 |
ກອງປະຊຸມໃນຄັ້ງນີ້ຈັດຂຶ້ນເພື່ອທົບທວນຄືນໝາກຜົນ ແລະ ສິ່ງທ້າທາຍໃນການຈັດຕັ້ງປະຕິບັດແຜນຍຸດທະສາດຂອງປະຊາຄົມວັດທະນະທໍາ-ສັງຄົມໃນໄລຍະຜ່ານມາ ລວມທັງແລກປ່ຽນຄໍາຄິດຄວາມເຫັນຕໍ່ທິດທາງແຜນການຍຸດທະສາດໃໝ່ຫຼັງປີ 2025 ຂອງປະຊາຄົມວັດທະນະທຳ-ສັງຄົມອາຊຽນ ແລະ ປຶກສາຫາລືບາງບັນຫາສຳຄັນອື່ນໆຈໍານວນໜຶ່ງທີ່ເປັນວຽກຈຸດສຸມ ເປັນຕົ້ນການສ້າງຄຸນຄ່າດ້ານມໍຣະດົກ ແລະ ວັດ ທະນະທໍາ; ການສົ່ງເສີມວຽກງານປັນຍາປະດິດ, ການຫັນເປັນດີຈີຕອນ ແລະ ວຽກງານສີຂຽວເພື່ອເສີມສ້າງທັກສະ ແລະ ຄວາມສາມາດໃຫ້ແກ່ອາຊຽນໃນອະນາຄົດ; ຂໍ້ລິເລີ່ມດ້ານສາທາລະນະສຸກເພື່ອຄວາມສົມບູນພູນສຸກຂອງອາຊຽນ; ການສົ່ງເສີມທ່າແຮງບົ່ມຊ້ອນຂອງຊາວໜຸ່ມ ແລະ ກິລາເພື່ອສົ່ງເສີມການຈະເລີນເຕີບໂຕ, ຄວາມສາມັກຄີປອງດອງ ແລະ ຄວາມເປັນເລີດ; ການສົ່ງເສີມມາດຕະການດ້ານສະພາບອາກາດເພື່ອການຄຸ້ມຄອງ, ການເປັນຄູ່ຮ່ວມ ແລະ ການເປັນເຈົ້າການ. ຄຽງຄູ່ກັນນີ້, ກອງປະຊຸມຍັງໄດ້ພ້ອມກັນຄົ້ນ ຄວ້າຕົກລົງຮັບຮອງເອົາເອກະສານສໍາຄັນຈຳນວນ 19 ສະບັບ. ໃນນັ້ນ, ປະກອບມີ 5 ສະບັບເພື່ອຮັບຮອງ ແລະ 14 ສະບັບເພື່ອຮັບຊາບໂດຍຜູ້ນຳອາຊຽນໃນກອງປະຊຸມສຸດຍອດອາຊຽນຄັ້ງທີ 47.
ກອງປະຊຸມຄັ້ງນີ້, ທ່ານ ນາງ ສວນສະຫວັນ ວິຍະເກດ ໄດ້ສະແດງຄວາມເປັນເອກະພາບຕໍ່ແຜນບຸລິມະສິດການເປັນປະທານອາຊຽນຂອງມາເລເຊຍ 2025 ຊຶ່ງເຫັນໄດ້ວ່າມີຄວາມສອດຄ່ອງກັບຂໍ້ລິເລີ່ມ: ຄຸນຄ່າມາດານີຂອງມາເລເຊຍ: ຄວາມຍືນຍົງ, ກວມລວມ ແລະ ຄວາມໃສ່ໃຈ ແລະ ສະແດງການສະໜັບສະໜູນບັນດາເອກະສານທີ່ສຳຄັນຂອງອາຊຽນ ທີ່ກະກຽມນຳເໜີຕໍ່ຜູ້ນຳອາຊຽນພິຈາລະນາຮັບຮອງ ແລະ ຮັບຊາບທີ່ກອງປະຊຸມສຸດຍອດອາຊຽນ ຄັ້ງທີ 47 ແນໃສ່ເພີ່ມທະວີເອກະລັກອາຊຽນ, ຄວາມເປັນເອກະພາບ ແລະ ຄວາມເຂັ້ມແຂງ. ບັນດາເອກະສານສຳຄັນເຫຼົ່ານັ້ນຈະຊ່ວຍສະໜັບສະໜູນ ແລະ ຊຸກຍູ້ການຮ່ວມມືຂອງທົ່ວທຸກຂະແໜງການພາຍໃນເສົາຄ້ຳປະຊາຄົມວັດທະນະທຳ-ສັງຄົມອາຊຽນໃຫ້ເຂັ້ມແຂງຍິ່ງຂຶ້ນ, ສ້າງເງື່ອນໄຂໃຫ້ມີການໄປມາຫາສູ່ຂອງປະຊາຊົນໃຫ້ຫຼາຍຂຶ້ນ, ປັບປຸງຄຸນນະພາບຊີວິດການເປັນຢູ່ຂອງປະຊາ ຊົນອາຊຽນໃຫ້ຢູ່ດີກິນດີ ແລະ ມີຄວາມສະດວກສະບາຍ ສາມາດເຂົ້າເຖິງການບໍລິການສາທາລະນະຢ່າງທົ່ວເຖິງ ເປັນຕົ້ນດ້ານການສຶກສາ, ສາທາລະນະສຸກ, ຂໍ້ມູນຂ່າວສານ. ຄຽງຄູ່ກັບການຮັບຮູ້ທາງດ້ານວັດທະນະທໍາ, ສິ່ງແວດລ້ອມ, ຄວາມປ່ຽນແປງຂອງດິນຟ້າອາກາດ, ການເຄື່ອນຍ້າຍແຮງງານ ແລະ ອື່ນໆ.
