ການຢ້ຽມຢາມທາງລັດຖະກິດ ຫວຽດນາມ ຄັ້ງທຳອິດຂອງ ທ່ານ ລີແຈມຽງ ປະທານາທິບໍດີ ສ ເກົາຫຼີ, ພາຍຫຼັງສະພາແຫ່ງຊາດ ຫວຽດນາມ ຊຸດທີ 16 ບູລະນະກົງຈັກການນຳລັດສຳເລັດສົມບູນ.
ພາຍຫຼັງພິທີຕ້ອນຮັບ, ທ່ານ ໂຕເລິມ ເລຂາທິການໃຫຍ່ ປະທານປະເທດ ຫວຽດນາມ ແລະ ທ່ານ ລີແຈມຽງ ປະທານາທິບໍດີ ສ ເກົາຫຼີ ໄດ້ດຳເນີນການພົບປະສົນທະນາ.
ໃນການພົບປະສົນທະນາ, ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງກອມມູນິດ ຫວຽດນາມ ປະທານປະເທດ ຫວຽດນາມ ແລະ ທ່ານ ລີແຈມຽງ ປະທານາທິບໍດີ ສ ເກົາຫຼີ ໄດ້ເປັນເອກະພາບຫຼາຍເນື້ອໃນຮ່ວມມືສຳຄັນ, ໃນນັ້ນມີເລື່ອງສູ້ຊົນນຳວົງເງິນການຄ້າ 2 ຝ່າຍໃຫ້ບັນລຸ 150 ຕື້ໂດລາ ໃນປີ 2030.
ທ່ານ ລີແຈມຽງ ປາຖະໜາວ່າ ສ ເກົາຫຼີ ຈະມີບົດບາດແກ່ນສານໃນວິວັດການພັດທະນາອະນາຄົດຂອງ ຫວຽດນາມ. ການນຳ 2 ທ່ານໄດ້ເຫັນດີເພີ່ມທະວີການຮ່ວມມືຢ່າງຮອບດ້ານໃນຫຼາຍຂົງເຂດ, ພິເສດແມ່ນໃນຂົງເຂດປັນຍາປະດິດ (AI), ໂທລະຄົມມະນາຄົມ, ຄວາມປອດໄພທາງໄຊເບີ ແລະ ການຫັນເປັນດີຈີຕອນ. 2 ຝ່າຍເຫັນດີເປັນເອກະພາບສືບຕໍ່ເອົາໃຈໃສ່ໜູນຊ່ວຍການປົກປ້ອງສິດຜົນປະໂຫຍດອັນຊອບທຳຂອງປະຊາຄົມຢູ່ແຕ່ລະປະເທດທີ່ພວມດຳລົງຊີວິດ, ຮ່ຳຮຽນ ແລະ ເຮັດວຽກຢູ່ປະເທດຂອງກັນ… ທ່ານ ໂຕເລິມ ສະເໜີໃຫ້ ສ ເກົາຫຼີ ຕັ້ງໜ້າໜູນຊ່ວຍ ຫວຽດນາມ ພັດທະນາຂະແໜງອຸດສາຫະກຳວັດທະນະທຳ, ອຸດສາຫະກຳບັນເທີງ, ແບ່ງປັນບົດຮຽນການໂຄສະນາການທ່ອງທ່ຽວ, ແລກປ່ຽນກ່ຽວກັບການຮ່ວມມືຢູ່ບັນດາເວທີປາໄສຫຼາຍຝ່າຍ.
ພາຍຫຼັງການພົບປະສົນທະນາ, ການນຳ 2 ທ່ານໄດ້ເປັນສັກຂີພິຍານພິທີລົງນາມບົດບັນທຶກການຮ່ວມມື (MOU) ລະຫວ່າງ ຫວຽດນາມ - ສ ເກົາຫຼີ 12 ສະບັບ.
ຄໍາເຫັນ