ໃນໂອກາດການເຂົ້າຢ້ຽມອໍາລາ ໃນຄັ້ງນີ້ ທ່ານ ນາງ ຈັນທະຄອນ ບົວລະພັນ ໄດ້ຕີລາຄາສູງ ແລະ ສະແດງຄວາມຂອບໃຈ ຕໍ່ລັດຖະບານອິສຣາແອນ ທີ່ໄດ້ໃຫ້ການສະໜັບສະໜູນ ແລະ ຮ່ວມມືກັບ ສປປ ລາວ ດ້ວຍດີມາຕະຫຼອດ ເວົ້າລວມ, ເວົ້າສະເພາະແມ່ນໃນຂົງເຂດຂະແໜງການກະສິກໍາ ແລະ ສິ່ງແວດລ້ອມ ຊຶ່ງຜ່ານມາກະຊວງ ກສ ໄດ້ສົ່ງນັກສຶກສາເຂົ້າຮ່ວມຝຶກອົບຮົມ ແລະ ຮຽນຮູ້ວຽກງານຕົວຈິງດ້ານກະສິກໍາທັນສະໄໝ ທີ່ປະເທດອິສຣາແອນ ໂດຍສະເພາະແມ່ນເຕັກນິກການປູກຝັງ-ລ້ຽງສັດ ແບບກ້າວໜ້າ ຊຶ່ງເປັນຄວາມຮູ້ທີ່ສາມາດນໍາໄປໃຊ້ໃນການພັດທະນາເສດຖະກິດຄອບຄົວ ແລະ ປະກອບສ່ວນສ້າງວຽກເຮັດງານທໍາໄດ້ເປັນຢ່າງດີ. ນອກຈາກນີ້, ສອງປະເທດຍັງໄດ້ຮ່ວມມືກັນຈັດຕັ້ງປະຕິບັດ ໂຄງການທົດລອງລະບົບນໍ້າຢອດໃນສວນໄມ້ໃຫ້ໝາກ ແລະ ໂຄງການຄົ້ນຄວ້າແນວພັນຜັກບົວໃຫຍ່ ຕື່ມອີກ.
ໃນຕອນທ້າຍ, ທ່ານ ນາງ ຈັນທະຄອນ ບົວລະພັນ ຮອງລັດຖະມົນຕີ ໄດ້ອວຍພອນໃຫ້ທ່ານ Mr. Yaron Mayer ຈົ່ງປະສົບຜົນສໍາເລັດໃນໜ້າທີ່ວຽກງານໃນອະນາຄົດ ແລະ ສືບຕໍ່ເສີມຂະຫຍາຍສາຍພົວພັນມິດຕະພາບ ລະຫວ່າງ ສປປ ລາວ ແລະ ປະເທດອິດສະຣາແອນ ໃຫ້ແໜ້ນແຟ້ນຍິ່ງໆຂຶ້ນໄປ.
(ແຫຼ່ງຂ່າວ: ຂ່າວສານກະສິກຳ ແລະ ສິ່ງແວດລ້ອມ)
ຄໍາເຫັນ