ການເດີນທາງມາຢ້ຽມຢາມລາວ ຂອງ ເລຂາທິການໃຫຍ່ ພັກກອມມູນິດຫວຽດນາມ ແມ່ນມີຄວາມໝາຍສຳຄັນທາງປະຫວັດສາດ
ການເດີນທາງມາຢ້ຽມຢາມລັດຖະກິດຢູ່ ສປປ ລາວ ຂອງ ສະຫາຍ ໂຕ ເລິມ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ພ້ອມດ້ວຍຄະນະຜູ້ແທນຂັ້ນສູງຄັ້ງນີ້ ແມ່ນມີຄວາມໝາຍສໍາຄັນຫຼາຍທາງປະຫວັດສາດ ສາມາດເວົ້າໄດ້ວ່າມາຢ້ຽມຢາມ ສປປ ລາວ ເປັນປະເທດທໍາອິດ ພາຍຫຼັງສໍາເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ (XIV) ຂອງພັກກອມມູນິດຫວຽດນາມ ແລະ ໄດ້ຮັບເລືອກຕັ້ງເປັນເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ອີກສະ
ໄໝໜຶ່ງ ຊຶ່ງການຈະມາຢ້ຽມຢາມລັດຖະກິດຄັ້ງນີ້ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລາວ-ຫວຽດນາມ, ຫວຽດນາມ-ລາວ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.
ສະຫາຍ ທອງສະຫວັນ ພົມວິຫານ ກຳມະການສູນກາງພັກ ລັດຖະມົນຕີກະຊວງການຕ່າງປະເທດ ໄດ້ໃຫ້ສໍາພາດຕໍ່ສື່ມວນຊົນລາວ ແລະ ຫວຽດນາມ ໃນວັນທີ 2 ກຸມພາ ນີ້ວ່າ: ເມື່ອບໍ່ດົນມານີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປປ ລາວ ປະທານປະເທດ ແຫ່ງ ສປປ ລາວ ໄດ້ປະສົບຜົນສໍາເລັດໃນການຢ້ຽມຢາມທາງລັດຖະກິດ ສສ ຫວຽດນາມ ພາຍຫຼັງສຳເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນ ປະຕິວັດລາວ ຊຶ່ງການນໍາສູງສຸດຂອງສອງປະເທດ ໄດ້ຢ້ຽມຢາມຊຶ່ງກັນ ແລະ ກັນ ເປັນເຫດການທີ່ຫາໄດ້ຍາກ, ທັງເປັນໂອກາດທີ່ສອງປະເທດ ໄດ້ຍົກລະດັບການພົວພັນຮ່ວມມື ເປັນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ໂດຍລັດຖະບານລາວໄດ້ຕີລາຄາສູງຕໍ່ການຢ້ຽມຢາມລັດຖະກິດຢູ່ ສປປ ລາວ ຂອງສະຫາຍ ໂຕ ເລິມ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ພ້ອມດ້ວຍຄະນະຜູ້ແທນຂັ້ນສູງ ແຫ່ງ ສສ ຫວຽດນາມ ໃນວັນທີ 5 ກຸມພາ 2026.
ໃນໄລຍະຜ່ານມາ, ສອງປະເທດລາວ-ຫວຽດນາມ ໄດ້ມີກົນໄກພົວພັນຮ່ວມມື ພາຍຫຼັງສໍາເລັດກອງປະຊຸມໃຫຍ່ຂອງສອງພັກ ຈະໄດ້ດຳເນີນການຢ້ຽມຢາມອວຍພອນຊຶ່ງກັນ ແລະ ກັນ ເພື່ອແຈ້ງຜົນສໍາເລັດກອງປະຊຸມໃຫຍ່ຜູ້ແທນທົ່ວປະເທດຂອງພັກ ຂອງແຕ່ລະປະເທດ ໃຫ້ກັນຮັບຊາບ. ສະເພາະປີ 2026 ນີ້, ການນໍາສູງສຸດຂອງສອງປະເທດ ຈະໄດ້ພົບປະກັນເປັນຄັ້ງທີ 3 ຊຶ່ງສະທ້ອນໃຫ້ເຫັນວ່າ ການພົວພັນຮ່ວມມືຂອງສອງປະເທດແມ່ນພິເສດທີ່ສຸດ ມີໜຶ່ງແລ້ວບໍ່ມີສອງ ຫຼື ບໍ່ຄືປະເທດໃດຢູ່ໃນໂລກ, ການພົບປະກັນແຕ່ລະຄັ້ງ ໄດ້ສ້າງຄວາມໃກ້ຊິດ, ຄວາມສາມັກຄີຮັກແພງທີ່ເລິກເຊິ່ງ ເຮັດໃຫ້ຄົນຮຸ່ນໃໝ່ ຮັບຮູ້ໄດ້ເຖິງສາຍພົວພັນທີ່ຫາໄດ້ຍາກລະຫວ່າງສອງປະເທດ ທີ່ມີປະຫວັດສາດອັນຍາວນານ, ມີຕົ້ນກຳເນີດມາຈາກພັກກອມມູນິດອິນດູຈີນ, ສອງປະເທດໄດ້ຄຽງບ່າຄຽງໄຫຼ່ກັນຕໍ່ສູ້ຕ້ານຈັກກະພັດຜູ້ຮຸກຮານ ລ່າເມືອງຂຶ້ນແບບເກົ່າ ແລະ ແບບໃໝ່ ຈົນສາມາດຍາດໄດ້ເອກະລາດຮ່ວມກັນເປັນກ້າວໆມາ.
