ໃນຕອນບ່າຍວັນທີ 6 ພຶດສະພາ ຢູ່ນະຄອນຫຼວງນິວເດລີ, ທ່ານ ໂຕເລິມ ເລຂາທິການໃຫຍ່ ປະທານປະເທດຫວຽດນາມ ແລະ ທ່ານ ນາເຣນດາ ໂມດີ ນາຍົກລັດຖະມົນຕີອິນເດຍ ໄດ້ມີການພົບປະສອງຝ່າຍ. ໂດຍສອງຝ່າຍໄດ້ເນັ້ນໜັກເຖິງຄວາມສຳຄັນຂອງການເຮັດໃຫ້ສາຍພົວພັນ ຫວຽດນາມ - ອິນເດຍ ເລິກເຊິ່ງກວ່າເກົ່າ, ປະກອບສ່ວນສຳຄັນເຂົ້າໃນການປະຕິບັດບັນດາເປົ້າໝາຍພັດທະນາຂອງແຕ່ລະປະເທດ. ການນຳສອງທ່ານຕົກລົງເປັນເອກະພາບຍົກລະດັບສາຍພົວພັນສອງຝ່າຍ ຫວຽດນາມ - ອິນເດຍ ຂຶ້ນເປັນຄູ່ຮ່ວມມືຍຸດທະສາດຮອບດ້ານແບບເພີ່ມທະວີ.
ທ່ານ ໂຕເລິມ ແລະ ທ່ານ ນາເຣນດາ ໂມດີ ເຫັນດີເປັນເອກະພາບຮັກສາການພົບປະທຸກຂັ້ນເປັນປະຈຳ, ພິເສດແມ່ນການພົບປະຂັ້ນສູງ. ສອງຝ່າຍເຫັນດີເປັນເອກະພາບວາງເປົ້າໝາຍຮອດປີ 2030 ວົງເງິນການຄ້າສອງຝ່າຍບັນລຸ
25 ຕື້ໂດລາ ແລະ ສອງຝ່າຍຢັ້ງຢືນຄືນການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບແມ່ນເສົາຄ້ຳສຳຄັນຂອງການພົວພັນຄູ່ຮ່ວມມືຍຸດທະສາດແບບເພີ່ມທະວີ ຫວຽດນາມ - ອິນເດຍ.
ກ່າວຄຳເຫັນໃນການຖະແຫຼງຂ່າວພາຍຫຼັງການພົບປະສອງຝ່າຍ, ທ່ານ ໂຕເລິມ ໃຫ້ຮູ້ວ່າ: ຂ້າພະເຈົ້າເຫັນດີສືບຕໍ່ຍົກສູງສາຍພົວພັນສອງຝ່າຍຂຶ້ນເປັນຄູ່ຮ່ວມມືຍຸດທະສາດຮອບດ້ານແບບເພີ່ມທະວີ. ການຮ່ວມມືຢ່າງແທ້ຈິງຈະນຳການຮ່ວມມືລະຫວ່າງສອງປະເທດເຂົ້າສູ່ລວງເລິກຄື: ໜຶ່ງ, ແມ່ນສືບຕໍ່ເຮັດໃຫ້ຄວາມໄວ້ເນື້ອເຊື່ອໃຈດ້ານການເມືອງເລິກເຊິ່ງຂຶ້ນຕື່ມ. ສອງ, ແມ່ນຍົກລະດັບການຮ່ວມມືສາກົນດ້ານປ້ອງກັນຊາດ, ປ້ອງກັນຄວາມສະຫງົບໃຫ້ກາຍເປັນເສົາຄ້ຳຍຸດທະສາດ. ສາມ, ແມ່ນສ້າງການຫັນປ່ຽນຢ່າງຈະແຈ້ງກວ່າເກົ່າໃນການຮ່ວມມືດ້ານເສດຖະກິດ, ການຄ້າ ແລະ ການລົງທຶນ, ເປີດກວ້າງຕະຫຼາດໃຫ້ແກ່ກັນ. ສີ່, ແມ່ນຖືວິທະຍາສາດເຕັກໂນໂລຊີ, ນະວັດຕະກຳ ແລະ ການຫັນເປັນດີຈີຕອນເປັນກຳລັງໜູນໃໝ່ໃຫ້ແກ່ການຮ່ວມມື, ເປີດບັນດາຂົງເຂດພັດທະນາທີ່ມີມູນຄ່າເພີ່ມສູງ. ຫ້າ, ແມ່ນເພີ່ມທະວີການພົວພັນແລກປ່ຽນປະຊາຊົນ, ວັດທະນະທຳ, ການສຶກສາ, ສາສະໜາ, ປັບປຸງພື້ນຖານສັງຄົມແບບຍືນຍົງໃນສາຍພົວພັນຂອງສອງປະເທດ.
ທ່ານ ນາເຣນດາ ໂມດີ ຢັ້ງຢືນວ່າ: ສາຍພົວພັນທີ່ຫາກໍໄດ້ຍົກລະດັບຂຶ້ນນັ້ນ ແມ່ນພື້ນຖານເພື່ອໃຫ້ຫວຽດນາມ ແລະ ອິນເດຍ ພ້ອມກັນປະຕິບັດຄວາມຄາດຫວັງລວມ, ກາຍເປັນປະເທດພັດທະນາ.
ເນື່ອງໃນໂອກາດດັ່ງກ່າວ, ທ່ານ ໂຕເລິມ ແລະ ທ່ານ ນາເຣນດາ ໂມດີ ໄດ້ເປັນສັກຂີພິຍານພິທີລົງນາມ ແລະ ມອບເອກະສານຮ່ວມມືຫຼາຍສະບັບລະຫວ່າງບັນດາກະຊວງ, ຂະແໜງການ ແລະ ທ້ອງຖິ່ນຂອງສອງປະເທດ.
ໃນວັນດຽວກັນ, ສອງຝ່າຍໄດ້ອອກຖະແຫຼງການຮ່ວມ. ໃນຖະແຫຼງການຮ່ວມສອງຝ່າຍໄດ້ຢັ້ງຢືນມີການພົບປະຮອບດ້ານ ແລະ ແລກປ່ຽນກ່ຽວກັບສາຍພົວພັນສອງຝ່າຍ, ບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນ ໃຈ.
ການນຳສອງປະເທດໄດ້ເຫັນດີເປັນເອກະພາບສົ່ງເສີມການຜັນຂະຫຍາຍໂຄງການດຳເນີນງານ ຫວຽດນາມ - ອິນເດຍ ໄລຍະ 2024 – 2028 ແລະ ຖະແຫຼງການຮ່ວມສະບັບນີ້ຢ່າງມີປະສິດທິຜົນ ແລະ ຮ່ວມມືກັນໃນທຸກຂົງເຂດ ເສດຖະກິດ, ການຄ້າ ແລະ ການລົງທຶນ, ການປ້ອງກັນຊາດ, ປ້ອງກັນຄວາມສະຫງົບ, ການເດີນເຮືອ, ວິທະຍາສາດ ແລະ ເຕັກໂນໂລຊີ, ຮ່ວມມືກັນພັດທະນາ, ວັດທະນະທຳ, ການທ່ອງທ່ຽວ ແລະ ພົວພັນແລກປ່ຽນປະຊາຊົນ.
ຄໍາເຫັນ