ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 29 ກັນຍາ ຜ່ານມາ ຢູ່ນະຄອນຫຼວງຮ່າໂນ້ຍ, ທ່ານ ໂຕເລິມ ເລຂາທິການໃຫຍ່ ພັກກອມມູນິດ ຫວຽດນາມ ໄດ້ໃຫ້ການຕ້ອນຮັບທ່ານ ວີຢາເຊສລາຟ ໂວໂລດິນ ປະທານສະພາດູມາ ແຫ່ງຊາດ ຣັດເຊຍ (ສະພາຕ່ຳ) ທີ່ຢ້ຽມຢາມ ຫວຽດນາມ ຢ່າງເປັນທາງການ ແລະ ເປັນປະທານຮ່ວມກອງປະຊຸມຄັ້ງທີ 4 ຄະນະກຳມະການຮ່ວມມືລະຫວ່າງລັດຖະສະພາ ສອງສະພາແຫ່ງຊາດ ຫວຽດາມ ແລະ ສະພາດູມາ ແຫ່ງຊາດ ຣັດເຊຍ. ທ່ານເລຂາທິການໃຫຍ່ ເນັ້ນໜັກວ່າ: ຫວຽດນາມ ຍາມໃດກໍຢາກພັດທະນາຢ່າງຮອບດ້ານການພົວພັນມິດຕະພາບທີ່ເປັນມູນເຊື້ອ ແລະ ຄູ່ຮ່ວມມືຍຸດທະສາດຮອບດ້ານ ກັບ ຣັດເຊຍ, ສົມກັບເປັນຕຳແໜ່ງຂອງສອງປະເທດໃນນະໂຍບາຍການຕ່າງປະເທດຂອງກັນ ແລະ ປະຫວັດສາດການພົວພັນທີ່ດີງາມທີ່ສຸດລະຫວ່າງສອງປະເທດ.
ໃນວັນດຽວກັນ, ທ່ານ ເລືອງເກືອງ ປະທານປະເທດ ຫວຽດນາມ ກໍໃຫ້ການຕ້ອນຮັບ ປະທານສະພາດູມາ ແຫ່ງຊາດ ລັດເຊຍ. ໃນການຕ້ອນຮັບທ່ານ ເລືອງເກືອງ ສະເໜີສະຫະພັນ ຣັດເຊຍ ສືບຕໍ່ສະໜັບສະໜູນຫຼັກໝັ້ນຂອງ ຫວຽດນາມ ແລະ ອາຊຽນ ກ່ຽວກັບທະເລຕາເວັນອອກ, ພິເສດແມ່ນການແກ້ໄຂການຂັດແຍ້ງກັນໂດຍສັນຕິວິທີ, ບົນພື້ນຖານເຄົາລົບກົດໝາຍສາກົນ, ກົດບັດ ສປຊ ແລະ ສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982.
ໃນຂະນະດຽວກັນ, ໃນການພົບປະກັບທ່ານ ວີຢາເຊສລາຟ ໂວໂລດິນ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ສະເໜີສະພາດູມາ ໜູນຊ່ວຍການຮ່ວມມືດ້ານເສດຖະກິດ - ການຄ້າ, ການລົງທຶນເພື່ອແນໃສ່ບັນລຸເປົ້າໝາຍນຳວົງເງິນການຄ້າສອງຝ່າຍຂຶ້ນເຖິງ 15 ຕື້ໂດລາ ໂດຍໄວ.
ຄໍາເຫັນ