 |
ສະຫາຍ ຄຳຜອຍ ວັນນະສານ ໄດ້ຕາງໜ້າຄະນະພັກ-ຄະນະປະຈຳ ສນຊ ອວຍພອນວັນສ້າງຕັ້ງພັກກອມ ມູນິດຫວຽດນາມ ພ້ອມທັງສະແດງຄວາມຍ້ອງຍໍຊົມເຊີຍຕໍ່ຜົນງານອັນຍິ່ງໃຫຍ່ ທີ່ພັກກອມມູນິດຫວຽດນາມຍາດມາໄດ້ຕະຫຼອດໄລຍະ 96 ປີຜ່ານມາ ພາຍໃຕ້ການນຳພາກໍ່ຕັ້ງຂອງປະທານ ໂຮ່ຈິມິນ ພ້ອມທັງຊົມເຊີຍກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIV ຂອງພັກກອມມູນິດຫວຽດນາມທີ່ຫາກໍສຳເລັດ. ພ້ອມນັ້ນ, ສະຫາຍຍັງໄດ້ແຈ້ງຜົນສໍາເລັດກອງປະຊຸມຊາຍແດນ 2 ປະເທດ ໂດຍສະເພາະ ສນຊ ແລະ ສູນກາງແນວໂຮມປະເທດຊາດຫວຽດ ນາມ ທີ່ຫາກໍສຳເລັດເມື່ອບໍ່ດົນມານີ້. ພ້ອມນີ້, ສະຫາຍ ຄຳຜອຍ ວັນນະສານ ກໍໄດ້ອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ ໃຫ້ເພີ່ມພູນຄູນສ້າງ ແລະ ສືບທອດມູນເຊື້ອຜົນງານຂອງປະທານ ໂຮ່ຈິມິນ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ໄດ້ສ້າງໄວ້ ໃຫ້ໝັ້ນຄົງຂະໜົງແກ່ນຕະຫຼອດໄປ.
ສະຫາຍເອກອັກຄະລັດຖະທູດຫວຽດນາມ ກໍໄດ້ສະແດງຄວາມຍິນດີຕ້ອນຮັບ ແລະ ຂອບໃຈເປັນຢ່າງຍິ່ງຕໍ່ ສະຫາຍຮອງປະທານ ສນຊ ພ້ອມດ້ວຍຄະນະ ທີ່ໄດ້ເຂົ້າພົບປະຢ້ຽມຢາມ ແລະ ອວຍພອນວັນສ້າງຕັ້ງພັກກອມມູນິດຫວຽດນາມໃນຄັ້ງນີ້.
ຂ່າວ-ພາບ: ສນຊ
ຄໍາເຫັນ