(ສພຊ) ຕອບສະໜອງການເຊື້ອເຊີນຂອງທ່ານ ເມິງຄບາທາຣ ລັກຄະວາ ຮອງປະທານສະພາຄູຣານໃຫຍ່ ແຫ່ງ ມົງໂກລີ ແລະ ເພື່ອເປັນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືທີ່ດີ ລະຫວ່າງ ສປປ ລາວ-ມົງໂກລີ ເວົ້າລວມ, ເວົ້າສະເພາະ ລະຫວ່າງສອງອົງການນິຕິບັນຍັດ. ໃນວັນທີ 15 ມີນາ 2024 ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເດີນທາງຢ້ຽມຢາມ ແລະ ເຮັດວຽກຢູ່ມົງໂກລີ ຢ່າງເປັນທາງການ.
ໃນຕອນເຊົ້າວັນທີ 16 ມີນາ ຜ່ານມາ, ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ແຫ່ງ ສປປ ລາວ ໄດ້ມີການພົບປະສອງຝ່າຍກັບ ທ່ານ ເມິງຄບາທາຣ ລັກຄະວາ ຮອງປະທານສະພາຄູຣານໃຫຍ່ ແຫ່ງ ມົງໂກລີ ພ້ອມດ້ວຍຄະນະ.
ທ່ານຮອງປະທານສະພາຄູຣານໃຫຍ່ ແຫ່ງ ມົງໂກລີ ໄດ້ສະແດງຄວາມຕ້ອນຮັບອັນອັບອຸ່ນ ແລະ ຕີລາຄາສູງ ຕໍ່ການຢ້ຽມຢາມ ແລະ ເຮັດວຽກຂອງທ່ານຮອງປະທານສະພາແຫ່ງຊາດ ແຫ່ງ ສປປ ລາວ ພ້ອມດ້ວຍຄະນະໃນຄັ້ງນີ້ ຊຶ່ງເປັນການປະກອບສ່ວນສໍາຄັນໃຫ້ແກ່ການເພີ່ມພູນຄູນສ້າງສາຍພົວພັນຮ່ວມມືທີ່ມີມູນເຊື້ອມາເປັນເວລາ 60 ກວ່າປີ ໃຫ້ນັບມື້ນັບມີປະສິດທິຜົນຍິ່ງໆຂຶ້ນ ແລະ ໄດ້ລາຍງານໃຫ້ຄະນະຊາບກ່ຽວກັບບັນດາຜົນສໍາເລັດໃນການພັດທະນາດ້ານເສດຖະກິດຂອງມົງໂກລີ ໃນໄລຍະຜ່ານມາ.
ທ່ານຮອງປະທານສະພາແຫ່ງຊາດ ໄດ້ສະແດງຄວາມຮູ້ສຶກເປັນກຽດຢ່າງສູງທີ່ໄດ້ມີໂອກາດມາຢ້ຽມຢາມ ແລະ ເຮັດວຽກຢູ່ປະເທດມົງໂກລີເປັນຄັ້ງທຳອິດ ໃນນາມຮອງປະທານສະພາແຫ່ງຊາດ ແຫ່ງ ສປປ ລາວ ຊຸດທີ IX, ຕີລາຄາສູງຕໍ່ຜົນການຮ່ວມມືອັນເປັນມູນເຊື້ອທີ່ດີ ລະຫວ່າງ ລາວ-ມົງໂກລີ ເວົ້າລວມ, ເວົ້າສະເພາະ ລະຫວ່າງສອງອົງການນິຕິບັນຍັດ, ນອກຈາກນີ້ ຍັງໄດ້ແຈ້ງສະພາບທີ່ພົ້ນເດັ່ນ ໃນການພັດທະນາເສດຖະກິດຂອງ ສປປ ລາວ ໃຫ້ຝ່າຍມົງໂກລີ ໄດ້ຮັບຊາບ, ພ້ອມທັງໄດ້ຕີລາຄາສູງ ແລະ ຊົມເຊີຍຢ່າງຈິງໃຈຕໍ່ຜົນສໍາເລັດອັນ ໃຫຍ່ຫຼວງທີ່ປະຊາຊົນມົງໂກລີ ຍາດມາໄດ້ຕະຫຼອດໄລຍະຜ່ານມາ ຊຶ່ງເຫັນໄດ້ເສດຖະກິດມີການຂະຫຍາຍຕົວ, ລວມຍອດຜະລິດຕະພັນພາຍໃນ (GDP) ຂອງມົງໂກລີ ຂະຫຍາຍຕົວໃນອັດຕາ 6,8% ໃນປີ 2023, ຖານະບົດບາດຂອງມົງໂກລີ ນັບມື້ນັບພົ້ນເດັ່ນຂຶ້ນໃນເວທີພາກພື້ນ ແລະ ໃນໂລກ. ຫຼັງຈາກນັ້ນ, ທ່ານ ນາງ ສູນທອນ ໄຊຍະຈັກ ແລະ ທ່ານ ເມິງຄບາທາຣ ລັກຄະວາ ໄດ້ເຂົ້າຮ່ວມເປັນສັກຂີພິຍານພິທີລົງນາມ ໃນບົດບັນທຶກມອບ-ຮັບເຄື່ອງເຟີນີເຈີ ຂອງຂວັນຈາກສະພາແຫ່ງຊາດ ແຫ່ງ ສປປ ລາວ ມອບໃຫ້ແກ່ສະພາຄູຣານໃຫຍ່ ແຫ່ງ ມົງໂກລີ, ໂດຍຜູ້ລົງນາມຝ່າຍລາວແມ່ນ ທ່ານ ສິງຄໍາ ວົງພະຈັນ ຮອງເລຂາທິການສະພາແຫ່ງຊາດ ແຫ່ງ ສປປ ລາວ, ຝ່າຍມົງໂກລີ ແມ່ນ ທ່ານ ຊ. ບັດບາທາຣ ຮອງຫົວໜ້າຫ້ອງວ່າການສະພາຄູຣານໃຫຍ່ ແຫ່ງ ມົງໂກລີ.
