ທ່ານ ເຫຼັກໄຫຼ ສີວິໄລ ຊີ້ແຈງວ່າ: ກະຊວງຍທຂໄດ້ມອບໃຫ້ບັນດາແຂວງ, ນະຄອນຫຼວງ ເປັນເຈົ້າການຄັດຈ້ອນເສັ້ນທາງຫຼວງແຫ່ງຊາດສາຍຫຼັກຈໍານວນໜຶ່ງທີ່ມີການເປ່ເພໜັກ, ມີການຂົນສົ່ງສິນຄ້າແລະໂດຍສານຫຼາຍເພື່ອສ້ອມແປງແລະປັບປຸງຍົກລະດັບໃຫ້ສາມາດຮັບນໍ້າໜັກໄດ້ 11 ໂຕນຕໍ່ເພົາ, ພ້ອມທັງມອບໃຫ້ແຂວງຄົ້ນຄວ້າຄັດເລືອກບໍລິສັດທີ່ມີທ່າແຮງ, ມີມາດຖານເງື່ອນໄຂຄົບຖ້ວນ ໃຫ້ສອດຄ່ອງຕາມລະບຽບການ ສາມາດປະຕິບັດໄດ້ຢ່າງວ່ອງໄວ ແລະ ເຊັນບົດບັນທຶກຄວາມເຂົ້າໃຈ (MoU)ເພື່ອດໍາເນີນການສໍາຫຼວດ, ສຶກສາຄວາມເປັນໄປໄດ້ແລະອອກແບບຕາມຂໍ້ກຳນົດຂອບເຂດໜ້າວຽກ (ToR) ເພື່ອໃຫ້ທັນຈັດຕັ້ງປະຕິບັດໃນປີ 2026 ແລະ ຜ່ານມາກໍໄດ້ມີ ແຂວງຈໍານວນໜຶ່ງໄດ້ສໍາເລັດການເຊັນ MOU ແລ້ວ ເປັນຕົ້ນແຂວງວຽງຈັນ, ແຂວງຄໍາມ່ວນ, ແຂວງບໍລິຄໍາໄຊ, ແຂວງສະຫວັນນະເຂດ, ແຂວງອຸດົມໄຊ, ແຂວງຊຽງຂວາງ, ແຂວງຫົວພັນ, ແຂວງຫຼວງນໍ້າທາ ຢູ່ບາງຕອນທາງຂອງບັນດາເສັ້ນທາງ 13 ເໜືອ, 13 ໃຕ້, ທາງເລກ 22 ພູເກົ້າຫຼັກ ກາສີ-ເມືອງນານ, R3, 1D, 1C, 7, 6, 8, ທາງເລກ 21 ປາກຊັນ-ທ່າສີ-ທາງ 1D ຊາຍແດນ ແຂວງໄຊສົມບູນ;ສະເພາະເສັ້ນທາງເລກ 9 ໄດ້ຕົກລົງສ້າງເປັນຕົວແບບໃນການປະຕິບັດ ໃນຮູບແບບ OPBRC ແລະ PRTCແມ່ນໄດ້ສໍາເລັດການເຊັນສັນຍາການກໍ່ສ້າງແລ້ວ ໃນວັນທີ 20 ຕຸລາ 2025 ແລະ ປັດຈຸບັນລັດວິສາຫະກິດກໍ່ສ້າງທາງເລກ 8 ໄດ້ໃຫ້ທີມງານວິຊາການລົງພາກສະໜາມ ແລະ ເລີ້ມຕົ້ນຈັດຕັ້ງປະຕິບັດຟື້ນຟູ ແລະ ສ້ອມແປງເສັ້ນທາງຕາມແຜນທີ່ກຳນົດໄວ້; ສ່ວນການເກັບເງິນແມ່ນຄາດວ່າຈະໃຫ້ໄດ້ເລີ່ມຕົ້ນເກັບເງິນໃນວັນທີ 1 ມັງກອນ 2026, ປັດຈຸບັນກະຊວງ ຍທຂ ໄດ້ເຫັນດີກຳນົດຈຸດເກັບເງິນ, ແບບແຕ້ມຈຸດເກັບເງິນ, ຄົ້ນຄວ້າອັດຕາການເກັບຄ່າຜ່ານທາງປະເພດລົດບັນທຸກສິນຄ້າ, ໂດຍສານທີ່ມີນໍ້າໜັກ 12 ໂຕນຂຶ້ນໄປ (ປັດຈຸບັນກໍາລັງສະເໜີຂັ້ນເທິງອະນຸມັດ) ແລະ ຈະເອົາທາງເລກ 9 ເປັນຕົວແບບໃຫ້ແກ່ເສັ້ນທາງອື່ນໆ. ສໍາລັບລະບົບເກັບເງິນແມ່ນຈະນໍາໃຊ້ລະບົບເກັບເງິນທີ່ທັນສະໄໝ, ຊິງຊັ່ງນໍ້າໜັກທັນສະໄໝ ຊຶ່ງກະຊວງ ຍທຂ ຈະສົມທົບກັບກະຊວງການເງິນ ໃນລາຍລະອຽດຕື່ມ.
