ການແຂ່ງຂັນ “ທູດຫວຽດນາມແຫ່ງອະນາຄົດ” ຄັ້ງທີ 2

ການຈັດການແຂ່ງຂັນຄັ້ງນີ້ເພື່ອສ້າງຂະບວນການໃນການຝຶກຝົນ, ແລກປ່ຽນຮຽນຮູ້ ແລະ ພັດທະນາທັກສະການນຳໃຊ້ພາສາຫວຽດນາມ. ໃນນັ້ນ, ເປັນການສຶກສາໃຫ້ຄົົນຮຸ່ນໃໝ່ໄດ້ຮັບຮູ້ກ່ຽວກັບປະຫວັດສາດສຳພັນສູ້ຮົບ ແລະ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ່ນສ່ວນຍຸດທະສາດລະຫວ່າງປະຊາຊົນສອງຊາດຫວຽດນາມ-ລາວ, ການແຂ່ງຂັນຄັ້ງນີ້ມີ 9 ທີມເຂົ້າແຂ່ງຂັນຈາກສູນພາສາຫວຽດນາມ ແລະ ບັນດາສະຖານການສຶກສາຢູ່ນະຄອນຫຼວງວຽງຈັນປະກອບມີ: ສະຖາບັນການເມືອງ ແລະ ການປົກຄອງແຫ່ງຊາດ, ວິທະຍາຄານການເມືອງປ້ອງກັນຄວາມສະຫງົບ, ໂຮງໝໍສູນກາງກອງທັບ 103, ກົມໃຫຍ່ສັນຕິບານ, ກະຊວງປ້ອງກັນຄວາມສະຫງົບ,ວິທະຍາໄລເຕັກນິກວິຊາຊີບວຽງຈັນ-ຮ່າໂນຍ, ສູນພາສາຫວຽດ-ສະຖາບັນພັດທະນາກຳມະບານລາວ, ສູນພາສາຫວຽດນາມສະຖາບັນຄົ້ນຄວ້າວິທະຍາສາດການສຶກສາກະຊງ ສສກ, ໂຮງຮຽນການເມືອງ-ການປົກຄອງນະຄອນຫຼວງວຽງຈັນ, ຫ້ອງຮຽນພາສາຫວຽດນາມວັດ phat - ສະມາຄົມຄົນຫວຽດນາມປະຈໍານະຄອນຫຼວງວຽງຈັນ.