ໃນຕອນເຊົ້າຂອງວັນດຽວກັນ, ທ່ານ ນາງ ສູນທອນ ໄຊຍະຈັກ ໄດ້ເຂົ້າຢ້ຽມຂໍ່ານັບ ທ່ານ ກອມບໍຈາວ ຊັງຕັງຊາທາຣ ປະທານສະພາຄູຣານໃຫຍ່ ແຫ່ງ ມົງໂກລີ ຊຶ່ງທ່ານປະທານສະພາຄູຣານໃຫຍ່ ແຫ່ງ ມົງໂກລີ ໄດ້ສະແດງຄວາມຕ້ອນຮັບອັນອັບອຸ່ນຕໍ່ການຢ້ຽມຢາມ ແລະ ເຮັດວຽກຂອງທ່ານຮອງປະທານສະພາແຫ່ງຊາດ ແຫ່ງ ສປປ ລາວ ພ້ອມດ້ວຍຄະນະ ໃນຄັ້ງນີ້ ທັງໄດ້ຕີລາຄາສູງຕໍ່ມູນເຊື້ອການພົວພັນຮ່ວມມືລະຫວ່າງ 2 ປະເທດ ກໍຄືລະຫວ່າງອົງການນິຕິບັນຍັດຂອງ 2 ປະເທດ ຕະຫຼອດໄລ ຍະຜ່ານມາ.
ທ່ານຮອງປະທານສະພາແຫ່ງຊາດ ແຫ່ງ ສປປ ລາວ ໄດ້ສະແດງຄວາມຂອບໃຈຕໍ່ການຕ້ອນຮັບທີ່ອົບອຸ່ນ, ສະໜິດສະໜົມ ຂອງປະທານສະພາຄູຣານໃຫຍ່ ແຫ່ງ ມົງໂກລີ ຊຶ່ງການຢ້ຽມຢາມ ແລະ ເຮັດວຽກຂອງຄະນະຜູ້ແທນສະພາແຫ່ງຊາດ ແຫ່ງ ສປປ ລາວ ຄັ້ງນີ້ ເປັນການປະກອບສ່ວນເສີມຂະຫຍາຍສາຍພົວພັນທີ່ເປັນມູນເຊື້ອດີງາມລະຫວ່າງປະຊາຊົນ 2 ຊາດພວກເຮົາ; ທ່ານຍັງໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ ແລະ ຄໍາອວຍພອນໄຊອັນປະເສີດຈາກ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ ໄປຍັງທ່ານປະທານສະພາຄູຣານໃຫຍ່; ທ່ານໄດ້ສະແດງຄວາມຊົມເຊີຍທີ່ໄດ້ເຫັນຜົນສຳເລັດຮອບດ້ານໃນການພັດທະນາປະເທດມົງໂກລີ ອັນໄດ້ເຮັດໃຫ້ໃບໜ້າຂອງປະເທດຊາດມີການປ່ຽນແປງຢ່າງຫຼວງຫຼາຍ, ເສດຖະກິດມີການພັດທະນາ, ຊີວິດການເປັນຢູ່ຂອງປະຊາຊົນນັບມື້ໄດ້ຮັບການປັບປຸງດີຂຶ້ນ, ບົດບາດອິດທິພົນຂອງປະເທດມົງໂກລີໃນເວທີພາກພື້ນ ແລະ ສາກົນ ນັບມື້ນັບສູງຂຶ້ນ.
ທ່ານຮອງປະທານສະພາແຫ່ງຊາດລາວ ຍັງໄດ້ລາຍງານກ່ຽວ ກັບການພົບປະກັບທ່ານຮອງປະທານສະພາຄູຣານໃຫຍ່ ແຫ່ງ ມົງໂກລີ ຊຶ່ງທັງສອງຝ່າຍໄດ້ມີການປຶກສາຫາລື ແລະ ແລກປ່ຽນບົດຮຽນກັນຫຼາຍບັນຫາ ແນໃສ່ຊຸກຍູ້ ແລະ ສົ່ງເສີມການພົວພັນຮ່ວມມືຊຶ່ງກັນ ແລະ ກັນໃນຂົງເຂດນິຕິບັນຍັດ, ການຄ້າ, ການລົງທຶນ, ການທ່ອງທ່ຽວ ແລະ ອື່ນໆ; ທ່ານຮອງປະທານສະພາແຫ່ງຊາດລາວ ໄດ້ສະແດງຄວາມຂອບໃຈ ແລະ ຮູ້ບຸນຄຸນຕໍ່ການຊ່ວຍເຫຼືອ, ສະໜັບສະໜູນຂອງປະຊາຊົນມົງໂກລີ ໃຫ້ແກ່ປະຊາຊົນລາວ ຕະຫຼອດໄລຍະຜ່ານມາ.
ຂ່າວ-ພາບ: ສະພາແຫ່ງຊາດ
ຄໍາເຫັນ