 |
ພາຍຫຼັງສໍາເລັດການພົບປະ, ສອງທ່ານນາຍົກລັດຖະມົນຕີ ກໍໄດ້ເປັນສັກຂີພິຍານໃນການແລກປ່ຽນຂໍ້ຕົກ ລົງ ວ່າດ້ວຍການຮ່ວມມືລະຫວ່າງສອງກະຊວງການເງິນ ແຫ່ງ ສປປ ລາວ ແລະ ກະຊວງການເງິນ ແຫ່ງ ສສ ຫວຽດນາມ ໄລຍະປີ 2026-2030. ຕາງໜ້າໃຫ້ກະຊວງການເງິນ ແຫ່ງ ສປປ ລາວ ໂດຍທ່ານ ສັນຕິພາບ ພົມວິຫານ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ແລະ ຕາງໜ້າໃຫ້ກະຊວງການເງິນ ແຫ່ງ ສສ ຫວຽດນາມ ໂດຍທ່ານ ໂງ ວັນ ຕ໋ວນ ລັດຖະມົນຕີກະຊວງການເງິນ ສສ ຫວຽດນາມ.
ຂໍ້ຕົກລົງດັ່ງກ່າວ, ໄດ້ສ້າງຂຶ້ນບົນພື້ນຖານການສືບທອດ ແລະ ເສີມຂະຫຍາຍບັນດາຜົນສໍາເລັດທີ່ຍາດມາໄດ້ໃນໄລຍະ 2021-2025; ພ້ອມກັນນັ້ນ, ກໍເປັນການຜັນຂະຫຍາຍສັນຍາ ວ່າດ້ວຍການຮ່ວມມືທະວິພາຄີ ລະ ຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ໃນໄລຍະ 2026-2030 ທີ່ໄດ້ເຊັນໃນວັນທີ 3 ທັນວາ 2025 ຜ່ານມາ. ໂດຍເນັ້ນໃນວຽກງານຂົງເຂດການພັດທະນາຂະແໜງການເງິນ.
ໃນໄລຍະປີ 2021-2025 ຜ່ານມາ, ສອງກະຊວງການເງິນລາວ-ຫວຽດນາມ ໄດ້ມີຜົນສຳເລັດໃນການຮ່ວມມືຈັດຕັ້ງປະຕິບັດໄດ້ທັງໝົດຈຳນວນ 128 ກິດຈະກຳ, ປະກອບເປັນ 162 ຄະນະ, ລວມມີ 842 ເທື່ອຄົນ, ຊຶ່ງໄດ້ປະກອບສ່ວນຊ່ວຍເຫຼືອ ໃນການປັບປຸງປະຕິຮູບຂະແໜງການເງິນໃຫ້ມີຄວາມເຂັ້ມແຂງ ແລະ ສາມາດຜ່ານຜ່າຄວາມຫຍຸ້ງຍາກທາງດ້ານເສດຖະກິດຕ່າງໆ.
 |
ສຳລັບແຜນການຮ່ວມມືຂອງສອງຂະແໜງການເງິນໄລຍະປີ 2026-2030 ເພີ່ມທະວີການສົ່ງເສີມການພັດທະເສດຖະກິດ-ການເງິນ ໃຫ້ມີຄວາມທົນທານກັບການປ່ຽນແປງຂອງສະພາບແວດລ້ອມ. ຄຽງຄູ່ກັບຄວາມຍືນຍົງ ແລະ ຮັບປະກັນໃນການເຊື່ອມໂຍງ ເຊື່ອມຈອດກັບສາກົນໄດ້ຢ່າງມີປະສິດທິຜົນຍິ່ງໆຂຶ້ນ ແລະ ຈະເສີມຂະຫຍາຍໃຫ້ມີລັກສະນະຫຼາກຫຼາຍຮູບແບບ ເພື່ອແທດເໝາະກັບຄວາມຕ້ອງການໃນການພັດທະນາຕົວຈິງ, ພ້ອມນັ້ນຈະສືບຕໍ່ບຸລິມະສິດໃນຂົງເຂດການຊ່ວຍສ້າງຄວາມເຂັ້ມແຂງດ້ານກົນໄກ ແລະ ລະບົບງົບປະມານ; ການປັບປຸງເຜີຍແຜ່ບັນດາລະບຽບກົດໝາຍ; ການນຳໃຊ້ລະບົບທັນສະໄໝເຂົ້າໃນການຄຸ້ມຄອງຂະແໜງການເງິນ; ການຄຸ້ມຄອງວຽກງານຊັບສິນແຫ່ງລັດ, ການຄຸ້ມຄອງໜີ້ສິນ, ການຄຸ້ມຄອງວຽກງານພາສີ, ອາກອນ, ຄັງເງິນແຫ່ງລັດ ແລະ ອື່ນໆ. ພ້ອມນັ້ນ, ກໍຈະໄດ້ສ້າງ ແລະ ຍົກລະດັບຄວາມອາດສາມາດຂອງພະນັກງານຂະແໜງການເງິນ ໂດຍຜ່ານສະຖາບັນການສຶກສາກ່ຽວຂ້ອງຢ່າງມີຫຼັກສູດ ແລະ ເປັນລະບົບ.
ນອກນັ້ນ, ຍັງຈະສືບຕໍ່ຊ່ວຍເຫຼືອຊຶ່ງກັນ ແລະ ກັນດ້ານໂຄງລ່າງພື້ນຖານ, ວັດຖຸອຸປະກອນດ້ານວິຊາສະເພາະ ແລະ ການຈັດກິດຈະກຳຕ່າງໆ ເພື່ອພົບປະ, ແລກປ່ຽນຂໍ້ມູນຂ່າວສານ ແລະ ປຶກສາຫາລືຖອດຖອນບົດຮຽນຮ່ວມກັນ ລະຫວ່າງ ສອງກະຊວງການເງິນລາວ-ຫວຽດນາມຢູ່ຂັ້ນສູນກາງ ແລະ ຂະແໜງການເງິນຢູ່ຂັ້ນທ້ອງຖິ່ນ. ສຳລັບທຶນການສຶກສາ ທີ່ສະໜັບສະໜູນໂດຍກະຊວງການເງິນ ສສ ຫວຽດນາມ ໃຫ້ພະນັກງານຂະ ແໜງການເງິນໃນລະດັບປະລິນຍາໂທ ແລະ ປະລິນຍາເອກ ໃນໄລຍະປີ 2026-2030 ແມ່ນເພີ່ມຈາກ 10 ທຶນ ມາເປັນ 15 ທຶນ ແລະ ເພີ່ມຫົວຂໍ້ແລກປ່ຽນຂອງອົງການຈັດຕັ້ງມະຫາຊົນຂອງທັງສອງຝ່າຍອີກດ້ວຍ.
ແຫຼ່ງຂ່າວ: ກະຊວງການເງິນ
ຄໍາເຫັນ