ໃນການພົບປະ, ການນຳສອງທ່ານໄດ້ເຫັນດີເປັນເອກະພາບຊຸກຍູ້ການຮ່ວມມືໃນຫຼາຍຂົງເຂດ, ພິເສດ ແມ່ນໃນບັນດາຂົງເຂດທີ່ສອງຝ່າຍຕ້ອງຍູ້ແຮງການພັດທະນາໃນໄລຍະຈະມາເຖິງ ເຊັ່ນ: ເຕັກໂນໂລຊີຂໍ້ມູນຂ່າວສານ, ປ່າໄມ້, ເສດຖະກິດໝູນວຽນ, ຫັນເປັນສີຂຽວ, ການຮ່ວມມືພັດທະນາທະເລແບບຍືນຍົງ, ວິທະຍາສາດ - ເຕັກນິກ. ສອງຝ່າຍເຫັນດີເປັນເອກະສັນຂຸດຄົ້ນສັນຍາການຄ້າເສລີ ຫວຽດນາມ - EU (EVFTA), ສັນຍາອາລັກຂາການລົງທຶນລະຫວ່າງ ຫວຽດນາມ ແລະ ສະຫະພາບເອີຣົບ (EVIPA) ຢ່າງມີປະສິດທິຜົນ.
ສອງຝ່າຍເຫັນດີຍູ້ແຮງການຮ່ວມມືໃນບັນດາຂົງເຂດອື່ນໆເຊັ່ນ: ການສຶກສາ - ບໍາລຸງສ້າງ, ການຮ່ວມມືຂັ້ນທ້ອງຖິ່ນ, ການພົບປະແລກປ່ຽນປະຊາຊົນ. ການນຳສອງທ່ານເນັ້ນໜັກເຖິງຄວາມສຳຄັນຂອງການຮັກສາສັນຕິພາບ, ສະຖຽນລະພາບຢູ່ພາກພື້ນ ແລະ ໃນໂລກ; ສະໜັບສະໜູນຫຼັກໝັ້ນແກ້ໄຂບັນດາຂໍ້ຂັດແຍ້ງກັນໂດຍສັນຕິວິທີ, ບົນພື້ນຖານເຄົາລົບກົດໝາຍສາກົນ, ຄວບຄຸມ ແລະ ຢຸດຕິການປະທະກັນ. ກ່ຽວກັບບັນຫາທະເລຕາເວັນອອກ, ສອງຝ່າຍສະໜັບສະໜູນທັດສະນະລວມຂອງ ອາຊຽນ ໃນການແກ້ໄຂບັນດາຄວາມບໍ່ລົງລອຍກັນໂດຍສັນຕິວິທີ, ບົນພື້ນຖານກົດໝາຍສາກົນ.
ເນື່ອງໃນໂອກາດນີ້, ຫວຽດນາມ ແລະ ແຟງລັງ ໄດ້ອອກຖະແຫຼງການຮ່ວມກ່ຽວກັບສອງຝ່າຍຍົກລະດັບການພົວພັນ ຫວຽດນາມ - ແຟງລັງ ຂຶ້ນເປັນຄູ່ຮ່ວມມືຍຸດທະສາດ; ຢັ້ງຢືນບັນດາຫຼັກການ, ວາງອອກບັນດາກຳນົດທິດໃຫຍ່ເພື່ອຍູ້ແຮງ ແລະ ເພີ່ມທະວີການຮ່ວມມື, ພັດທະນາການພົວພັນມິດຕະພາບທີ່ເປັນມູນເຊື້ອ ແລະ ຄູ່ຮ່ວມມືຍຸດທະສາດ ຫວຽດນາມ - ແຟງລັງ.
ຄໍາເຫັນ