ກອງປະຊຸມໃນຄັ້ງນີ້: ມີຄະນະຜູ້ແທນຈາກຫຼາຍພາກສ່ວນຂອງ 10 ປະເທດອາຊຽນເຂົ້າຮ່ວມ ແລະ ຄະນະຜູ້ແທນຈາກປະເທດ ປາກີສະຖານ, ສີລັງກາ, ບັງກາລາເດດສ, ອົງການໄກ່ເກ່ຍສາກົນ, ກອງເລຂາອາຊຽນ, ສະມາຄົມນັກກົດໝາຍສາກົນກ່ຽວກັບໜຶ່ງແລວ ໜຶ່ງເສັ້ນທາງ, ສູນການຮ່ວມມື ເພື່ອປະຕິບັດກົດໝາຍ ແລະ ຄວາມໝັ້ນຄົງ ແມ່ນໍ້າຂອງ ແມ່ນໍ້າລ້ານຊ້າງ. ສຳລັບ ສປປ ລາວ ແມ່ນມີຄະນະຜູ້ແທນຈາກ ສະພາແຫ່ງຊາດ, ກະຊວງການກະຊວງການຕ່າງປະເທດ, ກະຊວງຍຸຕິທໍາ ແລະ ສານປະຊາຊົນສູງສຸດ ເຂົ້າຮ່ວມ.
ກອງປະຊຸມຄັ້ງນີ້: ໄດ້ເນັ້ນໜັກເຖິງຄວາມຈຳເປັນໃນການສົ່ງເສີມການຈັດລະບຽບກົດ
ໝາຍ, ກົດລະບຽບ ແລະ ມາດຕະຖານໃນຂົງເຂດການຂົນສົ່ງ, ເສດຖະກິດດິຈິຕອນ ແລະ ເສດຖະກິດສີຂຽວ, ພ້ອມທັງເພີ່ມປະສິດທິພາບການຮ່ວມມືດ້ານການບັງຄັບໃຊ້ກົດໝາຍໃນການຕໍ່ສູ້ກັບອາຊະຍາກຳຂ້າມຊາຍແດນ ແລະ ການແກ້ໄຂຂໍ້ຂັດແຍ່ງຂ້າມຊາຍແດນ.
ໃຫ້ກຽດເຂົ້າຮ່ວມພິທີເປີດກອງປະຊຸມ ປະກອບມີ ທ່ານ ເສິນ ເວີນ ຊິງ ກໍາມະການກົມການເມືອງສູນກາງພັກຄອມມູນິດຈີນ, ເລຂາຄະນະກຳມະການສູນກາງພັກຄອມມູນິດຈີນ ວ່າດ້ວຍການເມືອງ ແລະ ກົດໝາຍ, ປະທານສະມາຄົມກົດໝາຍແຫ່ງ ສປ ຈີນ, ທ່ານ ຢວນ ເຈ່ຍ ຈຸ່ນ ກໍາມະການກົມການເມືອງສູນກາງພັກຄອມມູນິດ ຈີນ, ເລຂາພັກນະຄອນ ສົງ ຊິງ, ພ້ອມດ້ວຍການນຳຂອງພ່າກສ່ວນຕ່າງໆກໍ່ໄດ້ເຂົ້າຮ່ວມ.
ທ່ານ ນາງ ວຽງທອງ ສີພັນດອນໄດ້ຂຶ້ນກ່າວປາໄສ ໃນກອງປະຊຸມໂດຍມີເນື້ອໃນເໜັ້ນໜັກເຖິງການພົວພັນອັນດີງາມລະຫວ່າງ ລາວ ແລະ ສປ ຈີນ ພາຍໃຕ້ແຜນແມ່ບົດວ່າດ້ວຍການສ້າງຄູ່ຮ່ວມສະຕາກຳ ລາວ-ຈີນ, ຈີນ-ລາວ ໃນແຕ່ລະໄລຍະ ອັນໄດ້ເຮັດໃຫ້ ທັງສອງປະເທດ ໄດ້ຮັບການພັດທະນາການຮ່ວມມືຢ່າງຮອບດ້ານ. ບົດບາດຄວາມສໍາຄັນຂອງການຮ່ວມມືໃນກອບ ອາຊຽນ ແລະ ຈີນ ໂດຍສະເພາະການຈັດຕັ້ງປະຕິບັດອານຸສັນຍາ ເຂດການຄ້າເສລີ ອາຊຽນ-ຈີນ 3.0 (CAFTA 3.0) ເພື່ອເປີດເສລີທາງດ້ານການຄ້າລະຫວ່າງບັນດາປະເທດສະມາຊິກ, ສົ່ງເສີມການໝູນວຽນຂົນສົ່ງສິນຄ້າ, ການບໍລິການ ແລະ ທຶນ ຢ່າງເສລີ, ສ້າງກົດລະບຽບການຄ້າທີ່ໂປ່ງໃສ ຕ່າງຝ່າຍຕ່າງມີຜົນປະໂຫຍດ.
