບໍລິສັດ ແລະ ຜູ້ດຳເນີນທຸລະກິດໃນຂະແໜງການຕ່າງໆທີ່ນຳໜ້າ, ມີຊື່ສຽງ ແລະ ບົດບາດສໍາຄັນ ໃນການພັດທະນາເສດຖະກິດ ຢູ່ພາຍໃນປະເທດ ຣັດເຊຍ ແລະ ຕ່າງປະເທດຈຳນວນໜຶ່ງ ຊຶ່ງມີຜູ້ເຂົ້າຮ່ວມທັງໝົດ ຫຼາຍກວ່າ 20,000 ຄົນ ຈາກ 140 ປະເທດທົ່ວໂລກ.
 |
ໃນໂອກາດເຂົ້າຮ່ວມກອງປະຊຸມຄັ້່ງນີ້, ທ່ານຮອງນາຍົກລັດຖະມົນຕີ ໄດ້ເຂົ້າຮ່ວມເປັນຜູ້ສົນທະນາ (Panelists) ເພື່ອແລກປ່ຽນຄໍາຄິດເຫັນ ຮ່ວມກັບ ບັນດາຜູ້ນຳ, ຜູ້ວາງຍຸດທະສາດ, ນະໂຍບາຍ, ຜູ້ບໍລິຫານລະດັບສູງ, ນັກຄົ້ນຄວ້າ, ນັກເສດຖະສາດ, ນັກຊ່ຽວຊານ, ນັກວິຊາການ ຈາກປະເທດອື່ນໆ ໃນ 2 ຫົວຂໍ້ທີ່ສໍາຄັນຄື: ກອງປະຊຸມ ກ່ຽວກັບ ຂອບການຮ່ວມມືທາງເສດຖະກິດລະດັບພາກພື້ນ ອາຊຽນ-ຢູລາເຊຍ (EAEU-ASEAN Business Dialogue) ຊຶ່ງທາງເບື້ອງອົງການຮ່ວມມື ຢູລາຊຽນ ປະກອບມີປະເທດສະມາຊິກ ຄື: ຣັດເຊຍ, ເບລາຣຸດຊີ, ກາຊັກສະຖານ, ອາກເມນີ ແລະ ກຽກກິດສະຖານ. ຕໍ່ກັບຫົວຂໍ້ນີ້, ທ່ານ ສະເຫຼີມໄຊ ກົມມະສິດ ໄດ້ຍົກໃຫ້ເຫັນເຖິງບົດບາດຄວາມສຳຄັນ ແລະ ບັນດາທ່າແຮງຂອງທັງສອງອົງການ ສຳລັບການຮ່ວມມືເພື່ອການພັດທະນາ ແລະ ທິດທາງເພື່ອເສີມຂະຫຍາຍ ແລະ ຮັດແໜ້ນການຮ່ວມມືໃນຕໍ່ໜ້າ. ພ້ອມທັງ ໄດ້ຍົກໃຫ້ເຫັນຜົນສຳເລັດຂອງການເປັນປະທານໝູນວຽນອາຊຽນ ຂອງ ສປປ ລາວ ໃນປີ 2024 ແລະ ບັນດາຜົນສຳເລັດອື່ນໆ. ພ້ອມນີ້, ຍັງໄດ້ເຂົ້າຮ່ວມກອງປະຊຸມພາຍໃຕ້ຫົວຂໍ້ ອະນາຄົດຂອງລະບົບການເງິນສາກົນ (The Future of the International Financial System) ຊຶ່ງໄດ້ຕີລາຄາສະພາບການຂອງລະບົບການເງິນໃນປັດຈຸບັນ ທີ່ໄດ້ຮັບການສ້າງຕັ້ງຂຶ້ນນັບແຕ່ປີ 1966 ແມ່ນບໍ່ມີຄວາມສະເໝີພາບເທົ່າທີ່ຄວນ ແລະ ບໍ່ສອດຄອງກັບຍຸກສະໄໝ ທີ່ມີຄວາມກ້າວໜ້າ ທາງດ້ານເຕັກໂນໂລຊີຫຼາຍຂຶ້ນ; ສະນັ້ນ, ຄວນມີການປະຕິຮູບລະບົບການເງິນຄືນໃໝ່ ທີ່ມີທາງເລືອກຫຼາຍຂຶ້ນ ຮັບປະກັນຄວາມປອດໄພ, ຄວາມໝັ້ນຄົງ, ຄວາມວ່ອງໄວ, ສາມາດຊຳລະດ້ວຍສະກຸນເງິນອື່ນໆ ຫຼື ເງິນທ້ອງຖິ່ນໃນການຄ້າຂາຍສອງຝ່າຍກັບປະເທດໃກ້ຄຽງ ໂດຍສະເພາະ ແມ່ນເພື່ອຫຼຸດຜ່ອນການເອື່ອຍອີງໃສ່ແຕ່ສະກຸນເງິນໂດລາ ແລະ ລະບົບ SWIFT.
