ກະຊວງຍຸຕິທໍາ ໂຄສະນາເຜີຍແຜ່ກົດໝາຍມີຜົນສໍາເລັດຫຼາຍດ້ານ

ທ່ານ ໄພວີ ສີບົວລິພາ ກ່າວວ່າ: ກົດໝາຍທີ່ຢູ່ໃນຄວາມຮັບຜິດຊອບຂອງລັດຖະບານປັດຈຸບັນມີຈໍານວນ 147 ສະບັບຄື: ຫ້ອງວ່າການສໍານັກງານນາຍົກລັດຖະມົນຕີ 1 ສະບັບ, ກະຊວງພາຍໃນ 5 ສະບັບ, ກະຊວງຍຸຕິທໍາ 10 ສະບັບ, ກະຊວງການຕ່າງປະເທດ 5 ສະບັບ, ກະຊວງປ້ອງກັນປະເທດ 5 ສະບັບ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ 10 ສະບັບ, ກະຊວງປ້ອງກັນຄວາມສະຫງົບ 9 ສະບັບ, ກະຊວງສຶກສາທິການ ແລະ ກິລາ 6 ສະບັບ, ກະຊວງອຸດສະຫະກໍາ ແລະ ການຄ້າ 12 ສະບັບ, ກະຊວງພະລັງງານ ແລະ ບໍ່ແຮ່ 3 ສະບັບ, ກະຊວງການເງິນ 16 ສະບັບ, ກະຊວງແຜນການ ແລະ ການລົງທຶນ 4 ສະບັບ, ກະຊວງກະສິກໍາ ແລະ ປ່າໄມ້ 10 ສະບັບ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ 5 ສະບັບ, ກະຊວງສາທາລະນະສຸກ 13 ສະບັບ, ກະຊວງໂຍທາທິການ ແລະ ຂົນສົ່ງ 11 ສະບັບ, ກະຊວງເຕັກໂນໂລຊີ ແລະ ການສື່ສານ 10 ສະບັບ, ກະຊວງແຮງງານ ແລະ ສະຫວັດດີການສັງຄົມ 6 ສະບັບ ແລະ ທະນະຄານແຫ່ງ ສປປ ລາວ 6 ສະບັບ. ໃນ 147 ກົດໝາຍ ໄດ້ໂຄສະນາເຜີຍແຜ່ 143 ກົດໝາຍ. ໃນນີ້, ກົດໝາຍທີ່ຍັງບໍ່ໄດ້ໂຄສະນາມີ 4 ສະບັບຄື: ກົດໝາຍວ່າດ້ວຍການຄຸ້ມຄອງໜີ້ສິນສາທາລະນະ, ພິພິທະພັນ, ວິຈິດສິນ, ການພັດທະນາສີມືແຮງງານ (ກົດໝາຍວ່າດ້ວຍການພັດທະນາສີມືແຮງງານແມ່ນສ້າງໃໝ່ ຊຶ່ງໄດ້ປະກາດໃຊ້ໃນວັນທີ 23 ມັງກອນ 2025 ຕາມລັດຖະດໍາລັດຂອງປະທານປະເທດ).

