 |
ກອງປະຊຸມ, ໄດ້ຜ່ານຂໍ້ຕົກລົງເພີ່ມຕື່ມ ກ່ຽວກັບການແຕ່ງຕັ້ງຄະນະຮັບຜິດຊອບກອງປະຊຸມໃຫຍ່ ຜູ້ແທນອົງຄະນະພັກແຂວງ ສະໄໝທີ XI ພ້ອມທັງຜ່ານແຜນການເຄື່ອນໄຫວ ໂດຍໄດ້ມີການກໍານົດ ວັນ, ເວລາ ເລີ່ມແຕ່ການດຳເນີນການທາບທາບໃນຮອບທີ I, II, III, ການດໍາເນີນຊີວິດການເມືອງໃນຄະນະບໍລິຫານງານພັກແຂວງທ້າຍສະໄໝ ແລະ ກອງປະຊຸມຕ່າງໆທີ່ກ່ຽວຂ້ອງ ລວມເຖິງການກຳນົດເອົາທ້າຍເດືອນກັນຍາ 2025 ໃນການດໍາເນີນກອງປະຊຸມໃຫຍ່ ຜູ້ແທນອົງຄະນະພັກແຂວງ ສະໄໝທີ XI.
ໂອກາດນີ້, ສະຫາຍ ເລຂາພັກແຂວງ ໄດ້ມີຄໍາເຫັນຊີ້ນໍາຕໍ່ກອງປະຊຸມ ໂດຍສະເໜີໃຫ້ເອົາໃຈໃສ່ລົງເລິກກ່ຽວກັບການຄົ້ນຄວ້າ ກຳນົດຄໍາຂວັນ ຂອງກອງປະຊຸມໃຫຍ່ ໃຫ້ມີເນື້ອໃນທີ່ແທດເໝາະ ເພື່ອເປັນບ່ອນອີງໃນການສູ້ຊົນຈັດຕັ້ງປະຕິບັດ ແລະ ເປັນບ່ອນອີງໃນການກຳນົດວິໄສທັດ, ແຜນຍຸດທະສາດ, ທິດທາງແຜນການ ລວມເຖິງແຜນຄາດໝາຍສູ້ຊົນ, ທ່າແຮງບົ່ມຊ້ອນ ແລະ ບັນດາໜ້າວຽກຕ່າງໆ ທີ່ຈະກຳນົດເຂົ້າໃນຮ່າງລາຍງານການເມືອງຂອງແຂວງ ໃນ 5 ປີຕໍ່ໜ້າ ໃຫ້ມີຄວາມຮັດກຸມ, ແທດເໝາະ, ມີເນື້ອໃນສົມບູນ ແລະ ສາມາດນໍາໄປຈັດຕັ້ງປະຕິບັດໄດ້ຮັບຜົນເປັນຈິງ, ເອົາໃຈໃສ່ເປັນເຈົ້າການໃນການກະກຽມ ທາງດ້ານການກຳນົດເນື້ອໃນເອກະສານທີ່ກ່ຽວຂ້ອງຕ່າງໆ ສ້າງເປັນແບບຟອມ, ຮ່າງເອກະສານ ເພື່ອສະໜອງໄດ້ທັນຕາມກຳນົດເວລາ ແລະ ຮັບປະກັນດຳເນີນໄປຢ່າງຖືກຕ້ອງຕາມຂັ້ນຕອນ ແລະ ລະບຽບການຕ່າງໆ, ເອົາໃຈໃສ່ ໂຄສະນາ, ຊຸກຍູ້ປຸກລະດົມຂະບວນການ ເພື່ອໃຫ້ຖັນແຖວພະນັກງານ-ສະມາຊິກພັກ ກໍຄືປະຊາຊົນບັນດາເຜົ່າໃຫ້ຮັບຮູ້, ເຂົ້າໃຈ ແລະ ມີສ່ວນຮ່ວມ ຕາມພາລະບົດບາດ, ໜ້າທີ່ ຂອງພົນລະເມືອງລາວ ຕິດພັນກັບເນື້ອໃນຂໍ້ແຂ່ງຂັນ ຮັກຊາດ ແລະ ພັດທະນາ ໃຫ້ແຂງແຮງຂຶ້ນ, ມີການກະກຽມສິລະປະວັນນະຄະດີ, ຂະບວນການອະນາໄມ, ປະດັບປະດາເຮືອນຊານບ້ານຊ່ອງ, ຖະໜົນຫົນທາງ, ສຳນັກງານຫ້ອງການ ແລະ ສະຖານທີ່ສາທາລະນະຕ່າງໆ ໃຫ້ມີຄວາມສະອາດ ງາມຕາ, ມີການຂຶ້ນແຜນທາງດ້ານງົບປະມານຮັບໃຊ້ໃຫ້ແກ່ການດຳເນີນກອງປະຊຸມ ບົນຈິດໃຈປະຢັດ ແລະ ຮັບປະກັນດ້ານຄຸນນະພາບຂອງວຽກງານ ແລະ ເອົາໃຈໃສ່ຕໍ່ວຽກງານປ້ອງກັນຄວາມສະຫງົບ ທັງໄລຍະຂອງການກະກຽມ ແລະ ໄລຍະການດຳເນີນກອງປະຊຸມ ເພື່ອຮັບປະກັນ ທາງດ້ານຄວາມສະຫງົບ ແລະ ຄວາມເປັນລະບຽບຮຽບຮ້ອຍ.
(ຂ່າວ-ພາບ: ກອງຄໍາ)
ຄໍາເຫັນ