ກອງປະຊຸມໄດ້ຮັບຮອງຫຼັກການຮ່ວມມື ລະຫວ່າງ ຈີນ-ອາຊຽນ ເປັນຕົ້ນ: (1) ການສ້າງຄວາມເຂັ້ມແຂງໃນການຮ່ວມມືດ້ານກົດໝາຍ ອາຊຽນ-ຈີນ ແລະ ການສ້າງປະຊາຄົມຮ່ວມສະຕາກຳດຽວກັນໃນພາກພື້ນ; (2) ການເສີມຂະຫຍາຍ ຂໍ້ລິເລີ່ມການປົກຄອງຮ່ວມກັນ ຂອງທ່ານ ສີ ຈິນ ຜິງ ເພື່ອສັນຕິພາບ, ຄວາມໝັ້ນຄົງ, ຄວາມຈະເລີນຮຸ່ງເຮືອງ, ຄວາມສວຍງາມ ແລະ ມິດຕະພາບ; (3) ການຮ່ວມມືເພື່ອຍົກສູງຄຸນນະພາບຂອງການຜະລິດ, ສົ່ງເສີມການປະຕິບັດສັນຍາຫຸ້ນສ່ວນຮອບດ້ານທາງເສດຖະກິດໃນພາກພື້ນ ແລະ ອະນຸສັນຍາເຂດການຄ້າເສລີຈີນ-ອາຊຽນ 3.0 ຢ່າງແຂງແຮງ; (4) ການຮ່ວມມືທາງດ້ານການປະຕິບັດກົດໝາຍ ແລະ ການປະສານງານໃນວຽກງານຕຸລາການ ໂດຍສະເພາະວຽກງານຮັບຮູ້ຄຳຕັດສິນຄະດີແພ່ງ, ຄະດີການຄ້າ ລະຫວ່າງປະເທດ ແລະ ກ້າວໄປເຖິງການຮ່ວມມືດ້ານອາສະຍາກຳຂ້າມຊາດ; (5) ຊຸກຍູ້ໃຫ້ມີການຮ່ວມມືເພື່ອແກ້ໄຂຂໍຂັດແຍ່ງທາງແພ່ງ ແລະ ການຄ້າລະຫວ່າງປະເທດ ຜ່ານກົນໄກການບໍລິການໄກ່ເກ່ຍ; (6) ສົ່ງເສີມການຝຶກອົບຮົມ, ການສຶກສາໃນລະດັບປະລິນຍາເອກທາງດ້ານກົດໝາຍ ພາຍໃຕ້ ແຜນງານຮ່ວມມືລະຫວ່າງສະຖາບັນການສຶກສາລະຫວ່າງ ຈີນ-ອາຊຽນ; (7) ສະໜັບສະໜູນການຮຽນຮູ້ ແລະ ແລກປ່ຽນບົດຮຽນ ຕໍ່ກັບການປົກຄອງລັດດ້ວຍກົດໝາຍ ລະຫວ່າງຈີນ - ອາຊຽນ ແລະ (8) ສົ່ງເສີມການຮ່ວມມືທາງດ້ານເສດຖະກິດຂອງແຕ່ປະເທດ ຜ່ານການປົກຄອງລັດດ້ວຍກົດໝາຍ ຮັບປະກັນໃຫ້ມີສະຖຽນລະພາບ ແລະ ໝັ້ນຄົງ ໃນພາກພື້ນ.
ນອກຈາກການເຂົ້າຮ່ວມກອງປະຊຸມດັ່ງກ່າວແລ້ວ, ຄະນະຜູ້ແທນຂັ້ນ ສປສສ ນໍາໂດຍ ທ່ານ ນາງ ວຽງທອງ ສີພັນດອນ ໄດ້ພົບປະກັບ ຄະນະຜູ້ແທນຂັ້ນສູງຝ່າຍ ສປ ຈີນ ນຳໂດຍ ທ່ານ ເສິນ ເວີນ ຊິງ, ຊຶ່ງສອງຝ່າຍໄດ້ແລກປ່ຽນໃນຫຼາຍເນື້ອໃນທີ່ສຳຄັນຕໍ່ການຮ່ວມມືໃນຂົງເຂດກົດໝາຍ ແລະ ຍຸຕິທຳ ໃນອານາຄົດ ໂດຍຍຶດໝັ້ນເອົາການປົກຄອງລັດດ້ວຍກົດໝາຍເປັນບັນຫາໃຈກາງ.(ຂ່າວ: ສປສສ)
ຄໍາເຫັນ