ທ່ານ ໄພວີ ສີບົວລິພາ ໃຫ້ຮູ້ຕື່ມວ່າ: ການຈັດຕັ້ງປະຕິບັດວຽກງານໂຄສະນາເຜີຍແຜ່ກົດໝາຍ ຊຶ່ງກະຊວງ, ອົງການ ແລະ ອົງການປົກຄອງທ້ອງຖິ່ນ ໄດ້ເອົາໃຈໃສ່ຄົ້ນຄວ້າສ້າງແຜນການ, ແຜນງານ ແລະ ໂຄງການໂຄສະນາເຜີຍແຜ່ກົດໝາຍ ທີ່ຢູ່ໃນຄວາມຮັບຜິດຊອບຂອງຕົນຜ່ານຮູບການຕ່າງໆ ແມ່ນມີຜົນສໍາເລັດຫຼາຍດ້ານ ເປັນຕົ້ນໄດ້ຈັດພິມປຶ້ມກົດໝາຍ 4 ຂົງເຂດ, ປື້ມສັງລວມກົດໝາຍສ້າງໃໝ່ ແລະ ປັບປຸງແຈກຢາຍໃຫ້ສໍານັກງານ, ອົງການ ພ້ອມທັງສະໜອງເຂົ້າຕູ້ປື້ມກົດໝາຍປະຈໍາບ້ານໄດ້ທັງໝົດ 356,489 ຫົວ ເພື່ອອໍານວຍຄວາມສະດວກໃຫ້ປະຊາຊົນລາວບັນດາເຜົ່າໄດ້ນໍາໃຊ້; ໂຄສະນາເຜີຍແຜ່ເຊື່ອມຊຶມກົດໝາຍຢູ່ບ້ານ, ກຸ່ມບ້ານ, ສໍານັກງານອົງການລັດ ແລະ ເອກະຊົນ, ສະຖານການສຶກສາເພື່ອເຊື່ອມຊຶມໃຫ້ພະນັກງານ-ລັດຖະກອນ, ກໍາລັງປະກອບອາວຸດ, ນັກທຸລະກິດ, ຜູ້ໃຊ້ແຮງງານ, ຜູ້ອອກແຮງງານ, ນັກຮຽນ, ນັກສຶກສາ ແລະ ປະຊາຊົນລາວບັນດາເຜົ່າໄດ້ຈໍານວນ 106,568 ຄັ້ງ ຊຶ່ງມີຜູ້ເຂົ້າຮ່ວມ 20,550,014 ເທື່ອຄົນ (ຍິງ 5,754,583 ເທື່ອຄົນ); ໂຄສະນາເຜີຍແຜ່ຜ່ານສື່ມວນຊົນດ້ວຍການຜະລິດລາຍການຄວາມຮູ້ທາງດ້ານກົດໝາຍ, ລະຄອນສັ້ນ, ສາລະຄະດີ, ສະປັອດໂຄສະນາ, ແຜ່ນພັບ, ໂພສເຕີເປັນພາສາລາວ, ພາສາມົ້ງ ແລະ ພາສາກຶມມຸ ເຜີຍແຜ່ຜ່ານວິທະຍຸ, ໂທລະພາບ, ໂທລະໂຄ່ງ, ເຟສບຸກ (Facebook), ຢູທູບ (YouTube), ວາລະສານ ແລະ ໜັງສືພິມ; ໂຄສະນາເຜີຍແຜ່ຜ່ານເວັບໄຊຈົດໝາຍເຫດທາງລັດຖະການຂອງລັດຖະບານ, ແອັບກົດໝາຍລາວຂອງກະຊວງຍຸຕິທຳ ແລະ ເວັບໄຊຂອງບັນດາກະຊວງ, ອົງການ ແລະ ອົງການປົກຄອງທ້ອງຖິ່ນ. ໃນນີ້, ມີຜູ້ເຂົ້າຊົມໃຊ້ຈົດໝາຍເຫດທາງລັດຖະການ 249,000 ເທື່ອຄົນ, ຜູ້ເຂົ້າຊົມໃຊ້ແອັບກົດໝາຍລາວ 136,732 ຄັ້ງ; ຄົ້ນຄວ້າຫັນເອົາກົດໝາຍເຂົ້າໃນຫຼັກສູດການສຶກສາທັງພາກລັດ ແລະ ເອກະຊົນ ພ້ອມທັງເປີດການຮຽນ-ການສອນກົດໝາຍຊັ້ນຕົ້ນໃຫ້ພະນັກງານຫຼັກແຫຼ່ງຂອງແຂວງ, ນະຄອນຫຼວງ, ເມືອງ, ນະຄອນ ແລະ ອົງການຈັດ ຕັ້ງຂັ້ນບ້ານໄດ້ 1,507 ຄົນ ຍິງ 447 ຄົນ. (ຂ່າວ: ວັນເພັງ, ພາບ: ສຸກສະຫວັນ)