ປັດຈຸບັນ, ສອງປະເທດລາວ-ຫວຽດນາມ ຕ້ອງໄດ້ສືບຕໍ່ພ້ອມກັນພັດທະນາຂຶ້ນໄປເລື້ອຍໆ, ການຍົກລະດັບຮ່ວມມືຄູ່ຮ່ວມຍຸດທະສາດ ແມ່ນເນັ້ນໃສ່ການພັດທະນາ ເພື່ອໃຫ້ສົມຄູ່ກັບການພົວພັນແບບພິເສດຂອງສອງປະເທດ, ໃນໄລຍະຜ່ານມາ ການພົວພັນດ້ານການເມືອງ ແລະ ຄວາມໝັ້ນຄົງ ລະຫວ່າງສອງປະເທດ ລ້ວນແຕ່ໄດ້ຮັບຜົນສໍາເລັດເປັນຢ່າງດີ. ສ່ວນຂົງເຂດການພັດທະນາດ້ານເສດຖະກິດ-ສັງຄົມ ຕ້ອງໄດ້ສືບຕໍ່ພັດທະນາຢ່າງແຂງແຮງ ໃຫ້ສົມຄູ່ກັບທ່າແຮງບົ່ມຊ້ອນຂອງສອງປະເທດທີ່ມີ ໂດຍສະເພາະການຍົກລະດັບຄວາມເປັນຫຸ້ນສ່ວນຍຸດທະສາດ ຊຶ່ງມີຄວາມໝາຍເລິກເຊິ່ງ ແລະ ຮອບດ້ານ, ສອງປະເທດຕ້ອງໄດ້ເຊື່ອມສານ, ເຊື່ອມຈອດ ແລະ ເຊື່ອມໂຍງໃນຂົງເຂດຕ່າງໆ ເປັນຕົ້ນດ້ານຄົມມະນາຄົມ, ພະລັງງານ, ການຂົນສົ່ງ, ການຄ້າ, ການລົງທຶນ ແລະ ການທ່ອງທ່ຽວ ແນໃສ່ສູ້ຊົນໃຫ້ມູນຄ່າການຄ້າລະຫວ່າງສອງປະເທດ ບັນລຸຫຼາຍກວ່າ 3 ຕື້ໂດລາ ໃນຊຸມປີຕໍ່ໜ້າ, ລວມເຖິງການພັດທະນາຊັບພະຍາກອນມະນຸດໃຫ້ມີຄຸນນະພາບ ເພື່ອຮອງຮັບໃຫ້ແກ່ການພົວພັນແບບພິເສດຂອງສອງປະເທດ.
ໂອກາດນີ້, ສະຫາຍ ທອງສະຫວັນ ພົມວິຫານ ໄດ້ສະແດງຄວາມເຊື່ອໝັ້ນວ່າ: ການຢ້ຽມຢາມທາງລັດຖະກິດ ສປປ ລາວ ຂອງສະຫາຍ ໂຕເລິມ ໃນຄັ້ງນີ້ ຈະປະສົບຜົນສໍາເລັດໃນລະດັບສູງສຸດ ຕາມເປົ້າໝາຍທີ່ວາງໄວ້ ເນື່ອງຈາກວ່າການນໍາສູງສຸດຂອງພັກ, ລັດຖະບານ ແລະ ຂະແໜງການຕ່າງໆຂອງສອງປະເທດ ລ້ວນແຕ່ມີຄວາມເປັນເອກະພາບໃນລະດັບສູງ ເພື່ອຊຸກຍູ້ໃຫ້ການຮ່ວມມືຂະຫຍາຍ ຕົວໃນຈັງຫວະທີ່ດີກວ່າເກົ່າ.
ແຫຼ່ງຂ່າວ: ຂປລ
ຄໍາເຫັນ