ໄດ້ຈັດຂະບວນການປຸກລະດົມຊຸມຊົນເປັນເຈົ້າການເຮັດອະນາໄມ ທໍາລາຍແຫຼ່ງເພາະພັນໜອນນໍ້າຍຸງລາຍຢູ່ໃນຊຸມຊົນ ທັງຢູ່ສູນກາງ ແລະ ທ້ອງຖິ່ນ ແນໃສ່ເພື່ອປ້ອງກັນການແຜ່ລະບາດຂອງພະຍາດໄຂ້ຍຸງລາຍໃນໄລຍະດັ່ງກ່າວ ໃຫ້ລົດໜ້ອຍຖອຍລົງເທື່ອລະກ້າວ.
ປັດຈຸບັນເລີ່ມກ້າວເຂົ້າສູ່ລະດູຝົນ, ບາງມື້ອາກາດຮ້ອນອົບເອົ້າ, ບາງມື້ມີຝົນຕົກ ເຮັດໃຫ້ໜ້າດິນມີຄວາມຊຸມຊື່ນ ສິ່ງສຳຄັນຝົນຕົກຍັງພາໃຫ້ເກີດມີນໍ້າອັ່ງ-ຂັງຕາມພາຊະນະຕ່າງໆ ຊຶ່ງເປັນໂອກາດດີ ແກ່ການວາງໄຂ່ຂອງໂຕຍຸງ ພາໃຫ້ເກີດການແຜ່ລະບາດຂອງພະຍາດໄຂ້ຍຸງລາຍ. ສະນັ້ນ, ທົ່ວສັງຄົມຕ້ອງຮ່ວມແຮງຮ່ວມໃຈກັນຕ້ານພະຍາດໄຂ້ຍຸງລາຍ ໂດຍສະເພາະການກຳຈັດແຫຼ່ງເພາະພັນ ໜອນນໍ້າຍຸງລາຍ ຖ້າບໍ່ມີໜອນນໍ້າ ບໍ່ມີຍຸງລາຍ ບໍ່ມີໄຂ້ຍຸງລາຍ. ວິທີປ້ອງກັນທີ່ດີທີ່ສຸດສໍາລັບການກຳຈັດແຫຼ່ງເພາະພັນຍຸງລາຍ ແມ່ນກໍາຈັດບ່ອນວາງໄຂ່ຂອງຍຸງລາຍ ເປັນຕົ້ນແຫຼ່ງທີ່ຢູ່ອາໄສຂອງຍຸງລາຍທີ່ເຮົາຕ້ອງຈໍາກັດມີຄື: ຖ້າຢູ່ໃນເຮືອນ ຕ້ອງກໍາຈັດບ່ອນເພາະພັນຍຸງລາຍຕາມບໍລິເວນຖ້ວຍຮອງຕີນຕູ້, ໂຖດອກໄມ້ ແລະ ຈານຮອງ, ຖັງເກັບນໍ້າໃສ່, ນໍ້າກິນ ຫຼື ຖັງໃນຫ້ອງນໍ້າ, ພາຊະນະທີ່ເປັນຢາງພລາສຕິກ, ກະປ໋ອງ ແລະ ອື່ນໆ. ຖ້າຢູ່ນອກເຮືອນ ຕ້ອງເກັບມ້ຽນ ຫຼື ຖິ້ມກະປ໋ອງທີ່ບໍ່ໄດ້ໃຊ້, ຢາງຕີນລົດເກົ່າ, ພາຊະນະທີ່ບັນຈຸນໍ້າ, ຕົ້ນໄມ້ທີ່ເປັນຮູ ຫຼື ໂກນ, ຂຸມ, ສະຖານທີ່ກໍ່ສ້າງ, ຝຸ້ຍເກັບນໍ້າຝົນ, ເປືອກຫອຍ, ເປືອກໄມ້, ໃບໄມ້ທີ່ສາມາດເປັນບ່ອນເກັບນໍ້າ, ເຮືອ ແລະ ອຸປະກອນອື່ນໆ, ພາຊະນະທີ່ບັນຈຸນໍ້າຝົນ ຫຼື ໃຊ້ສໍາລັບເກັບນໍ້າຄວນຈະປົກປິດ ຫຼື