ກະຊວງ ປກສ ປະກາດນາຍຕຳຫຼວດຂັ້ນສູງພັກການ-ຮັບອຸດໜູນບຳນານ ແລະ ແຕ່ງຕັ້ງໃໝ່

ສະຫາຍ ນາງ ວິໄລ ພິລາວົງ ຮອງຫົວໜ້າກົມຄຸ້ມຄອງ-ພະນັກງານ ຄະນະຈັດຕັ້ງສູນກາງພັກ ໄດ້ຜ່ານມະຕິຕົກລົງຂອງກົມການເມືອງສູນກາງພັກ ແລະ ດຳລັດຂອງນາຍົກລັດຖະມົນຕີ ວ່າດ້ວຍການອະນຸມັດໃຫ້ພະນັກ ງານການນຳຂັ້ນສູງກະຊວງ ປກສ ພັກການຮັບອຸດໜູນບຳນານ. ໃນນີ້, ໄດ້ອະນຸມັດໃຫ້ສະຫາຍ ພົທ ກົງທອງ ພົງວິຈິດ ກຳມະການສູນກາງພັກ ຮອງລັດຖະມົນຕີກະຊວງ ປກສ ອອກພັກການຮັບອຸດໜູນບຳນານ ແລະ ຜ່ານດຳລັດຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງຮອງລັດຖະມົນຕີກະຊວງ ປກສ, ໃນນີ້ໄດ້ແຕ່ງຕັ້ງສະຫາຍ ພົຕ ສຸລິນະ ແກ້ວປະເສີດ, ສະຫາຍ ພົຈວ ຄອນສະຫັວນ ສົມພາໄຊ ແລະ ສະຫາຍ ພົຈວ ແອນ ອຸ່ນອານົງນຸດ ເປັນຮອງລັດຖະມົນຕີກະຊວງ ປກສ. ຈາກນັ້ນ, ສະຫາຍ ພົຈວ ຊາຍຄອງ ເພັດຊະວົງ ຮອງຫົວໜ້າກົມໃຫຍ່ການເມືອງ ປກສ ໄດ້ຜ່ານຂໍ້ຕົກລົງຂອງລັດຖະມົນຕີກະຊວງ ປກສ ວ່າດ້ວຍການຍົກຍ້າຍ ແລະ ແຕ່ງຕັ້ງນາຍຕຳຫຼວດຈຳນວນໜຶ່ງ.

ໂອກາດນີ້, ສະຫາຍ ພົອ ວິໄລ ຫຼ້າຄໍາຟອງ ໄດ້ໃຫ້ກຽດໂອ້ລົມເນັ້ນໜັກໃຫ້ຄະນະພັກ, ຄະນະນໍາ ໂດຍສະເພາະຜູ້ຮັບອຸດໜູນບໍານານ ແລະ ນາຍຕໍາຫຼວດທີ່ໄດ້ຮັບການແຕ່ງຕັ້ງໃໝ່ ຕັ້ງໜ້າເສີມຂະຫຍາຍທາດແທ້, ມູນເຊື້ອປະຕິວັດອັນສະຫງ່າລາສີ, ນໍ້າໃຈຮັກເຊື້ອແພງຊາດ, ຄວາມຈົ່ງຮັກພັກດີຕໍ່ປະເທດຊາດ, ຕໍ່ພັກ ແລະ ຕໍ່ປະຊາຊົນຢ່າງສະເໝີຕົ້ນສະເໝີປາຍ. ສິ່ງສຳຄັນຕ້ອງເພີ່ມທະວີຄວາມຮັບຜິດຊອບທາງດ້ານການເມືອງ ເຮັດໃຫ້ກໍາລັງຢຶດໝັ້ນໃນອຸດົມການ, ມີນໍ້າໃຈຮັກຊາດ, ມີສະຕິຕໍ່ການຈັດຕັ້ງ, ເຄົາລົບຕໍ່ລະບຽບກົດໝາຍ ເພື່ອສ້າງຄວາມເຊື່ອໝັ້ນໃຫ້ສັງຄົມ ສຸມໃສ່ນໍາພາ-ຊີ້ນໍາກໍາລັງໃນການຈັດຕັ້ງປະຕິບັດໜ້າທີ່ການເມືອງດ້ວຍຄວາມຮັບຜິດຊອບຢ່າງຕັ້ງໜ້າ. ໂດຍສະເພາະການແກ້ໄຂບັນດາປະກົດການຫຍໍ້ທໍ້ໃນສັງຄົມ, ການຮັກສາສະຖຽນລະພາບທາງດ້ານການ ເມືອງ, ຄວາມເປັນລະບຽບຮຽບຮ້ອຍໃນສັງຄົມ ແລະ ອື່ນໆ.

ຂ່າວ: ຄວາມສະຫງົບ