ໂອກາດນີ້, ທ່ານ ນາງ ສວນສະຫວັນ ວິຍະເກດ ຍັງໄດ້ແລກປ່ຽນຄຳຄິດຄໍາເຫັນໃນກອງປະຊຸມຕໍ່ທິດທາງແຜນຍຸດທະສາດຂອງປະຊາຄົມວັດທະນະທຳ-ສັງຄົມອາຊຽນຫຼັງປີ 2025 ໂດຍເນັ້ນໃສ່ບາງຈຸດສຳຄັນຄື: ອາຊຽນຄວນສືບຕໍ່ເອົາໃຈໃສ່ປະຕິບັດພາລະບົດບາດຂອງແຕ່ຂະແໜງການຢ່າງກົມກຽວບໍ່ພຽງແຕ່ພາຍໃນເສົາຄໍ້າວັດທະນະທຳ-ສັງຄົມ, ແຕ່ລວມທັງເສົາຄ້ຳອື່ນໆ ເພື່ອຮັບປະກັນກົນໄກການປະສານງານທີ່ມີປະສິດທິພາບ ແນໃສ່ຈັດຕັ້ງປະຕິບັດບັນດານະໂຍບາຍທີ່ເປັນຍຸດທະສາດລະດັບພາກພື້ນ ກໍຄືການຈັດຕັ້ງຜັນຂະຫຍາຍແຜນຍຸດທະສາດປະຊາຄົມວັດທະນະທຳ-ສັງຄົມອາຊຽນ ຫຼັງປີ 2025 ໃຫ້ເກີດຜົນປະໂຫຍດສູງສຸດໃຫ້ແກ່ປະຊາຊົນພວກເຮົາ; ອາຊຽນ ຄວນສົ່ງເສີມບັນດາຂໍ້ລິເລີ່ມທີ່ຊຸກຍູ້ການເປີດປະຕູສູ່ຕະຫຼາດ ແລະ ໂອກາດແຫ່ງການຈ້າງງານໂດຍສະເພາະຊາວໜຸ່ມດ້ວຍການຍົກລະດັບຄວາມອາດສາມາດ, ທັກສະ ແລະ ທາງນະວັດຕະກຳເພື່ອສະໜັບສະໜູນການພັດທະນາແຮງງານໃນພາກພື້ນໃຫ້ມີຄຸນນະພາບຍິ່ງຂຶ້ນ ແລະ ອາຊຽນ ຄວນສືບຕໍ່ຢ່າງຕັ້ງໜ້າສົ່ງເສີມສິດທິພື້ນຖານ ແລະ ສະຫວັດດີການໃຫ້ແກ່ກຸ່ມຄົນດ້ອຍໂອກາດ ເປັນຕົ້ນແມ່ນຄົນເສຍອົງຄະ, ຜູ້ອາຍຸສູງ, ແມ່ຍິງ ແລະ ເດັກນ້ອຍເພື່ອປົກປ້ອງຈາກການໃຊ້ຄວາມຮຸນແຮງ, ສົ່ງເສີມຄວາມສະເໝີພາບ ແລະ ມີຄວາມປອດໄພ ກວມລວມ ແລະ ສາມັກຄີເປັນຈິດໜຶ່ງໃຈດຽວຢູ່ໃນປະຊາຄົມອາຊຽນ.
ຂ່າວ-ພາບ: ກອງເລຂາເສົາຄ້ຳ ASCC ລາວ
ຄໍາເຫັນ