ຖີ້ມໃຫ້ຖືກຕ້ອງ. ສ່ວນພາຊະນະອື່ນໆຄວນຈະບໍ່ໃຫ້ມີນໍ້າຂັງຕ້ອງອະນາໄມ ແລະ ຮຸກຖູ ເພື່ອກຳຈັດໄຂ່ຍຸງ ຢ່າງໜ້ອຍອາທິດລະຄັ້ງ. ໃນຄວາມເປັນຈິງການມີສ່ວນຮ່ວມຂອງຊຸມຊົນແມ່ນເປັນມາດຕະການປ້ອງກັນທີ່ສໍາຄັນ ທຸກໆຄອບຄົວມີເປົ້າໝາຍໃນການລົດຄວາມໜາແໜ້ນຂອງຍຸງລາຍ ກໍຈະສາມາດລົດອັດຕາການຕິດເຊື້ອ ຫຼື ຢຸດການສົ່ງເຊື້ອພະຍາດດັ່ງກ່າວໄດ້. ພ້ອມນັ້ນ, ເພື່ອປ້ອງກັນພະຍາດໄຂ້ຍຸງລາຍ ທີ່ສັງຄົມຍັງເຮັດໄດ້ຄືການປະຕິບັດຫຼັກການ 5 ປ ທີ່ກະຊວງສາທາລະນະສຸກວາງອອກຄື: ປິດ ຝາພາຊະນະທີ່ເກັບນໍ້າໃນເຮືອນ ແລະ ນອກເຮືອນ ເພື່ອບໍ່ໃຫ້ຍຸງມາວາງໄຂ່ໃສ່; ປ່ຽນນໍ້າ ແລະ ຜັດຖູພາຊະນະເຊັ່ນ: ເຕົ້າດອກໄມ້, ນໍ້າຮອງຕີນຕູ້, ຖ້ານຮອງຈາກນໍ້າ ແລະ ອື່ນໆ; ປ່ອຍ ປາຫາງນົກຍຸງ ເພື່ອກິນໜອນນໍ້າ; ປັບປຸງ ບໍ່ໃຫ້ມີນໍ້າຄ້າງຂັງກະໂປະ, ກະປ໋ອງ, ຮາງລິນ, ຢາງຕີນລົດເກົ່າ ແລະ ຝາຕຸກນໍ້າ; ປະຕິບັດ ເປັນປະຈຳທຸກໆອາທິດ ແລະ ຖ້າເປັນໄຂ້ໃຫ້ໄປປິ່ນປົວຢູ່ໂຮງໝໍ ຫຼື ໂຮງໝໍໃກ້ບ້ານທ່ານ. ມາຮອດວັນທີ 25 ພຶດສະພາ 2025 ທົ່ວປະເທດມີຜູ້ຕິດເຊື້ອພະຍາດໄຂ້ຍຸງສະສົມ 1,175 ຄົນ ຕິດເຊື້ອໃໝ່ 2 ຄົນ, ບໍ່ມີຜູ້ເສຍຊີວິດ, ສ່ວນແຂວງທີ່ຕິດເຊື້ອພະຍາດໄຂ້ຍຸງຫຼາຍກວ່າໝູ່ແມ່ນນະຄອນຫຼວງວຽງຈັນ 388 ຄົນ, ຫຼວງນໍ້າທາ 143 ຄົນ, ແຂວງເຊກອງ 142 ຄົນ ແລະ ແຂວງອື່ນໆຕາມລໍາດັບ.
ສະຫຼຸບລວມແລ້ວ, ການຮ່ວມແຮງຮ່ວມໃຈກັນຕ້ານພະຍາດໄຂ້ຍຸງລາຍແມ່ນເປັນໜ້າທີ່ຂອງໝົດທຸກຄົນໃນສັງຄົມ, ຖ້າທຸກຄົນມີສະຕິປ້ອງກັນພະຍາດດັ່ງກ່າວ ກໍຈະບໍ່ເກີດຂຶ້ນກັບຕົວທ່ານ, ຄົນທີ່ທ່ານຮັກ, ຄອບຄົວ ແລະ ອື່ນໆ.
ຄໍາເຫັນ