ທ່ານ ຫງວຽນມິງເຕິມ ກ່າວວ່າ: ພາສາເປັນຂົວເຊື່ອມຕໍ່ທີ່ໝັ້ນຄົງທີ່ສຸດລະຫວ່າງປະຊາຊາດ. ສຳລັບສາຍພົວພັນຫວຽດນາມ-ລາວ ຊຶ່ງພາສາຫວຽດບໍ່ພຽງແຕ່ເປັນເຄື່ອງມືສື່ສານແຕ່ຍັງເປັນຂົວເຊື່ອມຕໍ່ແຫ່ງຄວາມຮູ້ສຶກ, ວັດທະນະທຳ, ຄວາມຮູ້ ແລະ ການຮ່ວມມືລະຫວ່າງປະຊາຊົນສອງຊາດ. ໃນສະພາບການທີ່ສາຍພົວພັນຫວຽດນາມ-ລາວກຳລັງກ້າວເຂົ້າສູ່ໄລຍະພັດທະນາໃໝ່ດ້ວຍເນື້ອໃນ “ການເຊື່ອມໂຍງຍຸດທະສາດ”, ຊັບພະຍາກອນມະນຸດທີ່ເຂົ້າໃຈພາສາ, ວັດທະນະທຳ ແລະ ປະເທດຂອງກັນ ແລະ ກັນຈະເປັນພື້ນຖານສັງຄົມທີ່ສຳຄັນເພື່ອຜັນຂະຫຍາຍຄວາມຮັບຮູ້ຂອງຜູ້ນຳຂັ້ນສູງຂອງສອງພັກ ແລະ ສອງລັດໃຫ້ເປັນຈິງ, ປະສົບການຈາກປະຫວັດສາດໄດ້ພິສູດໃຫ້ເຫັນວ່າ, ສາຍພົວພັນຫວຽດນາມ-ລາວສາມາດຖືກເສີມສ້າງຜ່ານກົນໄກການຮ່ວມມື ແລະ ຂັບເຄື່ອນຜ່ານແຜນງານ ແລະ ໂຄງການຕ່າງໆ; ແຕ່ເພື່ອເຮັດໃຫ້ສາຍພົວພັນນັ້ນຍືນຍົງ ແລະ ພັດທະນາຍາວນານ ປັດໄຈສຳຄັນທີ່ສຸດຍັງຄົງແມ່ນຄວາມເຂົ້າໃຈ, ຄວາມໄວ້ວາງໃຈ ແລະ ຄວາມຜູກພັນລະຫວ່າງປະຊາຊົນສອງຊາດ. ດັ່ງນັ້ນ, ພະນັກງານລາວແຕ່ລະຄົນທີ່ກຳລັງຮຽນພາສາຫວຽດນາມໃນມື້ນີ້ບໍ່ພຽງແຕ່ກຳລັງປະກອບເຄື່ອງມືທີ່ເປັນປະໂຫຍດໃຫ້ແກ່ຕົນເອງແຕ່ຍັງປະກອບສ່ວນສ້າງໃຫ້ແກ່ສາຍພົວພັນມິດຕະພາບທີ່ຍິ່ງໃຫຍ່ຄວາມສາມັກຄີແບບພິເສດຫວຽດນາມ-ລາວນັບມື້ພັດທະນາຂຶ້ນສູ່ລະດັບໃໝ່. ພະນັກງານລາວແຕ່ລະຄົນທີ່ສາມາດໃຊ້ພາສາຫວຽດນາມໄດ້ດີກໍແມ່ນ“ທູດແຫ່ງມິດຕະພາບ”, ເປັນຂົວເຊື່ອມຕໍ່ທີ່ຊ່ວຍເສີມສ້າງຄວາມເຂົ້າໃຈ, ຄວາມເຊື່ອໝັ້ນ ແລະ ການຮ່ວມມືລະຫວ່າງສອງຊາດພວກເຮົາ, ດ້ວຍຄວາມຮັບຮູ້ຢ່າງເລິກເຊິ່ງຕໍ່ຄວາມໝາຍດັ່ງກ່າວ, ສະຖານທູດຫວຽດນາມປະຈຳລາວຖືວ່າການສະໜັບສະໜູນການສອນ ແລະ ການຮຽນພາສາຫວຽດນາມເປັນໜຶ່ງໃນໜ້າທີ່ສຳຄັນຂອງວຽກງານການທູດວັດທະນະທຳ, ວຽກງານຊຸມຊົນ ແລະ ການຮ່ວມມືດ້ານການສຶກສາ. ືໃນໄລຍະຜ່ານມາ, ສະຖານທູດໄດ້ປະສານຢ່າງໃກ້ຊິດກັບກະຊວງສຶກສາທິການ ແລະ ກິລາລາວ, ບັນດາສຳນັກງານອົງການທີ່ກ່ຽວຂ້ອງ, ສະມາຄົມຊາວຫວຽດນາມ ແລະ ບັນດາສະຖານການສຶກສາເພື່ອສົ່ງເສີມຂະບວນການຮຽນພາສາຫວຽດນາມ, ສະໜັບສະໜູນສື່ການຮຽນ, ຕຳລາຮຽນ ແລະ ຈັດກິດຈະກຳຫຼາຍຮູບແບບເພື່ອຮຽນຮູ້ນຳໃຊ້ພາສາຫວຽດນາມຢ່າງກວ້າງຂວາງຢູ່ລາວ, ສະຖານທູດຫວຽດນາມປະຈຳລາວມີຄວາມມຸ້ງຫວັງຈະສືບຕໍ່ຮ່ວມມືຢ່າງໃກ້ຊິດກັບກະຊວງສຶກສາທິການ ແລະ ກິລາລາວ ແລະ ບັນດາສຳນັກງານອົງການທີ່ກ່ຽວຂ້ອງອື່ນໆເພື່ອເປີດກວ້າງເຄືອຂ່າຍຫ້ອງຮຽນພາສາຫວຽດນາມ, ປັບປຸງຍົກສູງຄຸນນະພາບໃນການສອນ, ສ້າງກິດຈະກຳທີ່ເປັນປະໂຫຍດຫຼາຍຂຶ້ນເພື່ອເຜີຍແຜ່ພາສາຫວຽດນາມໃຫ້ກວ້າງຂວາງກວ່າເກົ່າໃຫ້ບັນດາພະນັກງານ ແລະ ໄວໜຸ່ມລາວ.

(ຂ່າວ-ພາບ: ສຳນານ)