ກ່າວຄຳເຫັນໃນພິທີເປີດ, ທ່ານ ເລມິງຮຶງ ນາຍົກລັດຖະມົນຕີຫວຽດນາມ ຢັ້ງຢືນວ່າ: ອາຊຽນ ພວມຢືນຢູ່ຕໍ່ໜ້າຈຸດເວລາທີ່ມີຄວາມໝາຍ ເປັນບາດລ້ຽວໃນວິວັດການພັດທະນາ, ເມື່ອບັນດາຫຼັກການພື້ນຖານຂອງເສດຖະກິດ, ເຕັກໂນໂລຊີ ແລະ ສິດອຳນາດທົ່ວໂລກພວມໄດ້ຮັບການກຳນົດຄືນໃໝ່. ທ່ານນາຍົກລັດຖະມົນຕີຫວຽດນາມ ກ່າວວ່າ: ໃນຊຸມທົດສະວັດຈະມາເຖິງ ຈະແມ່ນວິວັດການສ້າງອະນາຄົດ ອາຊຽນ ໃນສະພາບການໂລກມີການປ່ຽນແປງຢ່າງເລິກເຊິ່ງ.

ເພື່ອປະຕິບັດຄວາມມຸ່ງຫວັງນັ້ນໃຫ້ປະກົດຜົນເປັນຈິງ, ທ່ານນາຍົກລັດຖະມົນຕີຫວຽດນາມ ເນັ້ນໜັກວ່າ: ອາຊຽນຕ້ອງສືບຕໍ່ເສີມຂະຫຍາຍຈິດໃຈສາມັກຄີ, ສ້າງຄວາມເຂັ້ມແຂງດ້ວຍຕົນເອງ, ເປັນເອກະພາບໃນຄວາມຫຼາຍຮູບ ຫຼາຍແບບ ແລະ ບັນດາຄຸນຄ່າສ້າງຜົນສຳເລັດຂອງຕົນ ດ້ວຍວິທີການເຂົ້າເຖິງທີ່ມີຫົວຄິດປະດິດສ້າງກວ່າເກົ່າ, ເຫັນດີເຫັນພ້ອມກ່ຽວກັບບັນດາຄຸນຄ່າ ແຕ່ມີຄວາມຂະຫຍັນຂັບເຄື່ອນໃນການກະທຳ, ຢຶດໝັ້ນຕໍ່ຫຼັກການ ແຕ່ປ່ຽນແປງໃໝ່ວິທີການເຮັດ, ຮັກສາສີສັນຢ່າງໝັ້ນຄົງ ແຕ່ມີຄວາມເປັນເຈົ້າການສ້າງກາລະໂອກາດຕໍ່ການປ່ຽນແປງຂອງຍຸກສະໄໝ ໃໝ່.

ບົນເສັ້ນທາງແຫ່ງການຜັນຂະຫຍາຍວິໄສທັດປະຊາຄົມ ອາຊຽນ 2045, ທ່ານນາຍົກລັດຖະມົນຕີຫວຽດນາມ ສະເໜີ ອາຊຽນ ຕ້ອງກ້າວໄປສູ່ 3 ຍຸດທະສາດ ຄື: ໜຶ່ງ, ອາຊຽນ ບໍ່ພຽງແຕ່ເຂົ້າຮ່ວມບັນດາທ່າອ່ຽງທົ່ວໂລກເທົ່ານັ້ນ ຫາກຍັງປະກອບສ່ວນກຳນົດທິດບັນດາທ່າອ່ຽງນັ້ນ. ສອງ, ອາຊຽນ ບໍ່ພຽງແຕ່ແມ່ນສູນການຜະລິດເທົ່ານັ້ນ ແຕ່ຕ້ອງກາຍເປັນສູນນະວັດຕະກຳອີກດ້ວຍ. ທ່ານໃຫ້ຮູ້ວ່າ: ອາຊຽນ ບໍ່ພຽງແຕ່ແມ່ນບ່ອນຊົມໃຊ້ເຕັກໂນໂລຊີເທົ່ານັ້ນ ຫາກຍັງຕ້ອງກາຍເປັນບ່ອນສ້າງເຕັກໂນໂລຊີອີກດ້ວຍ, ບໍ່ພຽງແຕ່ແມ່ນບ່ອນບັນດາລະບົບສະໜອງເດີນຜ່ານ ຫາກຍັງຕ້ອງກາຍເປັນບ່ອນສ້າງບັນດາລະບົບສະໜອງ. ເພາະສະນັ້ນ, ອາຊຽນຕ້ອງລົງທຶນຢ່າງແຮງກວ່າເກົ່າໃຫ້ວິທະຍາສາດເຕັກໂນໂລຊີ, ນະວັດຕະກຳ, ເສດຖະກິດດີຈີຕອນ ແລະ ພັດທະນາແຫຼ່ງຊັບພະຍາກອນມະນຸດທີ່ມີຄຸນນະພາບສູງ, ກ້າວໄປເຖິງການສ້າງລະບົບນິເວດເຕັກໂນໂລຊີ ແລະ ຫັນເປັນດີຈີຕອນທີ່ມີສີສັນອາຊຽນ, ພ້ອມທັງປະກອບສ່ວນຢ່າງຕັ້ງໜ້າເຂົ້າໃນການສ້າງບັນດາມາດຖານລວມຂອງໂລກ. ສາມ, ອາຊຽນບໍ່ພຽງແຕ່ແມ່ນປະຊາຄົມຂອງບັນດາປະເທດເທົ່ານັ້ນຫາກຍັງຕ້ອງເປັນປະຊາຄົມຂອງປະຊາຊົນຢ່າງແທ້ຈິງອີກດ້ວຍ.