ກະຊວງ ຍທຂ ໄດ້ຄົ້ນຄວ້າຟື້ນຟູກອງສ້ອມແປງທາງຄືນໃໝ່ ໃນຂອບເຂດທົ່ວປະເທດ ຊຶ່ງໄດ້ສໍາເລັດການອອກຂໍ້ຕົກລົງວ່າດ້ວຍການຈັດຕັ້ງການເຄື່ອນໄຫວຂອງໜ່ວຍງານສ້ອມແປງເສັ້ນທາງຫຼວງ ຊຶ່ງນິຕິກຳດັ່ງກ່າວຈະເປັນນິຕິກຳພື້ນຖານ ແລະ ເປັນບ່ອນອີງໃຫ້ແກ່ການສ້າງໜ່ວຍງານສ້ອມແປງ ຢູ່ນະຄອນຫຼວງ ແລະ ບັນດາແຂວງໃນຂອບເຂດທົ່ວປະເທດ ຊຶ່ງງົບປະມານກອງທຶນທາງໃນປີ 2026 ແມ່ນໄດ້ແບ່ງໃຫ້ ແຂວງລະ 1,5 ຕື້ກີບ.
ທ່ານ ເຫຼັກໄຫຼ ສີວິໄລ ຊີ້ແຈງຕື່ມວ່າ: ສໍາລັບມາດຕະການໃນການຄວບຄຸມນໍ້າໜັກ, ກະຊວງ ຍທຂ ໄດ້ອອກແຈ້ງການ ໃຫ້ຈັດເກັບຄ່າຜ່ານທາງ ສໍາລັບລົດບັນທຸກສິນຄ້າ ໂດຍສະເພາະລົດຂົນສົ່ງແຮ່ ເພື່ອມາສ້ອມແປງ, ຟື້ນຟູ ແລະ ບູລະນະຮັກສາ ທາງຫຼວງ ຕາມເນື້ອໃນແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ໂດຍມອບໃຫ້ທ້ອງຖິ່ນ ເປັນຜູ້ຈັດຕັ້ງປະຕິບັດ ແລະ ໄດ້ຈະຄົ້ນຄວ້າເກັບໃນລະຫວ່າງ 1.5 ໂດລາ/ໂຕນແຮ່ທາດຕໍ່ຖ້ຽວໄລຍະທາງ 10 ກມ ຂຶ້ນໄປ ກໍລະນີໄລຍະການຂົນສົ່ງຜ່ານເສັ້ນທາງບໍ່ຮອດ 10 ກມ ໃຫ້ເກັບຫຼຸດອັດຕາທີ່ສອງຝ່າຍເອກະພາບກັນ; ສໍາລັບງົບປະມານທີ່ເກັບໄດ້ ແມ່ນມອບເຂົ້າກອງທຶນທາງເພື່ອມາສ້ອມແປງ, ຟື້ນຟູທາງຫຼວງ.
(ຂ່າວ: ວັນເພັງ, ພາບ: ບຸນຕອມ)
ຄໍາເຫັນ