 |
ນອກຈາກນີ້, ທ່ານ ສະເຫຼີມໄຊ ກົມມະສິດ ແລະ ຄະນະ ຍັງໄດ້ເຂົ້າຮ່ວມກອງປະຊຸມ ພາກຄົບຄະນະ (Plenary Session) ທີ່ໄດ້ຮັບກຽດເຂົ້າຮ່ວມໂດຍ ທ່ານ ປູຕິນ ປະທານາທິບໍດີ ສະຫະພັນ ຣັດເຊຍ ພ້ອມດ້ວຍແຂກຖືກຮັບເຊີນພິເສດ ຄື: ທ່ານ Prabowo Subianto ປະທານາທິບໍດີ ອິນໂດເຊຍ, ທ່ານ Sheikh Nasser bin Hamad Al Khalifa ແຫ່ງ ຣາຊະອານາຈັກ ບາເລັນ, ທ່ານ Ding Xuexiang ຮອງນາຍົກລັດຖະມົນຕີ ສປ ຈີນ ແລະ ທ່ານ Paul Mashatile ຮອງປະທານາທິບໍດີອາຟຣິກາໃຕ້. ໃນກອງປະຊຸມພາກດັ່ງກ່າວນີ້, ປະທານາທິບໍດີ ປູຕິນ ໄດ້ຂຶ້ນກ່າວຄຳເຫັນ ທີ່ສຸມໃສ່ຫຼາຍບັນຫາສຳຄັນພົ້ນເດັ່ນ ເປັນຕົ້ນ ສະພາບການພັດທະນາເສດຖະກິດພາກພື້ນ ແລະ ໃນໂລກ ໂດຍສະເພາະ ແມ່ນສະພາບການພັດທະເສດຖະກິດ, ການດໍາເນີນທຸລະກິດ, ການຄ້າ, ການລົງທຶນ ແລະ ການຈັດຕັ້ງປະຕິບັດວຽກງານໃນຂະແໜງການຕ່າງໆ ຂອງ ຣັດເຊຍ ໃນປັດຈຸບັນ ທີ່ຍັງມີຄວາມເຂັ້ມແຂງ ແລະ ກ້າວໜ້າຂຶ້້ນໄປຢ່າງບໍ່ຢຸດຢັ້ງ ທ່າມກາງສະພາບຄວາມຫຍຸ້ງຍາກຕ່າງໆ ແລະ ສິ່ງທ້າທາຍ ທີ່ເກີດຂຶ້ນໃນໂລກ. ພ້ອມດຽວກັນ, ບັນດາແຂກກຽດຕິມະສັກທີ່ຖືກເຊີນເຂົ້າຮ່ວມ ຍັງໄດ້ຂຶ້ນມີຄໍາເຫັນຖັດຈາກ ທ່ານ ປະທານາທິບໍດີ ປູຕິນ.
ໃນໄລຍະການມາເຂົ້າຮ່ວມກອງປະຊຸມ, ທ່ານ ຮອງນາຍົກລັດຖະມົນຕີ ໄດ້ພົບປະສອງຝ່າຍກັບຄູ່ຮ່ວມຕຳແໜ່ງ ທ່ານ ອາເລັກເຊ ໂອເວຣຊຸກ (Alexey Overchuk) ຮອງນາຍົກລັດຖະມົນຕີ ແຫ່ງ ສະຫະພັນຣັດເຊຍ ເພື່ອປຶກສາຫາລືສືບຕໍ່ຮັດແໜ້ນສາຍພົວພັນ ແລະ ການຮ່ວມມື ລະຫວ່າງ ສອງປະເທດ ລາວ-ຣັດເຊຍ, ແລະ ຍັງໄດ້ພົບປະກັບພາກທຸລະກິດທີ່ມີທ່າແຮງ ຂອງ ຝ່າຍຣັດເຊຍອີກຈຳນວນໜຶ່ງ ເພື່ອປຶກສາຫາລື, ແລກປ່ຽນຂໍ້ມູນຂ່າວສານ ສຳລັບ ການຮ່ວມມືໃນຂົງເຂດທຸລະກີດ ເພື່ອສົ່ງເສີມ ແລະ ດຶງດູດການຄ້າ ແລະ ການລົງທຶນມາສູ່ ສປປ ລາວ ໃຫ້ຫຼາຍຂຶ້ນໃນອານາຄົດ.
(ຂ່າວ-ພາບ: ຫສນຍ)
ຄໍາເຫັນ