ການປ່ຽນແປງສະພາບພູມອາກາດສົ່ງຜົນຕໍ່ແມ່ຍິງຊົນນະບົດ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ອົງການອາຫານ ແລະ ການກະເສດແຫ່ງສະຫະປະຊາຊາດ (FAO) ໄດ້ເປີດເຜີຍບົດລາຍງານຜົນການສຶກສາໂດຍລະບຸວ່າ: ຊາວກະສິກຳຜູ້ທຸກຍາກ ແລະ ປະຊາກອນຜູ້ອາຍຸສູງທີ່ເປັນແມ່ຍິງ ໄດ້ຮັບຜົນກະທົບຈາກການປ່ຽນແປງສະພາບພູມອາກາດຫຼາຍທີ່ສຸດ ແລະ ການຕອບສະໜອງຄວາມຕ້ອງການຂອງຄົນກຸ່ມນີ້ຕ້ອງໃຊ້ມາດຕະການແບບມີເປົ້າໝາຍ.
    ຜົນການສຶກສາລະບຸວ່າ: ສະພາບພູມອາກາດທີ່ບໍ່ຍຸຕິທຳ (Unjust Climate) ເປີດເຜີຍວ່າຄົນກຸ່ມນີ້ໄດ້ຮັບຜົນກະທົບຈາກຄວາມບໍ່ເທົ່າທຽມທາງລາຍໄດ້ອັນກ່ຽວກັບສະພາບພູມອາກາດທີ່ບໍ່ສົມສ່ວນ ເພາະບໍ່ໄດ້ມີຄວາມສາມາດປັບຕົວເຂົ້າກັບສະພາບອາກາດຮ້າຍແຮງເທົ່າທຽມກັບຄົນກຸ່ມອື່ນໆ. ທັງນີ້, ທີມຜູ້ຊ່ຽວຊານ 8 ທ່ານ ແລະ ທີ່ປຶກສາຈາກຫຼາຍວົງການໄດ້ດຳເນີນການສຶກສາຂໍ້ມູນດັ່ງກ່າວເປັນເວລາ 2 ປີ ເພື່ອເກັບກຳຮວບຮວມຂໍ້ມູນທາງສັງຄົມ ແລະ ເສດຖະກິດຈາກຄົວເຮືອນຊົນນະບົດ 109.000 ຄົວເຮືອນໃນປະເທດລາຍໄດ້ຕ່ຳ-ປານກາງ 24 ປະເທດ ຄິດເປັນຈຳນວນປະຊາກອນຫຼາຍກວ່າ 950 ລ້ານຄົນ. ຜົນການສຶກສາພົບວ່າ: ຖ້າຫາກອຸນຫະພູມສະເລ່ຍເພີ່ມຂຶ້ນ 1 ອົງສາ ແມ່ຍິງໃນຊົນນະບົດຈະສູນເສຍລາຍໄດ້ປະມານ 34% ເມື່ອທຽບກັບຜູ້ຊາຍ. ຂະນະດຽວກັນ, ພາວະອຸນຫະພູມສູງຂຶ້ນເຮັດໃຫ້ຄົວເຮືອນທຸຸກຍາກຕ້ອງອາໄສການກະເສດທີ່ອ່ອນໄຫວຕໍ່ສະພາບພູມອາກາດເພີ່ມຂຶ້ນ ແລະ ພວກເຂົາອາດຈະສູນເສຍລາຍໄດ້ສະເລ່ຍ 4,4% ເມື່ອທຽບກັບຄົວເຮືອນທີ່ບໍ່ທຸກຍາກຖ້າຫາກປະເຊີນກັບໄພນໍ້າຖ້ວມ.
    ຜົນການສຶກສານີ້ໄດ້ຈັດໝວດໝູ່ຕາມເພດ, ຄວາມໝັ້ນຄົງ ແລະ ອາຍຸ ເນັ້ນຊີ້ນຳໆພາປະເທດໃນການພັດທະນາແຜນຮັບມືເພື່ອຕອບສະໜອງຄວາມຕ້ອງການອັນຫຼາກຫຼາຍຂອງກຸມຄົນທີ່ໄດ້ຮັບຜົນກະທົບ. ທ່ານ ນິໂຄລັສ ຊິດໂຄ ນັກເສດຖະສາດອາວຸໂສປະຈຳ FAO ແລະ ຜູ້ນຳຂຽນບົດລາຍງານສະແດງຄວາມຄິດເຫັນວ່າ ຈະມີການຄຳນຶງເຖິງຄວາມແຕກຕ່າງດ້ານຄວາມອ່ອນແອຂອງຜູ້ຄົນເພີ່ມຂຶ້ນ ເພາະຄວາມອ່ອນແອຂອງຄົນແຕ່ລະກຸ່ມບໍ່ຄືກັນ ເຮັດໃຫ້ຕ້ອງໄດ້ຮັບການສະໜັບສະໜູນທີ່ແຕກຕ່າງກັນ.