 |
ໃນໂອກາດດັ່ງກ່າວ, ທ່ານ ບຸນເຫຼືອ ພັນດານຸວົງ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ຜົນສໍາເລັດໃນການປະຕິບັດໜ້າທີ່ທາງການທູດ ຢູ່ ສປປ ລາວ ຂອງ ທ່ານ ນາງ ເມວ ບາໂລໃນໄລຍະເວລາ 3 ປີຜ່ານມາ ຊຶ່ງທ່ານທູດ ໄດ້ເຄື່ອນໄຫວຢ່າງຫ້າວຫັນ ແລະ ປະກອບສ່ວນສໍາຄັນເຂົ້າໃນການຊຸກຍູ້, ສົ່ງເສີມການພົວພັນຮ່ວມມືລະຫວ່າງ ອັງກິດ ແລະ ສປປ ລາວ ໃຫ້ມີຄວາມແໜ້ນແຟ້ນ ແລະ ເຕີບໃຫຍ່ຂະຫຍາຍຕົວເປັນກ້າວໆ. ພ້ອມນີ້, ກໍໄດ້ສະແດງຄວາມຂອບໃຈຕໍ່ການສະໜັບສະໜູນຊ່ວຍເຫຼືອຈາກປະ ຊາຊົນ ແລະ ລັດຖະບານອັງກິດໃນໄລຍະຜ່ານມາ ຊຶ່ງໄດ້ປະກອບສ່ວນສຳຄັນເຂົ້າໃນການສ້າງສາ ແລະ ພັດທະນາ ສປປ ລາວ.
ໂອກາດນີ້, ທ່ານ ນາງ ເມວ ບາໂລ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນໃນຄັ້ງນີ້ ແລະ ສະແດງຄວາມຂອບໃຈ ຕໍ່ ຄະນະພົວພັນຕ່າງປະເທດສູນກາງພັກ ກໍຄື ການນໍາພັກ-ລັດ ຂອງລາວ ທີ່ໄດ້ອໍານວຍຄວາມສະດວກ ແລະ ໃຫ້ການຮ່ວມມືເປັນຢ່າງດີ ຕະຫຼອດໄລຍະການປະຕິບັດໜ້າທີ່ການທູດຂອງຕົນ ຢູ່ ສປປ ລາວ ຈົນປະສົບຜົນສໍາເລັດຢ່າງຈົບງາມ. ນອກນີ້, ທ່ານທູດ ຍັງໄດ້ສະແດງຄວາມຊົມເຊີຍຕໍ່ຜົນສຳເລັດຂອງ ສປປ ລາວ ທີ່ຍາດມາໄດ້ໃນໄລຍະຜ່ານມາ ແລະ ຢືນຢັນວ່າ ຈະສືບຕໍ່ປະກອບສ່ວນເຂົ້າໃນການເສີມຂະຫຍາຍການພົວພັນສອງຝ່າຍ ໃຫ້ນັບມື້ແໜ້ນແຟ້ນ ແລະ ເກີດດອກອອກຜົນຍິ່ງໆຂຶ້ນ.
ໃນວັນດຽວກັນ, ທ່ານ ບຸນເຫຼືອ ພັນດານຸວົງ ກໍໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ເຄັນ ວາຊອງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງການາດາ ປະຈຳ ສປປ ລາວ, ໃນໂອກາດດັ່ງກ່າວ ທ່ານ ບຸນເຫຼືອ ພັນດານຸວົງ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງ ທີ່ທ່ານ ເຄັນ ວາຊອງ ໄດ້ຮັບການແຕ່ງຕັ້ງໃຫ້ດໍາລົງຕໍາແໜ່ງເປັນ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ການາດາ ປະຈໍາ ສປປ ລາວ, ພ້ອມທັງຊົມເຊີຍຕໍ່ການເຄື່ອນໄຫວຢ່າງຫ້າວຫັນຂອງທ່ານທູດ ໃນການປະກອບສ່ວນຊຸກຍູ້ ແລະ ເສີມຂະຫຍາຍການພົວພັນຮ່ວມມື ລະຫວ່າງ ສປປ ລາວ ແລະ ການາດາ. ພ້ອມນີ້, ຍັງໄດ້ສະແດງຄວາມຂອບໃຈຕໍ່ການຊຸກຍູ້ ແລະ ສົ່ງເສີມການຮ່ວມມືດ້ານການຄ້າເສລີອາຊຽນ (FTA) ໃນຂອບການຮ່ວມມື ອາຊຽນ-ການາດາ ແລະ ການສົ່ງເສີມການຄ້າ-ການລົງທຶນ ສອງຝ່າຍ ທີ່ ການາດາໄດ້ຈັດຕັ້ງປະຕິບັດ ລະຫວ່າງ ກະຊວງກ່ຽວຂ້ອງຂອງລາວ ກັບ ຫ້ອງການສະພາການຄ້າ ການາດາ ປະຈໍາ ສປປ ລາວ (Canadian Chambers of Commerce) ແລະ ສະແດງຄວາມຂອບໃຈ ລັດຖະບານ ແລະ ປະຊາຊົນການາດາ ທີ່ໃຫ້ທຶນຊ່ວຍເຫຼືອໂຄງການຕ່າງໆ ໃຫ້ແກ່ ສປປ ລາວ ຢ່າງຕໍ່ເນື່ອງ ໂດຍຜ່ານອົງການຈັດຕັ້ງ ພາກພື້ນ ແລະ ສາກົນ ເຊັ່ນ: ວຽກງານເກັບກູ້ລະເບີດບໍ່ທັນແຕກ (UXO), ການພັດທະນາຊັບພະຍາກອນມະນຸດຜ່ານທຶນການສຶກສາ SEED ແລະ ການຊ່ວຍເຫຼືອດ້ານມະນຸດສະທຳຕ່າງໆ. ສປປ ລາວ ມີຄວາມຍິນດີຕ້ອນຮັບ ນັກລົງທຶນ ແລະ ນັກທ່ອງທ່ຽວ ຈາກ ການາດາ. ພ້ອມນັ້ນ, ຫົວໜ້າ ຄະນະພົວພັນຕ່າງປະເທດສູນກາງພັກ ຍັງໄດ້ແຈ້ງໃຫ້ຊາບ ກ່ຽວກັບພາລະບົດບາດ, ຄວາມຮັບຜິດຊອບ ຂອງ ຄະນະພົວພັນຕ່າງປະເທດສູນກາງພັກ ແລະ ພ້ອມທີ່ຈະໃຫ້ການຮ່ວມມື ແລະ ສະໜັບສະໜູນ ການເຄື່ອນ ໄຫວຂອງສະຖານທູດຕາມພາລະບົດບາດຂອງຄະນະພົວພັນຕ່າງປະເທດສູນກາງພັກ ເພື່ອປະກອບສ່ວນເສີມຂະຫຍາຍ ແລະ ພັດທະນາສາຍພົວພັນ ລາວ ແລະ ການາດາ ໃຫ້ນັບມື້ພັດທະນາຂຶ້ນໄປເລື້ອຍໆ.
(ຂ່າວ: ຄຕພ)
ຄໍາເຫັນ